Ndusụk Ẹsitịbe, Ediwak Itịbeke

Ndi akpama ndifiọk nte n̄kpọn̄ editiede? Ediwak owo ẹkpema. Mme owo ẹsitịn̄ se iditịbede n̄kpọn̄. Ndusụk se mmọ ẹtịn̄de ẹsitịbe, ediwak itịbeke. Yak inọ uwụtn̄kpọ ifan̄:

• NTAIFIỌK ẹbiat ediwak okụk ẹnyụn̄ ẹda ikpọ masịn̄ ẹdomo ndifiọk nte n̄kpọn̄ editiede. Mmọ ẹsitịn̄ m̀mê edịm eyedep m̀mê ididepke, ẹnyụn̄ ẹtịn̄ se iditịbede ke ntak emi mme owo ẹbiatde isọn̄.

• MME ANAM-NDỤN̄ỌDE ẹsitịn̄ nte mbubehe ye ukara ẹditiede. Warren Buffett, kiet ke otu mbon emi ẹnyenede n̄kpọ ẹkan ke ererimbot, enen̄ede ọfiọk nditịn̄ nte mbubehe editiede tutu ẹdikot enye prọfet. Nate Silver emi esinyụn̄ anamde ndụn̄ọde esitịn̄ nte ata ediwak n̄kpọ ẹditiede ke America, ọtọn̄ọde ke nte ukara editiede tutu esịm enyịn̄ mbon fim America emi ẹdinọde enọ.

• N̄WED ESET editie nte prọfesi ọnọ ediwak owo. Ndusụk owo ẹdọhọ ke se Michel de Notredame ekewetde ke n̄kpọ nte isua 500 emi ẹkebede, emi mîkan̄wan̄ake owo, ke etịbe mfịn. Ediwak owo ẹkedọhọ ke n̄wed usenọfiọn̄ Maya emi eketrede ke December 21, 2012, okowụt ke ererimbot ọmọn̄ esịm utịt usen oro.

• MME ETUBOM UFỌKABASI ẹsidọhọ mme owo ndusụk ini ẹte ke enyene-ndịk n̄kpọ eyetịbe ọnọ ekondo man ẹsịn mme owo ndịk ke idem ẹnyụn̄ ẹkọ mbet. Harold Camping ye ikọt esie ẹkedọhọ ke ererimbot emi ọmọn̄ ebe efep ke 2011. Edi n̄kọ ererimbot ke isụk idu emi.

• MME OKỤT-N̄KUKỤT ẹdọhọ ke imekeme nditịn̄ se iditịbede n̄kpọn̄. Edgar Cayce ye Jeane Dixon ẹma ẹtịn̄ ndusụk n̄kpọ emi ẹditịbede ke ufan̄ isua 1900 esịm 2000. Ndusụk ẹma ẹtịbe, edi ediwak iketịbeke. Dixon ọkọdọhọ ke ọyọhọ Ekọn̄ Ererimbot Ita ayasiaha ke 1958, ndien Cayce ọdọhọ ke inyan̄ ọyọtọ emen obio New York ke n̄kpọ nte 1975.

Ndi odu nte owo ekemede ndifiọk se iditịbede n̄kpọn̄? Eti mbụme edi oro sia edieke ọdiọn̄ọde se iditịbede n̄kpọn̄, ọyọdiọn̄ọ nte odude uwem idahaemi.