Ndi Ama Ọfiọk?

Ndi Ibet Moses ama esin̄wam nditọ Israel ẹbiere kpukpru mfịna oro mmọ ẹkesinyenede ke otu idemmọ?

AMA esin̄wam. Yak ise uwụtn̄kpọ kiet. Deuteronomy 24:​14, 15 ọdọhọ ete: “Kûtụk owoutom emi n̄kpọ ọsọn̄de ye enye, emi onyụn̄ ebuenede, edide enye edi eyenete fo m̀mê esenowo emi odụn̄de ke isọn̄ fo, . . . mbak enye ediseme ọnọ Jehovah aban̄a fi, ndien ẹyebat oro ẹnọ fi ke idiọk.”

Utọ n̄kpọ emi ama etịbe ke n̄kpọ nte isua 2,700 emi ẹkebede. Owoutom kiet ama ekpe andikara ubọk ete an̄wam imọ ke ẹfịk imọ. Ẹkewet eben̄e esie ke mbai usiọn̄, ndien ẹkụt enye ke n̄kpere Ashdod. Etie nte owoutom emi ikekemeke ndikpen̄e udomo barley oro ẹkedọhọde enye ekpen̄e. Se ẹkewetde ke eben̄e oro edi emi: “Ke asan̄autom fo [emi esịnde eben̄e emi] ama ekekpen̄e ukpen̄e ama usen ifan̄ emi ẹbede, Hoshayahu eyen Shobay ama edi edibọ ewụra asan̄autom fo. . . . Kpukpru mbonutom oro ikadade ntre ke eyo ikpen̄e ukpen̄e ẹdi ntiense mi . . . ke ntịn̄ akpanikọ. Nduehe n̄kpọ ndomokiet. . . . Ekpededi andikara ekere ke ibeheke imọ ndidọhọ ẹkpọn̄ ewụra asan̄autom fo ẹnọ asan̄autom fo, yak mbọm mi anam fi ọdọhọ ẹkpọn̄ ẹnọ mi! Kûdodop use n̄kpọ emi koro asan̄autom fo inyeneke ewụra se esịnede.”

Simon Schama emi esiwetde mbụk eset ọdọhọ ke ‘se owoutom oro eketịn̄de owụt ke kpa ye oro enye okoyomde ẹkpọn̄ ewụra imọ ẹnọ imọ, ke enye ama ọfiọk se Ibet Moses etịn̄de, akpan akpan enye emi ẹwetde ke Leviticus ye Deuteronomy ẹte owo okûfịk ubuene.’