Ekebe Mbụme

◼ Ke ini owo mîsioho owo ifep, ke ntak owụtde ata edikabade esịt, nte enen ndikpan enye ndinam utom ukwọrọikọ ke ndusụk idaha?

Ke ini ẹnọde owo nsuannọ eke ikpe, ẹsiwak ndidori ndusụk ukpan. Emi ekeme ndisịne editre ndibọrọ mbụme ke mbono esop, edinam n̄kpọ m̀mê mme nnamn̄wụt ke ndutịm, m̀mê edibọn̄ akam ke ibuot esop. Sia idiọk edinam esie edide uyarade mmeme eke spirit, ndidori ukpan edi mfọnido oro anamde mbiomo esie efere. Enye ndien eyenyene ediwak ini ọnọ mme n̄kpọ eke spirit utọ nte ọkpọkpọ ukpepn̄kpọ ye editie n̄kere.

Iyomke ẹkpan enye ndibuana nnyụn̄ ntọt ibatutom ukwọrọikọ esie. (Rome 10:9, 10) Utom ukwọrọikọ an̄wam nnyịn ndisọn̄ọ mbuọtidem nnyịn. Ke ntre, Christian kiet kiet ekpenyene ndibuana ke utom ukwọrọikọ kpukpru ini, ntem adade utom owụt mbuọtidem esie.

Nso edieke idiọk edinam esie ekenen̄erede ọwọrọ idiọk etop? Edidi edinam owụtde eti ibuot enye ndibuana ke utom ukwọrọikọ ke efakutom oro mfịna emi mînen̄ekede iwọrọ etop, ke nsụhọde n̄kaha ke ibio ini. Ọfọn nditi nte ke utom ukwọrọikọ edi akpan ubak utom oro nnyịn inamde inọ Abasi, ndien kpukpru ikọt Jehovah ẹkpenyene ndibuana ke enye.—Matt. 24:14; 28:18-20.

Nso kaban̄a owo emi ẹfiakde ẹda ẹsịn ke ẹma ẹkesio ẹfep? Nte ẹkpenyene ndisọsọp nyak enye abuana ke utom an̄wautom? Ih, ke asan̄ade ekekem ye mme ekikere eke enyọn̄ emi, ẹkpenyene ndiyak enye etiene abuana ke utom an̄wautom ke ẹma ẹkefiak ẹda enye ẹsịn. Kaban̄a mme ifet utom eken ke afan̄ emi, ẹyefiak ẹnọ mmọ sụn̄sụn̄ nte kọmiti ukpeikpe okụtde n̄kọri eke spirit oro enye anamde.