Tan̄a Eti Mbụk Uko Uko
1 Ke mbụk, ẹdiọn̄ọ mme ata Christian kaban̄a uko mmọ. Apostle Peter ye John ẹdi n̄wọrọnda uwụtn̄kpọ kaban̄a emi. Kpa ye oro ẹketopde mmọ ẹdọn̄ ke ufọk-n̄kpọkọbi ẹnyụn̄ ẹsịnde mmọ ndịk ke idem, mme apostle ẹmi ẹma ẹka iso nditịn̄ akpanikọ ke unana ndịk ye uko. (Utom 4:18-20, 23, 31b) Paul n̄ko ama aka iso anam utom esie uko uko ke ọkpọsọn̄ efakutom idem okposụkedi enye okosobode ekese ukọbọ.—Utom 20:20; 2 Cor. 11:23, 28.
2 Kpa ye ikpọ afanikọn̄, didie ke ekedi nte ke mme apostle ọkọrọ ye mme Christian eken ke ofụri mbụk ẹma ẹkeme ndika iso ntan̄a eti mbụk uko uko? Apostle Paul ọbọrọ mbụme oro ke 1 Thessalonica 2:2, ke ebiet enye ọdọhọde ete: “Nnyịn ida uko ke Abasi nnyịn ikwọrọ gospel Abasi inọ mbufo.” Ke ukem usụn̄ oro, Peter ye John ọkọrọ ye mme mbet eken ẹma ẹkeme nditan̄a eti mbụk uko uko. Ke ẹma ẹkesion̄o mmọ ke n̄kpọkọbi, Peter ye John ẹma ẹfiak ẹbịne ekemmọ mbet mmọ. Mmọ ẹma ẹben̄e Jehovah ke akam ẹte ọnọ mmimọ uko ye odudu ‘nditịn̄ ikọ esie ke ofụri uko.’ Abasi ama ọbọrọ akam oro ke ndondo oro ke ini ‘kpukpru mmọ ẹkeyọhọde ye Edisana Spirit, ẹnyụn̄ ẹtịn̄de ikọ Abasi uko uko.’—Utom 4:29, 31.
3 Ndiwụt Mbuọtidem ke Jehovah: Mme apostle ẹma ẹnyene mbuọtidem nte ke Jehovah ke ọkọnọ mmọ ibetedem. Kpukpru un̄wọn̄ọ ẹmi Jehovah akanamde ebe ke Ikọ esie ẹma ẹsu. Jesus Christ ama etie ubiọn̄ aban̄a mbon oro ẹkenyenede ndisu. Nte nnyịn imenyene ukem mbuọtidem oro nditan̄a eti mbụk uko uko? Ke adan̄aemi nnyịn mîtịn̄ke ikọ ke usem m̀mê ndikọk mbon udọn̄ọ, nnyịn nte ededi imenyene akpakịp uyarade ibetedem Jehovah. Ke ini nnyịn ikụtde edisu prọfesi Bible, nte esinụk nnyịn nditịn̄ eti mbụk Obio Ubọn̄ Abasi ye uko?
4 Nte ededi, ẹkpenyene ndidori enyịn nte ke utọ edikwọrọ ikọ ye uko oro oyosobo ubiọn̄ọ. (John 15:20) Ekedi ntre ye Jesus ye mme Christian akpa isua ikie. Edi emi ikakpanke mmọ m̀mê ndisụhọde udomo oro mmọ ẹkekwọrọde ikọ. Ke akpanikọ, utọ ubiọn̄ọ oro ama esiwak ndinọ mmọ mme ifet oro ẹkponide ẹkan ndisuan eti mbụk Obio Ubọn̄. (Utom 4:3, 8-13a) Ke ntak emi nnyịn nte mme Christian isọn̄ọde iyịre ye Ikọ Abasi ke mme akpan n̄kpọ, ẹsikot nnyịn ediwak ini ẹte inọ ntak kaban̄a idaha nnyịn. Nnyịn isida mme utọ idaha oro nte mme ifet nditan̄a eti mbụk uko uko. Ke ndinam ntre, nnyịn ikpebe Jesus Christ ye mme apostle esie.
5 Utom usiakusụn̄ unọ un̄wam esinọ nnyịn mme ifet nditan̄a eti mbụk. Ediwak owo ẹyenam utom usiakusụn̄ unọ un̄wam ke November. Nte mme idaha fo ẹyeyak fi esịn n̄wed eben̄e? Ebede ke ndisịn ukeme ndibuana ke utom usiakusụn̄ unọ un̄wam, nnyịn iwụt ke ibiet Paul ye Barnabas. Ke Utom 14:3 enye ọdọhọ ete ke “mmọ ẹtie do anyan ini ẹkwọrọ ikọ ye uko ke Ọbọn̄.” (Sịghisịghi ubọkn̄wed edi eke nnyịn.) Edieke nnyịn ikemede ndidep ifet nsio ke mme edinam eken inyụn̄ ibiat ke nsụhọde n̄kaha hour 60 ke an̄wautom ke ọfiọn̄ kiet, nte eyịghe mîdụhe edidiọn̄ nnyịn ọyọkọri.
6 Ndinyene uko ke utom ukwọrọikọ enen̄ede edi n̄kpọ un̄wam ke ini inọde mme magazine, mme editobo, ye mme n̄wed ukara Abasi eken. Mmọ ẹdọn̄ọ etop unyan̄a-uwem ẹkọn̄ọde ke Ikọ Abasi. Ntre ẹyak nnyịn ikûtre ndikwọrọ ikọ ye uko ke ndikpebe Uwụtn̄kpọ nnyịn, Jesus, ye mme apostle esie.