Wụt Ata Esịtekọm Ban̄a Mme N̄wed Nnyịn
1 Ẹda mme daimọn ye mme ọsọn̄urua itat eken ke akpan n̄kpọ ke ntak uyai mmọ ye nte enen̄erede ọsọn̄ urua ndiyom nnyụn̄ ndọk mmọ. (N̄ke 2:4) Ifiọk aban̄ade Jehovah ye Jesus Christ akam ọsọn̄ urua akan oro, ndien mme n̄wed nnyịn ẹdi n̄kukụre n̄wed ke ererimbot emi ẹdade ọniọn̄ Abasi ẹnam uwak n̄kpọ eke spirit emi ẹnen̄ede ẹn̄wan̄a. (Rome 11:33; Phil. 3:8) Didie ke nnyịn ikeme ndiwụt nte ke nnyịn imenen̄ede iwụt esịtekọm iban̄a mme n̄wed nnyịn?
2 Ediwak owo ye otu ubon ẹsisio mme etịbe ẹnịm kpukpru ini man ẹda ẹka Ufọkmbono Obio Ubọn̄ ẹnyụn̄ ẹkesịn ke kiet ke otu mme ekebe oro ẹdiande “Contributions for the Society’s Worldwide Work—Matthew 24:14.” Mme owo kiet kiet ẹsitịp mme etịbe efen efen kaban̄a utom ofụri ererimbot ke ini mmọ ẹbọde mme n̄wed m̀mê mme magazine ye ke ini mmọ ẹsịnde mme etịbe oro mmọ ẹbọde ke an̄wautom.
3 Usụn̄ efen ndiwụt esịtekọm edi ndisasat mme owo oro nnyịn inọde mme n̄wed ke ini isobode mmọ ke an̄wautom. Nnyịn ikpayakke ọsọn̄urua daimọn inọ ekpri eyen oro mîkemeke ndifiọk ufọn esie. Nnyịn inyụn̄ iyakke mme ọsọn̄urua n̄wed inọ mme owo oro mîwụtke esịtekọm iban̄a mme n̄kpọ eke spirit. (Men Mme Hebrew 12:16 domo.) Nnyịn ikpenyene ndiwụt mbufiọk ke nte inọde idem nnyịn ye mme n̄wed nnyịn ke ntatubọk. Nte enyeneufọk enyịme ndineme nneme? Nte enye akpan̄ utọn̄ ke ini nnyịn itịn̄de ikọ, ọbọrọ mme mbụme oro nnyịn ibụpde, onyụn̄ etiene ese itie Bible oro nnyịn ikotde? Edieke ẹwụtde utọ udọn̄ oro, nnyịn iyadara ndinọ n̄wed oro odotde. Ke ini nnyịn idade mme n̄wed nnyịn inịm ukpepn̄kpọ, emi esin̄wam mme owo ndifiọk se Bible ekpepde ndien emi esiberede usụn̄ ọnọ mmọ ndikọri itie ebuana ye Jehovah. Ndinyene ata ufọn nto mme n̄wed nnyịn ọkọn̄ọ ke nte ẹdade enye ẹnam n̄kpọ.
4 Nnyịn imekeme ndiwụt esịtekọm n̄ko ebe ke ndinọ mme n̄wed nnyịn ke kpukpru ifet oro ẹberede ke utom eke ufọk ke ufọk, ọkọrọ ye ke mme mfiakn̄ka ye ke mme ukpepn̄kpọ Bible. Asuanetop kiet kiet ekpenyene ndisịn ofụri ukeme ndimehe ye mme n̄wed m̀mê ediye uduot ekpri n̄wed ekededi oro ẹnọde ke ọfiọn̄. Ndida esisịt ini nnam ndomonse ke nte idinọde ekeme ndin̄wam nnyịn ndinen̄ede nnam nneme nnyịn esịne ufiop. Nen̄ede kere ban̄a akpan n̄wed oro afo okụtde nte etịmde enyene uforo ke efakutom mbufo. Mme utọ n̄wed nte n̄wed Ifiọk ye ediye uduot ekpri n̄wed Oyom ke ẹka iso ndinam utịbe utịbe utom ke esịt mme enyeneufọk. Mme tract n̄ko ẹdi ata n̄kpọ un̄wam.
5 Nen̄ede kere kpukpru ini ban̄a ibat n̄wed oro afo oyomde man ada ekenịm ke an̄wautom. Oyom eti ibuot. Ke adan̄aemi edide akpan n̄kpo afo ndinyene ibat n̄wed oro awakde ekem, akpan akpan edieke anamde utom usiakusụn̄, ufọn idụhe afo ndibọ ata ediwak n̄wed n̄kobon nnọ idemfo, koro emekeme ndibọ efen efen ke Ufọkmbono Obio Ubọn̄ mbemiso mme mbono esop ẹtọn̄ọde ye ke ini ẹsuanade. Bọ mme n̄wed ẹwak ekem ndikama ke ntọn̄ọ ntọn̄ọ ọfiọn̄ nnyụn̄ fiak bọ efen ke ini se ọkọbọde okụrede.
6 Mme n̄wed nnyịn ẹnen̄ede ẹnyene ufọn ke ini inọde mme owo oro ẹwụtde esịtekọm ẹban̄a akpanikọ Ikọ Abasi. Kpukpru nnyịn ikpakam inyene eti ibuot ye ọniọn̄ ke nte idade se ẹnọde nnyịn inam n̄kpọ, ke ntem iwụtde nte idade mme n̄wed nnyịn ke akpan n̄kpọ.