Ndise Mban̄a Mme Udọn̄ eke Spirit Mbon Inan
1 Ata ediwak mbon inan ke ẹsịk ẹkpere Eti Ekpemerọn̄ ẹnyụn̄ ẹdinyene itie ebuana oro ẹyakde idem ẹnọ Jehovah Abasi. (John 10:3, 11) Ana mbon eken ke esop, akpan akpan mbiowo, ẹdu ke edidemede kaban̄a mme udọn̄ eke spirit nditọete nnyịn iren ye iban ẹdide inan.
2 Ndiyụhọ Mme Udọn̄ Mbon Inan: Ke ẹnam ndutịm ndisikabade mme mbonoesop nsịn ke usem idiọn̄ọ ke ebiet ekededi emi mme akabade ikọ oro ẹdotde ẹdude. Edieke owo ndomokiet ke esop mîfiọkke usem idiọn̄ọ, ekeme ndidot nditeme mbon inan ndika n̄kpet n̄kpet esop oro ẹkemede ndinam utom emi. Nte ededi, edieke utọ ndutịm oro mîdụhe ke ofụri n̄kann̄kụk mbufo, mme asuanetop oro ẹmekde ẹkeme ndisitie n̄kpere mbon inan ke adiana ke adiana ẹnyụn̄ ẹbuana n̄wetnnịm n̄kpọ ye mmọ ke mme akpan n̄kpọ oro ẹnemede.
3 Mme Ndutịm Circuit ye eke Esop: Esenyịn circuit anam ndutịm aban̄a edikabade usem idiọn̄ọ ke mbono circuit ye ke mme usen akpan mbono. Ẹkeme ndimek ebiowo m̀mê asan̄autom unamutom oro odotde nte anam ndutịm. Ẹkeme ndinam nditọete iren ye iban oro ẹdotde ẹmi ẹnịmde nti uwụtn̄kpọ ẹbuana ke ndikabade edinam mbono. Ẹkeme nditiene ukem edumbet oro ke esop, ẹkụtde ẹte ke ẹse ẹban̄a mme udọn̄ mbon inan nte odotde.
4 Ọkpọfọn mbon inan nditie ke ebiet emi mmọ ẹkemede ndikụt akabade ikọ ye mbot utịn̄ikọ ke ukem ini oro. Emi edi ntre ke esop ye ke mme mbono circuit. Ọkpọfọn mme akabade ikọ ẹtetie ke mme mbonoesop edieke ibat mbon inan ẹmi ẹdụkde mîwakke. Mbiowo ẹyenam ọfọn ndisobo ye eyenete eren edide inan emi ọkọride osịm ọyọhọ idaha, edieke ẹkemede, ndibụp mban̄a mme akpan ekikere kaban̄a ndutịm oro odotde nte ẹkpetiede.
5 Edieke anam idiọn̄ọ oro odotde anamde utom nte ebiowo m̀mê asan̄autom unamutom odude ndien ibat nditọete iren ye iban ẹdide mbon inan oyomde oro, mbiowo ẹkeme ndibiere ke ẹkpenyene ndinịm ndusụk mbonoesop ofụri ofụri ke usem idiọn̄ọ. Ukpepn̄kpọ N̄wedesop ekeme ndidi akpa mbonoesop eke urua ke urua emi ẹdiomide ke usụn̄ emi. Edieke esop edimade ndinịm mbonoesop en̄wen eke urua ke urua ekededi ke usem idiọn̄ọ (m̀mê ke usem en̄wen ekededi emi mîdịghe Ikọmbakara), mbiowo ẹkpenyene nditọt N̄ka mban̄a udọn̄ mmọ. Ẹkpenyene ndifiọk nte ke Usem Idiọn̄ọ Mbon America edi usem oro ata ediwak ikpọ owo ẹdide mbon inan ẹmekde ke idụt emi.
6 Okposụkedi edinyene nneme ke ufọt mbon inan ye mbon ẹmi ẹkopde n̄kpọ ekemede ndiyom san̄asan̄a ukeme nto edem mbiba, kpukpru mme andibuana ke esop ẹkpenyene ndidomo ndimehe ye kiet eken man otodo ẹkeme ndinọ kiet eken ata nsịnudọn̄. (Heb. 10:24) Edu emi ke otu nditọete eyenam kpukpru mbufa owo ẹkere ke ẹdara mmimọ.