Ndida Obufa Ediye Uduot Ekpri N̄wed Nnam N̄kpọ Uforo Uforo
1 Ke mbono district nnyịn eke ndondo mi, nnyịn ima inen̄ede ikop inemesịt ndibọ obufa ediye uduot ekpri n̄wed oro ke Ini Owo Oro Afo Amade Akpade. Enye ekpenyene ndidemede udọn̄ mme owo ke kpukpru idaha ke uwem, sia edide ata ediwak owo ẹfụhọ ẹban̄a editaba owo ima. Ndiye uduot ndise ye mme mbuwed esie ẹkpenyene ndinam edi mmemmem ndinịm enye. Ke page 29 ndyọ ndyọ mbuwed Lazarus oro ẹnamde set ke n̄kpa owụt nte Jesus enyenede “ọkpọsọn̄ udọn̄ . .. ndibiat odudu n̄kpa mfep.” Udiana page oro ọyọhọde ye ndise owụt idara idara idaha ediset ke n̄kpa ke obufa ererimbot. Emi edinọ mbon oro ẹfụhọde ndọn̄esịt didie ntem!
2 Ediye uduot ekpri n̄wed emi ekeme ndidi akamba n̄kpọ un̄wam ke ndinọ mbon oro owo mmọ akpade ndọn̄esịt. Ẹtịm enye ẹnọ edida nnyene nneme. Mme mbụme ndida nnam mme akpan n̄kpọ ẹwọrọ ẹda ẹdu ke ekebe ke utịt Ikpehe kiet kiet utu ke ndidu ke idak page kiet kiet. Afo emekeme ndida “Mme Mbụme Ndikere Mban̄a” ẹmi nnam n̄kpọ ke usụn̄ ekededi oro afo ekerede ke eyenen̄ede enyene ufọn ọnọ eyen ukpepn̄kpọ fo.
3 Ke ini anamde mme ediwaha, sasat mme akpan n̄kpọ oro enemede ke se idude ke ediye uduot ekpri n̄wed emi. Afo emekeme ndikere ke eyedot ndiwụt se isịnede ke page 2 nyụn̄ dọhọ enyeneufọk emek enyeoro enye amade. Sọp ndifiọk se owo kiet kiet oyomde. Yak enye etịn̄ mme ntụk esie, ndien ekem wụt nte ediye uduot ekpri n̄wed emi ọnọde ndọn̄esịt. Kpukpru ikpehe eneme ediwak itien̄wed Bible oro ẹnọde isọn̄ kaban̄a idotenyịn nnyịn.
4 Ekpri ibuotikọ oro ke page 5, “Ata Idotenyịn Odu,” osio ndọn̄esịt emi ọnọde idotenyịn oro ọkọn̄ọde ke Bible kaban̄a mme akpan̄kpa owụt. Emi ekpenyene ndidemede udọn nnọ edineme mban̄a “Ata Idotenyịn Mme Akpan̄kpa,” emi odude ke page 26-31. Ekebe oro odude ke page 27 ọnọ “Mme Itien̄wed Oro Ẹnọde Ndọn̄esịt” efen efen. Enyeneufọk oro ofụhọde eyesọsọp okụt ete ke Jehovah enen̄ede edi “Abasi kpukpru ndọn̄esịt.”—2 Cor. 1:3-7.
5 Ke usụn̄ oro owụtde usọ, mme ikpehe oro ẹsịnede ke ufọt ẹneme nsio nsio usụn̄ oro ẹsinamde n̄kpọ ẹban̄a n̄kpa owo ima. Mmọ ẹwụt nte ẹkpeyọde mfụhọ ye nte mmọ en̄wen ẹkemede ndin̄wam ke mme utọ mfụhọ mfụhọ ini oro. Ekebe odu ke page 25 emi ibuotikọ edide “Ndin̄wam Nditọwọn̄ Ẹyọ N̄kpa.” Emi ekpenyene ndidi ata n̄kpọ un̄wam ọnọ mme ete ye eka oro ẹnyenede ndiyọ mfịna emi.
6 Nyene n̄wed emi efen efen, nyụn̄ da enye nọ ikọ ntiense ido nneme. Afo emekeme ndika n̄kese mbon oro owo mmọ akpade ke efakutom mbufo man ese m̀mê mmọ ẹyema ndinyene n̄wed emi. Mîdịghe afo ke usọ emekeme ndisan̄a n̄kpere mbon oro ẹfụhọde ke mme udi ke ini oro mmọ ẹtode edika n̄kese udi owo ima mmọ ẹnyọn̄.
7 Nnyịn imokop idatesịt nte ke Jehovah edi Abasi “emi ọdọn̄de mbon nsụkidem esịt.” (2 Cor. 7:6) Nnyịn ida nte ke edi ifet nnyịn ndinyene ebuana ke ‘ndidọn̄ mme atua-eyet ẹmi esịt.’—Isa. 61:2.