Ekese Odu Ndinam Kpukpru Ini
1 Ikọt Jehovah ẹdi mme owo oro ẹyọhọde ye utom. Nnyịn imenyene ediwak mbiomo ke ubon nnyịn, itieutom, ye ufọkn̄wed. Ndien ke akande kpukpru, ‘ekese odu ndinam ke utom Ọbọn̄’ kpukpru ini. (1 Cor. 15:58, NW) Ana nnyịn itịm idem inọ inyụn̄ idụk mme mbonoesop eke urua ke urua. Ẹsịn udọn̄ ẹnọ nnyịn ẹte ikûyak urua ndomokiet ebe ye unana edibuana ke utom ukwọrọikọ. Ana ẹsio ini oro ekemde ẹnịm san̄asan̄a kpukpru ini ẹnọ ukpepn̄kpọ Bible idemowo ye eke ubon. Mbiowo ye mme asan̄autom unamutom ẹnyene ediwak utom ndinam ke esop. Ndusụk ini ẹsidọhọ nnyịn in̄wam mbon oro ẹdude ke unana.
2 Ke ini ke ini, ndusụk nnyịn imekeme ndikop mfịghe nto ediwak n̄kpọ oro nnyịn inyenede ndinam. Edi, mbon oro ẹnyenede ekese ndinam ẹkan ẹkeme ndidu ke otu mbon oro ẹkopde inemesịt ẹkan edieke ẹmụmde edida ukem ukem ye eti idaha ekikere ẹkama—Eccl. 3:12,13.
3 Apostle Paul ekedi owo emi ekenyenede ekese ndinam. Ke adan̄aemi ekesede aban̄a mme ọkpọkpọ udọn̄ idemesie ebe ke ndinam utom nte anam ufọkọfọn̄, enye ama anam utom okponde akan eke mme apostle eken. Enye ama anam utom nte ọkwọrọikọ ye unana edikpa mba, ọkwọrọde ikọ an̄wan̄wa ye ke ufọk ke ufọk, ke adan̄aemi mîfụmike mme mbiomo esie nte andikpeme udịmerọn̄. (Utom 20:20, 21, 31, 34, 35) Kpa ye ndutịm esie oro ọkọyọhọde ye utom, Paul kpukpru ini ama enyene udọn̄ ndinam n̄kpọ efen efen ke utom Jehovah.—Men N̄wed Mbon Rome 1:13-15 domo.
4 Paul ama omụm edida ukem ukem ye inemesịt esie akama ebe ke ndiberi edem ke Jehovah kaban̄a ukeme. Enye ama okụt utom esie nte akamade utịp onyụn̄ ọnọde uyụhọ. (Phil. 4:13) Enye ama ọfiọk ete ke Abasi idifreke utom imọ. (Heb. 6:10) Idatesịt edin̄wam mbon en̄wen ẹfiọk Jehovah ama ọnọ enye odudu. (1 Thess. 2:19, 20) Nsọn̄ọ oro enye ekenyenede nte ke idotenyịn imọ oro ọkọn̄ọde ke Bible eyesu ama onụk enye ndisịn ifịk.—Heb. 6:11.
5 Nnyịn n̄ko ikpenyene ndikere mban̄a nti utịp oro ẹsụn̄ọde ẹto utom nnyịn. Nnyịn ndidụk nnyụn̄ mbuana ke mme mbonoesop eke urua ke urua an̄wam ndisọn̄ọ mmọ en̄wen idem nnyụn̄ nsịn udọn̄ nnọ mmọ. (Heb. 10:24, 25) Ukeme ofụri esịt nnyịn ndida eti mbụk nsọk kpukpru owo otịp esịn ke n̄kọri esop nte inamde mme owo ẹkọri udọn̄, mbufa owo ẹnyụn̄ ẹdụkde ẹdibuana ye nnyịn. (John 15:8) Ndin̄wam mmọ oro ẹdude ke unana esịn udọn̄ ọnọ edu edidianakiet oro ebietde eke ubon ke esịt esop. (Jas. 1:27) N̄ko-n̄ko, ukem nte Paul, nnyịn ikpedehede ifre ite ke ndisịn idem ke mme utom oro ẹnọde utịp edi se inemde Jehovah Abasi esịt. Nnyịn ibat ite ke edi akamba ifet ndinam utom esie. Idụhe usụn̄ uwem oro ọfọnde akan emi ọnọ nnyịn!
6 Ufọn efen efen odu ke ndiyọhọ ye utom. Ke ini nnyịn isịnde idem ke mme nti edinam eke spirit, esitie nte ke ini ebe usọp usọp. Ndifiọk nte ke usen kiet kiet oro ebede ada nnyịn asan̄a ekpere obufa ererimbot, nnyịn ye idatesịt imonyịme uwem oro idude idahaemi oro ọyọhọde ye utom. Nnyịn n̄ko imokụt ọniọn̄ oro odude ke ndiyọhọ ye utom, sia nnyịn mînyeneke ini ndisịn idem ke ikpîkpu n̄kpọ ererimbot.—Eph. 5:15,16.
7 Ke akpanikọ, ekese n̄kpọ odu ndinam ke utom Ọbọn̄. Edi nnyịn idikeme ndikaiso n̄kop inemesịt edieke nnyịn ikade iso ndiberi edem ke Jehovah Abasi ye Jesus Christ, ẹmi ẹnamde utom nnyịn edi se inọde nduọkodudu ye utịp.—Matt. 11:28-30; 1 John 5:3.