Ndibọ Ufọn Nto Mme Utịn̄ikọ An̄wa Oro Ẹfiakde Ẹwet
1 Ẹnam mbụk Mme Ntiense Jehovah eyomfịn an̄wan̄a nnennen nnennen ke mme ikọ eke Mme N̄ke 4:18: “Usụn̄ nti owo ebiet un̄wana eke asiahade, akaiso ayama, tutu osịm ufọt uwemeyo.”
2 Ke n̄kemuyo ye emi, esop Christian akaiso ndibọ ekemini edinam an̄wan̄a ye ntọt eke idahaemi ẹkọn̄ọde ke mme ukpepn̄kpọ Bible. (Matt. 24:45-47) Anaedi afo emekeme ndisiak mme uwụtn̄kpọ kaban̄a emi oro afo okụtde tọn̄ọ nte afo ọkọtọn̄ọ ndibuana ye Mme Ntiense Jehovah. Mme mbonoesop, ẹsịnede mme utịn̄ikọ an̄wa, ẹn̄wam nnyịn ndisan̄a ikpat kiet ye n̄kaiso un̄wana akpanikọ.
3 Mme N̄wed Utịn̄ikọ Oro Ẹfiakde Ẹwet: Ke ndondo emi, N̄ka anam ediwak n̄wed utịn̄ikọ ekem ye ifiọk idahaemi. Ẹdian mbufa n̄kpọ ke mmọ, ẹnyụn̄ ẹnam mme akpan n̄kpọ ẹn̄wan̄a. Edieke anade esop ọbọ ufọn ọyọhọ ọyọhọ oto mme ntọt ẹmi ẹkemde ye eke idahaemi mi, nditọete oro ẹnọde utịn̄ikọ ẹkpenyene ndikama mme n̄wed utịn̄ikọ eke ata ndondo emi kpọt.
4 Man ọbọ n̄kponn̄kan ufọn oto mme utịn̄ikọ an̄wa, kere ban̄a mme ibuotikọ utịn̄ikọ oro ẹdinọde. Mbemiso odụkde An̄wan̄wa Mbonoesop, domo nditi akpatre n̄kpọ oro okokopde oto mme uwetn̄kpọ ukara Abasi ke ibuotikọ oro. Ekem, ke adan̄aemi akpan̄de utọn̄, kere nte ẹtatde ntọt emi. Tịmfiọk mbufa usụn̄ ekededi oro ẹnemede akpanikọ emi man akpada anam n̄kpọ ke ini iso. Emi eyenọ nsọn̄ọ nte ke afo ọyọbọ n̄kponn̄kan ufọn oto mme utịn̄ikọ an̄wa oro ẹfiakde ẹwet.
5 Mme Utịn̄ikọ An̄wa Ẹkpenyene Ndisịne Ntọt Ẹnyụn̄ Ẹnụk Mme Andikop Ẹnam N̄kpọ: Ke ini Jesus ekesitịn̄de ikọ, enye ama esisịm esịt mme andikpan̄ utọn̄ nnọ enye. Ke utịt Ukwọrọikọ Jesus oro ke Obot, kpa ọwọrọetop n̄kan utịn̄ikọ oro akanam ẹnọde, Matthew 7:28 obụk ete: “N̄kpaidem omụm ediwak owo oro aban̄a ukpepn̄kpọ Esie.”
6 Ke ẹnyenede uwụtn̄kpọ Jesus ke ekikere, mme otu mbiowo ẹkpenyene ndida mbufiọk nnọ mbufa mme etịn̄ikọ an̄wa unyịme, ẹnọde nditọete oro ẹdide nti mme ọnọ ukpep kpọt, ẹmi ẹdisọn̄ọde ẹyịre ke n̄wed utịn̄ikọ N̄ka ketket, ẹmi ẹnyụn̄ ẹkemede ndimụm n̄kpan̄utọn̄ otuowo. Nditọete oro ẹnọde ifet ndidi mme ọnọ utịn̄ikọ an̄wa ẹkpenyene ndikaiso ndomo ndifori ukeme utịn̄ikọ mmọ, ẹnyịmede item ye mme ekikere ekededi oro mbiowo ẹnọde.
7 Nte ẹkebemde iso ẹtịn̄ ke Isaiah 65:13, 14, uforo eke spirit ikọt Abasi ke akaiso ndiwọrọ n̄wụt idem. Ndutịm utịn̄ikọ an̄wa edi kiet ke otu ediwak usụn̄ oro ‘Jehovah etemede’ nnyịn.—Isa. 54:13.