Ekemini Mbụk Obio Ubọn̄ Oro Ẹdisuande ke Ofụri Idụt Emi
1 Ke Sunday, October 1, 1995, etieibuot okpokoro eyesio edemede owo ekikere Mbụk Obio Ubọn̄ oro enyenede page inan̄, ẹkotde “Ntak Emi Uwem Ọyọhọde Ntem ye Mme Mfịna? Nte Paradise Oro Afanikọn̄ Mîdụhe Ekeme Ndidu?” ke utịt utịn̄ikọ an̄wa. Ẹyesuan ekemini etop oro enye akamade ke ofụri idụt emi ke ufan̄ urua ita ọtọn̄ọde ke October 1 osịm 22.
2 Ke ofụri ikpehe ererimbot, mme owo ke ẹkop editịmede esịt. Inamke n̄kpọ m̀mê mmọ ẹdụn̄ ke m̀mọ̀n̄, mme mfịna ẹnọmọ mmọ. Mbụk Obio Ubọn̄ emi edidi ata n̄kpọ udọn̄ ọnọ mbon oro ẹnen̄erede ẹkere ẹban̄a se itịbede, sia enye edidụride ntịn̄enyịn mmọ owụt Ikọ Abasi nte edide itie ndausụn̄ emi mînyeneke ndudue nnọ owo. (Ps. 119:105) Kpukpru nnyịn imodori enyịn ndinyene idem Mbụk Obio Ubọn̄ emi kiet ke ini ẹdisiode enye ke October 1, 1995, ke mme usem ẹmi: Efịk, Hausa, Igala, Igbo, Ikọmbakara, Tiv, ye Yoruba. Kan̄a kemi, ekese odu ndinam ke nditịm idem nnọ ntatara ubịnikọt urua ita emi.
3 Sịn Udọn̄ nọ Kpukpru Owo Ndibuana Ifịk Ifịk: Anie ekeme ndibuana ke utom emi? Ke akpanikọ kpukpru owo oro ẹma ẹkededi mme asuanetop ẹyenyene ọkpọsọn̄ udọn̄ ndinam ntre! Nso kaban̄a nditọ ukpepn̄kpọ Bible oro ẹsidụkde mme mbonoesop kpukpru ini? Ndusụk mmọ ẹmebuana ye nnyịn ke anyanini ndien ke ẹnam n̄kọri oro enyenede iwụk. Edieke edide mmọ ẹnam uwem mmọ ekekem ye mme edumbet N̄wed Abasi, nte mmọ ẹdot ndidi se ẹbatde nte mme anditan̄a Obio Ubọn̄? Asuanetop oro esinịmde ukpepn̄kpọ Bible oro ekeme ndineme n̄kpọ emi ye eyen ukpepn̄kpọ oro, ndien edieke eyen ukpepn̄kpọ oro enyenede udọn̄ ndibuana ke an̄wautom, mbiowo iba ẹyedụn̄ọde se idude ke page 98 ye 99 ke n̄wed Organized to Accomplish Our Ministry ye enye. Ẹkpenyene ndinam emi usọp usọp nte ẹkekeme man mbon oro ẹdotde nte mme asuanetop oro mînaha baptism ẹkpebuana ọyọhọ ọyọhọ ke ubịnikọt emi. Ẹkeme ndisụk nsịn udọn̄ nnọ nditọ ukpepn̄kpọ Bible oro mîdotke kan̄a ndidi se ẹbatde nte mme asuanetop oro mînaha baptism ndibuana ekemini Mbụk Obio Ubọn̄ emi ye mme ọdiọn̄ọ m̀mê mbonubon mmọ.—Se Enyọn̄-Ukpeme, November 15, 1988, page 17, ikpehe ekikere 8.
4 Utom emi isọn̄ke; kpukpru owo ẹkeme nditiene mbuana. Mme ete ye eka ẹkeme ndibuan ikpehe edinam mme ndomonse ye Mbụk Obio Ubọn̄ emi nte ubak ukpepn̄kpọ Bible ubon eke urua ke urua man kpukpru mbonubon ẹkpetịm idem ndinọ enye ke ufọk ke ufọk. Mmemmem utịn̄ikọ ẹsiwak ndidi se ifọnde ikan. Ke ama eketịn̄ owo emi afo edide ibio ibio, nọ enyeneufọk Mbụk Obio Ubọn̄ emi nyụn̄ sịn udọn̄ nọ enye ndikot. Ke ini mme enyeneufọk ẹwụtde udọn̄, wet n̄kpọ nịm man akpafiak aka akanam udọn̄ oro ọkọri. (1 Cor. 3:6, 7) Ukpọhọde edikụt unen edi edinyene mmemmem utịn̄ikọ oro ẹtịmde mfọn mfọn.
5 ‘Ekese ẹyedu ndinam’ ke October. Ke esịne-esịt nsiondi Utom Obio Ubọn̄ Nnyịn emi, ẹnọ ntọt efen efen ke ibuotikọ oro ọdọhọde ‘Ekese Odu Ndinam ke Utom Ọbọn̄.’ Ẹdineme emi urua efen ke Esoputom.—1 Cor. 15:58, NW.