‘Ekese Odu Ndinam ke Utom Ọbọn̄’

¹ Nnyịn ke akpanikọ imenyene ekese utom ukara Abasi emi idoride enyịn ndinam ke October! Akpan n̄kpọ eke mbonoesop ke October 1, ke ẹma ẹkekụre utịn̄ikọ an̄wa, edidi etieibuot okpokoro ndisio ekemini Mbụk Obio Ubọn̄ Nọ. 34 enyenede page inan̄ emi ẹdisuande ntatara ntatara ọtọn̄ọde ke October 1 osịm 22. Nte afo unyịmeke nte ke ‘ekese eyedu ndinam ke utom Ọbọn̄’ ke ọfiọn̄ emi?—1 Cor. 15:58, NW.

² San̄asan̄a Mbụk Obio Ubọn̄ Oro Ẹdisiode: Ẹyenọ Mbụk Obio Ubọn̄ ẹmi ẹsọk esop kiet kiet. Ẹkpenyene ndinịm mme katọn oro Mbụk Obio Ubọn̄ ọdọn̄ọde ke eti itie ndien owo ikpenyeneke ndikụbọde tutu osịm utịt edinam ke October 1. Ke ini oro Mbụk Obio Ubọn̄ ẹmi ẹyedu ndideme nnọ nditọete ye mbon an̄wa. Ke utịt ndutịm mbonoesop, mbono circuit, m̀mê usen akpan mbono ke October 1, mbon oro ẹdude ẹyebọ enye idem kiet kiet ke owo man mmọ ẹmehe ye se isịnede ke enye ẹnyụn̄ ẹtịm idem ndisuan enye.

³ Mbiowo Ẹyenyene Ekese Ndinam: Ke ntọn̄ọ ntọn̄ọ ọfiọn̄ emi otu mbiowo ẹkpenyene ndisop idem man ẹneme n̄kpọ ọyọhọ ọyọhọ ẹban̄a san̄asan̄a ubịnikọt emi. Mme esop ẹkpenyene ndidomo ndikụre kpukpru efakutom mmọ. Mbemiso utịt ubịnikọt emi, sịn san̄asan̄a ukeme ndinam utom ke mme efakutom oro owo mîkokụreke ke ọfiọn̄ itiokiet ẹmi ẹkebede. Ke ikerede iban̄a nte utom emi edide akpan n̄kpọ, nnyịn iyoyom ndisio ini oro okponde ekem nte ikekeme nnịm nnọ utom ukwọrọikọ. Eyịghe idụhe nte ke mme asuanetop ẹyesịn enyịn̄ nte mme asiakusụn̄ unọ un̄wam ẹwak ẹkan nte esidide. Enen̄ede etie nte ke ediwak nditọ ukpepn̄kpọ Bible ẹyediana ye nnyịn n̄ko nte mbufa mme asuanetop oro mînaha baptism ẹmi ẹnọde unyịme. Nso ini idatesịt ke nnyịn idinyene ntem nte nnyịn inamde utom ọtọkiet ke utom Ọbọn̄!

⁴ Mme ada Ukpepn̄kpọ N̄wedesop ẹkpenyene ndinam nti ndutịm nnọ unọ ikọ ntiense otu ke mme Saturday ye mme Sunday. Ẹkpenyene ndisịn udọn̄ nnọ kpukpru owo ndibuana ifịk ifịk. Adianade ye utom utịturua, ẹkpenyene ndidiomi unọ ikọ ntiense mbubịteyo ke nsụhọde n̄kaha ini kiet ke urua ke ini ubịnikọt emi. Ndusụk owo ẹkeme ndima ndisop idem nnọ an̄wautom ke n̄wed ama akasuana man ọnọ nditọ ufọkn̄wed ẹmi ẹdimade ndinyene ebuana efen efen ufan̄.

⁵ Ẹkpenyene ndidiomi mme mbono an̄wautom man mme asuanetop ye mme asiakusụn̄ ẹkeme ndibabak ntọn̄ọ utom ukwọrọikọ ke usen kiet kiet. Mme mbono ẹmi ẹkpenyene ndidi mbio mbio. Kiet kiet ekpenyene ndiwụt mmemmem usụn̄ nte ẹnọde Mbụk Obio Ubọn̄. Mme mbono an̄wautom uwemeyo ẹkeme ndisịne ekikere kiet m̀mê iba ẹban̄ade edinam mme mfiakn̄ka nnọ mbon oro ẹkebọde Mbụk Obio Ubọn̄. Nte ededi, ndusụk asuanetop ẹkeme ndimek ndibuana ke usuan n̄wed emi ke usenubọk ye uwemeyo. Ke ntak oro, esenyịn utom ekpenyene ndikụt nte ke efakutom ekemde odu. Ẹkpenyene ndiwet enyịn̄ ye adres kpukpru owo oro ẹwụtde udọn̄ ke n̄wetnnịm n̄kpọ eke ufọk ke ufọk. Ẹkeme ndisịn mme akpan n̄kpọ eke ibio ibio nneme oro ke ikpehe oro ẹnịmde ẹnọ ediwet se ẹkụtde. Emi eyeberede usụn̄ ọnọ mfiakn̄ka nte ini akade ke urua m̀mê ọfiọn̄ oro.

⁶ Edieke esop kiet an̄wamde efen ndikụre efakutom esie, ẹkpenyene ndiyak enyịn̄ ye adres mme owo oro ẹnyenede udọn̄ nnọ esop emi enyenede efakutom oro.

⁷ Mme ete ye eka, nte nditọ mbufo ke ẹsịn ukeme ndikabade ndi mme asuanetop oro mînaha baptism? Ẹmekụt ẹte ke ndusụk esop, nditọwọn̄ oro ẹdude eti uwem ẹsisan̄a ye mme ete ye eka mmọ oro ẹma ẹkeyak idem ẹnọ ke utom ukwọrọikọ ke ediwak isua, nditọ ẹmi ẹsinyụn̄ ẹnam ọfọn, okposụkedi mmọ mîdịghe kan̄a mme asuanetop eti mbụk. Mme ete ye eka ẹkpenyene ndise m̀mê nditọ mmọ ẹnen̄ede ẹdot kaban̄a ifetutom emi. Mbiowo iba ẹkeme ndineme kpukpru n̄kpọ ye ibuotufọk nnyụn̄ mbiere m̀mê eyen oro odot se ẹbatde nte asuanetop oro mînaha baptism.—om-E p. 99-100.

⁸ Nte odu asuanetop ekededi ke efakutom mbufo oro mîsịnke ifịk aba ke ndiwa uwa ekọm nnọ Jehovah? (Heb. 13:15) Ekeme ndidi unana nsịnudọn̄ m̀mê ekikere uwem akan ndusụk mmọ oro ẹdide mbon ẹmi mînamke utom aba ubọk, okposụkedi ẹkade iso ẹmụm mme idaha ido uwem Bible ẹkama. Ufan ufan edika oro ebiowo kiet akade ekese ekeme ndinụk mmọ ẹfiak ẹdibuana kpukpru ini ye esop ndien, ke ekemini, ẹfiak ẹtọn̄ọ ndinam utom ukwọrọikọ.

⁹ Kpukpru Owo Ẹmi Ẹdotde Ẹkeme Ndibuana ke Inem Inem Utom Emi: Nte esisọn̄ ndusụk mbufo nditọwọn̄ m̀mê n̄kparawa owo ndibuana ke utom ukwọrọikọ eke ufọk ke ufọk? Nso kaban̄a mbufo mbufa owo ẹmi ifiọk oro ẹnyenede ke utom ukwọrọikọ edide ata esisịt? Mbufo ẹyekụt ẹte ke ndida san̄asan̄a Mbụk Obio Ubọn̄ ẹmi nnam utom edi ata inem inem n̄kpọ! Mmemmem nneme edi n̄kukụre se ẹyomde.

Afo emekeme nditịn̄ n̄kpọ ebietde emi:

◼ “Ọfiọn̄ emi n̄kpọ nte mbon unyịmesịt 190,000 ke ẹsuan akpan etop ke ediwak usem ke Nigeria. Edisuan akpan etop emi ke akaiso ke ofụri ererimbot. Ẹtịm enye ẹnọ mme owo ẹmi ẹdimade ndikụt nte kpukpru mfịna oro nnyịn isobode mfịn ẹtrede. Ọkpọkpọ okwo edi emi.”

Mîdịghe afo emekeme ndidomo emi nse:

◼ “Nnyịn isịn udọn̄ inọ kpukpru owo ẹkot akpan mbụk emi ẹkotde [kot ibuotikọ Mbụk Obio Ubọn̄]. Tịmfiọk se enye ọdọhọde mi ke page 2 kaban̄a editọt mme mfịna . . . [kot udịmikọ oro asatde-sat oto Mbụk Obio Ubọn̄]. Nnyịn imonịm ke afo eyedara ndikot nsụhọ ekemini etop emi. Okwo edi emi.”

¹⁰ Nyene ọkpọkpọ udọn̄ ke idem owo kiet kiet oro ọbọde Mbụk Obio Ubọn̄. Tịn̄ ikọ sụn̄sụn̄ ye in̄wan̄în̄wan̄; ufọn idụhe ndineme nneme fo itọk itọk. Iyom ndikụre efakutom nnyịn mfọn mfọn nnyụn̄ n̄kụt nte ke ẹnọ kpukpru owo oro ẹwụtde udọn̄ ọkpọkpọ Mbụk Obio Ubọn̄ ndikot. Ke ini owo mîdụhe ke ufọk, tịn̄ enyịn nịm idiọn̄ọ ke n̄wetnnịm n̄kpọ eke ufọk ke ufọk fo man akpafiak aka ke ini oro odotde man ọkọnọ enyeneufọk oro Mbụk Obio Ubọn̄. Ẹkeme ndikama Mbụk Obio Ubọn̄ emi ke unọ ikọ ntiense efak ke ini owo owụtde udọn̄ ndikot n̄wed emi. Owo ikpenyeneke ndinọ mmọ ye unana edisat-sat owo nte n̄kpọ eke ẹdọhọde ke mmọ ẹdi n̄wedikot. Utu ke oro, san̄a kpere mme owo oro ẹsan̄ade ẹbe, nyụn̄ nam ufọn etop emi ẹnọde mi an̄wan̄a. Kama Mbụk Obio Ubọn̄ ke unọ ikọ ntiense ido nneme, utọ nte ke adan̄aemi akade isan̄ m̀mê ke ini ọnọde ekemmọ nsan̄autom ikọ ntiense ke ini nduọkodudu uwemeyo. Mbon oro ẹkụkde ẹdọn̄ ke ufọk m̀mê oro ke ntak udọn̄ọ ẹdude ke ufọk ẹkeme ndinọ isenowo, mme dọkta ye mme nurse, mme anyamn̄kpọ, ye mbon efen oro ẹdide ufọk mmọ.

¹¹ Mfiakn̄ka ifan̄ ke afo edinam ke ini ubịnikọt emi? Eyịghe idụhe ẹyewak, sia ẹnyenede ndifiak n̄kese kpukpru mbon oro ẹkewụtde udọn̄ ke Mbụk Obio Ubọn̄. Ke akpa ediwaha, edi mfọnn̄kan n̄kpọ ndinọ Mbụk Obio Ubọn̄ ikpọn̄. Ekem, ke ini afiakde aka, tịn̄ ikọ ifan̄ ban̄a nte etop emi odude ke Mbụk Obio Ubọn̄ edide ekemini. Nen̄ede nọ n̄kpan̄utọn̄ ke ini enyeneufọk etịn̄de ekikere esie ke se enye okokotde. Ikọ esie eyen̄wam fi ndidiọn̄ọ se edinọde ke mme nsiondi magazine ndondo emi ye ndusụk nte editịmde idem ọnọ n̄kaiso nneme. Edieke ẹkenọde eti n̄kpan̄uton̄ ke mfiakn̄ka, domo nditọn̄ọ ukpepn̄kpọ Bible.—1 Cor. 3:6, 7.

¹² ‘Utom Mbufo Idịghe ke Ikpîkpu’: Nte eyedot ẹnam kpukpru utom emi? Paul ama ọsọn̄ọ ọnọ mbon Corinth ete: ‘Utom mbufo idịghe ke ikpîkpu ke ebuana ye Ọbọn̄.’ (1 Cor. 15:58, NW) Ke ediwak isua ẹmi ẹkebede, ẹma ẹdiọn̄ ukeme oro nnyịn isịnde ndisuan Mbụk Obio Ubọn̄ akamba akamba. Ebe ye n̄wan ẹmi ẹkewọrọde ẹkedụn̄ ke ufọk kiet oro akanade ukpọk ẹma ẹkụt akani Mbụk Obio Ubọn̄ kiet ke drọwa. Enye ekedi n̄kukụre n̄kpọ oro ẹkeyakde ẹnịm ke ofụri ufọk oro. Ke ẹma ẹkekot enye, mmọ ẹma ẹka esop n̄kann̄kụk ẹnyụn̄ ẹkeben̄e ukpepn̄kpọ Bible. Mmọ ẹma ẹtọn̄ọ ndidụk kpukpru mbonoesop ndien ekem ẹdọhọ ke imọn̄ ina baptism. Iso-ọfọn idem kiet oro afo onịmde eyeda ukem utịp oro edi!—se Awake!, November 8, 1976, page 15.

¹³ Nnyịn imenyene akamba utom oro anade nnyịn ke iso. Utịtmbuba nnyịn edi esop kiet kiet ndikụre efakutom esie etisịm October 22 m̀mê etisịm utịt ọfiọn̄ oro edieke oyomde ẹnam ini edisuan Mbụk Obio Ubọn̄ emi ọniọn̄. Ẹtịm se ẹnọde ẹdi man asiakusụn̄ ofụri ini ye eke unọ un̄wam kiet kiet ọkpọbọ idem Mbụk Obio Ubọn̄ 250. Asuanetop kiet kiet ke esop eyebọ idem 50. Mme asuanetop ye mme asiakusụn̄ ẹkpenyene ndibọ n̄kukụre se mmọ ẹdikemede ndisuan mma ndien ẹkpenyene ndiyak nyọhọ-nsụhọ ekededi nnọ mbon efen ẹda ẹnam utom. Eti edidianakiet ke afan̄ emi eyen̄wam ke ndisuan akpan etop emi ntatara ntatara nte ẹkekeme. Edieke ke ntak ẹnyenede akamba efakutom ndusụk esop mîkemeke ndikụre efakutom mmọ etisịm October 22 ndien ke ẹsụk ẹnyenyene n̄wed emi, eyefọn ẹkot n̄kpet n̄kpet esop ẹdin̄wam. Ke mme esop eken, ẹkeme ndiyọhọ udọn̄ emi ke n̄kann̄kụk edieke mme asuanetop ẹsịnde ini efen efen ke utom mmọ ebe ke ndisịn enyịn̄ nte mme asiakusụn̄ unọ un̄wam m̀mê ndibuana ke utom ukwọrọikọ ndien ndien.

¹⁴ Eyeyom utom ofụri ukpọn̄ ẹnamde ẹnọ Jehovah edieke anade nnyịn inam utom nnyịn ima. (Col. 3:23) Uwem abuana. Mme owo ikemeke ndifụmi se mme idaha oro ẹdude ke ererimbot mfịn ẹwọrọde. Ini oro osụhọde ke asan̄a ekpere utịt. Ana mmọ ẹfiọk akpanikọ oro nte ke owo inyeneke usọbọ inọ mme mfịna ererimbot emi. Abasi enyene. Ana mbon oro ẹyomde ndinyene edidiọn̄ Abasi ẹnam n̄kpọ ye iwụk, ye unana ubiatini, ke n̄kemuyo ye mme n̄kpọ oro enye oyomde.

¹⁵ Ke utịt san̄asan̄a ubịnikọt emi ke October 22, nte nnyịn iyesụhọde ubọk? Baba! Nnyịn iyekaiso inam utom ke n̄kemuyo ye item Paul eke odudu spirit.