Afo N̄ko Emekeme Ndidara Nti Ifiọkutom!

Etie nte ndusụk asuanetop ẹsiwak ndinyene inem inem, ọnọ-nsịnudọn̄ ifiọkutom ndibụk mban̄a inem inem ediwaha m̀mê mfiakn̄ka oro akadade akwa idatesịt ọsọk mmọ. Nte ido edide owo isinyeneke nti ifiọkutom ke mbuari. Ata ediwak ẹdi utịp ntịn̄enyịn ye nsịnifịk ke anyanini. Inen̄ekede idi mme asuanetop ẹmi ẹtin̄de ikọ udọn udọn ẹkan m̀mê oro ẹnyenede ukeme ẹkan kpọt ẹsinyene mmọ.

Ẹmi ẹdi ndusụk ke otu n̄kpọ oro ẹsikụtde ke otu mbon oro ẹnyenede uforo ẹkan: (1) Mmọ ẹsibuana ke an̄wautom kpukpru ini, awak ndidi ediwak ini ke urua kiet kiet, emi esinọde mmọ mme ifet ndisobo ye mbon oro ẹnyenede udọn̄; (2) mmọ ẹsinyene nnennen edu ẹban̄a mme enyeneufọk, ibemke iso ibiere ite ke mmọ idikpan̄ke utọn̄; (3) mmọ ẹsinyene edu udara owo, ẹwụtde ufiop ufiop, ata udọn̄ ke idem mbon oro ẹkpan̄de utọn̄; (4) mmọ ẹsitịn̄ enyịn ẹnyụn̄ ẹkọbọ ke edifiak n̄ka mme mfiakn̄ka ọkọrọ ye mme ufọk oro owo mîkodụhe; ndien (5) mmọ ẹnyene utịtmbuba eke editọn̄ọ mme ukpepn̄kpọ Bible.

Ke ama okodụn̄ọde utom fo, ekeme ndidi afo eyekụt nte afo ekemede ndidara ediwak ke otu inem inem ifiọkutom oro ẹnamde ekese ke ndinam utom ukwọrọikọ on̄wụm mfri onyụn̄ ọnọ uyụhọ.