Jehovah Ono Odudu
1 Nte ikọt Jehovah, ẹnọ nnyịn utom edikwọrọ eti mbụk ke adan̄aemi ikamade idem nnyịn “nte odotde ke iso mme Gentile.” (1 Pet. 2:12; Matt. 24:14) Ke ntak ndiọkeyo ọkọrọ ye mme mmeme ye mme ndudue idem nnyịn, nnyịn tutu amama ikpekemeke ndinam utom emi mma ke odudu idem nnyịn. (2 Tim. 3:1-5) Nnyịn ikop inemesịt didie ntem nte ke nnyịn imekeme ndidori enyịn ke Jehovah kaban̄a un̄wam!
2 Apostle Paul ama ọyọ ekese idomo. (2 Cor. 11:23-27) Didie ke enye ekekeme ndiyọ mmọemi nnyụn̄ mma utom oro ẹkenọde enye? Jehovah ama ọnọ enye “akwa ubom odudu.” (2 Cor. 4:7) Paul ama onyịme ke imenyene utọ un̄wam Abasi oro ke ini enye ekewetde ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Phil. 4:13) Jehovah eyen̄wam nnyịn ke ukem usụn̄ oro. Didie ke nnyịn ikeme ndibọ un̄wam emi?
3 Ebe ke Nditre Ndidop Akam: Jesus ama akpak nnyịn ete ‘iben̄e, iyom, inyụn̄ ituak,’ ikûnyụn̄ ikpa mba. (Luke 11:5-10) Nnyịn ndikọbọ ke edibọn̄ akam owụt Jehovah udomo edikere oro nnyịn ikerede iban̄a, ọkpọsọn̄ udọn̄ nnyịn, ye ata uduakesịt nnyịn. (Ps. 55:17; 88:1, 13; Rome 1:9-11) Paul ama ọfiọk ufọn edikọbọ ke akam ke ini enye akakpakde nnyịn ete ‘ikûdop akam.’ (1 Thess. 5:17) Akam edi kiet ke otu mme akpan usụn̄ ẹmi nnyịn ibọde un̄wam Jehovah.
4 Ebe ke Nditiene Ndausụn̄ Ukara Abasi: “Ukara Abasi” ọwọrọ “ukara oro Abasi akarade,” emi edide ima. Nnyịn ibọ ufọn ito ukara esie ebe ke ndinyịme odudu esie nnyụn̄ ntiene mme item esie ke ikpọ ye n̄kpri ubiere. “Asan̄autom emi anamde akpanikọ, onyụn̄ enyenede ọniọn̄” ada ke ibuot ukara Abasi ke isọn̄ emi. (Matt. 24:45-47) Ndidiana kiet ye esop oro “asan̄autom” emi adade anam n̄kpọ edi akpan n̄kpọ edieke anade nnyịn ibọ edidiọn̄ Jehovah. (Men Mme Hebrew 13:17 domo.) Jehovah eyenọ nnyịn utịp edinam akpanikọ oro inamde inọ enye ye unyịmesịt nnyịn ndinịm mme mbet esie ke ndinọ odudu oro nnyịn iyomde ke ini oro odotde.—Heb. 4:16.’
5 Ebe ke Ndisan̄a N̄kpere Nditọete Nnyịn: Ẹda ima ẹdiọn̄ọ mme mbet Jesus. (John 13:34, 35) Ye ata ediwak nsio nsio edu, ntuaha ekeme ndidemede ke otu nnyịn ke ntak ndutan̄a uyo. Oyom nnyịn inyene esịtmbọm, ifende kiet eken ifụre ifụre. (Eph. 4:32) Emi anam ikeme ndisan̄a n̄kpere nditọete nnyịn ke mbuọtidem inyụn̄ ibọ nsịnudọn̄ ke edisọn̄ọ nda oro mmọ ẹsọn̄ọde ẹda ẹyọ ke idak idomo. ‘Ke ifiọkde ite kpa utọ ndutụhọ emi ke ọyọyọhọ ke otu nditọete nnyịn,’ nnyịn imenyene odudu oro Abasi ọnọde ndiyọ mme ukem mfịghe oro.—1 Pet. 5:9.
6 Ebe ke Ndinyene Eti Ido Ukpepn̄kpọ Idemowo: Ndisọn̄ọ ekikere ye esịt nnyịn ke n̄kan̄ eke spirit an̄wam nnyịn ndibiọn̄ọ en̄wan Satan. (1 Pet. 5:8) Eti ido ukpepn̄kpọ idemowo eyenam ifiọk Abasi oro nnyịn inyenede ọkọri. Nnyịn imekeme ndida emi nnam n̄kpọ ke ini isobode mme n̄kpọ-ata eke usen ke usen. Paul ama ọsọn̄ọ etịn̄ ete ke “[nnennen] ifiọk” enyene akpan udeme ke ndinyene edinyan̄a. (1 Tim. 2:3, 4) Edi akpan n̄kpọ ndidia udia eke spirit kpukpru ini.
7 Kpukpru n̄kpọ ẹmi ẹdin̄wamde nnyịn ndisọn̄ idem ẹdu barasuene ke esop Christian. Ndinọ mme edinam esie ibetedem ofụri esịt eyenọ ubiọn̄ nte ke nnyịn ‘iyesan̄a, edi idikpaha mba.’—Isa. 40:29-31.