Ndinyene Ekikere Oro Adade Ukem Ukem Mban̄a Kọmputa

¹ Apostle Paul ama esịn udọn̄ ọnọ mme Christian ke akpa isua ikie ete ẹkûyak n̄kpọ ọwọn̄ọde mmọ ntịn̄enyịn, koro “ẹsịbe ini omụhọ.” (1 Cor. 7:29) Nte utịt akani editịm n̄kpọ emi asan̄ade ekpere, edi usọp usọp n̄kpọ didie ntem nnyịn ‘ndibem iso nyom Obio Ubọn̄ ye edinen ido Abasi’ nnyụn̄ ‘ndedep ifet’! Ini edi ọsọn̄urua n̄kpọ.—Matt. 6:33; Eph. 5:15, 16.

² Ẹdọhọ ke ifiọk ubotn̄kpọ amanam ẹnyene ekese ini. Ke uwụtn̄kpọ, ke ndifịk n̄kpọ kiet ke kọmputa, andida kọmputa nnam n̄kpọ ekeme ndisọsọp nnyene ekese ntọt ke Intanet. Mme kọmputa ẹsiwak ndida sekọn ifan̄ nnam se ẹkpedade usụn̄ efen ẹnam ke ediwak hour m̀mê urua. Ke ini ẹdade ẹnam n̄kpọ ke nnennen usụn̄, mmọ ẹdi n̄kpọutom oro ẹnyenede ufọn.

³ Nte Enye Esinen̄ede Anam Ẹnyene Ini?: Ke n̄kan̄ eken, andida kọmputa nnam n̄kpọ isinyeneke ifiọk iban̄a kọmputa ye unana akwa ekọmurua—ke okụk ye ke ini. Ẹkeme ndiyom ẹda ediwak hour ẹkpep nte ẹkemede ndinam kọmputa anam ndusụk utom. Akan oro, owo oro enen̄erede oyom ndifiọk kpukpru n̄kpọ mban̄a kọmputa ekeme ndibiat ini oro enye akpadade anam n̄kpọ oro ọfọnde akan. Ana nnyịn inyene ekikere oro adade ukem ukem, itide edumbet oro abuanade ke item apostle Paul oro ndisan̄a ‘nte mbon eti ibuot. Idedep ifet.’—Se 1 Corinth 7:31.

⁴ Ediwak owo oro ẹnyenede eti uduak ẹmesion̄o ndutịm kọmputa ẹdi man ẹda ẹnịm mme n̄wetnnịm n̄kpọ esop. Edi akpanikọ, nte owo adade kọmputa esie anam n̄kpọ edi ọkpọkpọ ubiere. Nte ededi, owo ikpenyeneke ndidọn̄ mme n̄wetnnịm n̄kpọ esop ke kọmputa edieke ẹnọde mme babru man ẹda ẹwet mmọ ẹdọn̄, sia nditọwọn̄ m̀mê mbon efen oro mînyeneke unen ẹkemede ndikụt mmọ. Ẹkpenyene ndidọn̄ kpukpru n̄wetnnịm n̄kpọ esop—mme n̄wetnnịm n̄kpọ ẹban̄ade okụk, mme kad Ibatutom Asuanetop Esop, ye ntre ntre eken—ke mme babru oro esop Abasi ọnọde, ndien owo ikpenyeneke ndidọn̄ ntọt oro ẹdude ke mme babru esop emi ke kọmputa. Ke usụn̄ emi, ẹyekpeme mme ọkpọkpọ n̄wetnnịm n̄kpọ esop.

⁵ Mme esenyịn oro ẹkamade ifetutom ẹkpenyene ndiwụt mbufiọk ke nte ẹdemede mme utịn̄ikọ oro ẹdinọde ke ndutịm Ufọkn̄wed Utom Ukara Abasi ye Esoputom. Oyom mmọ ẹkere ẹban̄a se isịnede ke akpan ikpehe oro ẹdinemede. Ke uwụtn̄kpọ, idịghe eyen ufọkn̄wed ekededi ekeme ndise mban̄a ndusụk ibuot nneme ke ufọkn̄wed. Ẹkpenyene ndikere mban̄a uduak utịn̄ikọ ọkọrọ ye nte owo oro edinọde enye odotde ye orụk utịn̄ikọ. Owo ikpayakke enye inọ kọmputa ndideme.

⁶ Eyenete oro ẹnọde ikpehe ndise mban̄a ke mme mbono esop ikpenyeneke ndida n̄kpọ oro owo efen eketịmde, akpan akpan owo oro enye mîfiọkke, n̄kukụre koro ẹma ẹnam enye odu ke ndutịm usuanetop oro ẹdade kọmputa ẹsuan ndien ndida enye nnam n̄kpọ ayanam utom efere enye. Mme Christian oro ẹnamde n̄kpọ nte odotde ikereke ke enen nditịm mme utịn̄ikọ Bible m̀mê mme ikpehe mbono esop ndọn̄ ke ndutịm usuanetop oro ẹdade kọmputa ẹsuan man mbon en̄wen ẹda ẹnam n̄kpọ. Nte ededi, kọmputa ye Watchtower Library ke usan umụm-ntọt kọmputa ẹkeme ndidi nti n̄kpọutom ẹnọ eyenete, ẹtịpde ẹsịn ke enye ndida ekpri ini oro enye enyenede nnam ndụn̄ọde uforo uforo.

⁷ Kaban̄a edifiak nsion̄o ye edisuan mme ndutịm, uwetn̄kpọ, ye n̄wetnnịm n̄kpọ kọmputa ke otu nditọete, ye edida kọmputa m̀mê mme usụn̄ efen ntịm nnyụn̄ nsuan mme ikpehe ndutịm Esoputom ye Ufọkn̄wed Utom Ukara Abasi, nte ido edide, mfọnn̄kan n̄kpọ edi nditọete nditịm ke idemmọ ikpọn̄ se mmọ ẹdinemede, ẹkerede ẹban̄a mme udọn̄ n̄kann̄kụk. (1 Tim. 4:13, 15) Owo ikpedehede ida mme ebuana esop in̄wana okụk.

⁸ Nso kaban̄a edimịn̄ mme itie N̄wed Abasi oro ẹdọn̄de ke Ukpepn̄kpọ Enyọn̄-Ukpeme m̀mê Ukpepn̄kpọ N̄wed Esop ndeme? Nte ededi, ọfọn mme asuanetop ke idemmọ ndiwet n̄kpọ nnyụn̄ ndụri udịm ke Bible ye mme n̄wed oro ẹkpepde. Ke mbono esop, ndimemịn̄ mme itie N̄wed Abasi oro ẹsiakde ẹsịn ke mme n̄wed isịnke udọn̄ inọ owo ndikama Bible nyom mme itie N̄wed Abasi. Edi ndikụbọde N̄wed Abasi ke ukpepn̄kpọ Bible m̀mê ke mbono esop edi ubak ukpep oro ibọde, etịmde nnyịn idem ndida Bible nnam n̄kpọ uforo uforo ke an̄wautom. Ke ata ediwak idaha, ndien akpan akpan ye nnyan itie oro ẹkotde ẹsịn, ndikot nnennen nnennen nto Bible enyene ufọn akan, akpan akpan ke ini ẹsịnde udọn̄ ẹnọ otuowo nditiene nse ke Bible.

⁹ Ikpọ Afia Efen: Nte ẹkewụtde ke page 17 ke nsiondi Enyọn̄-Ukpeme eke August 1, 1993, owo ndinam kọmputa esie esịne ke otu mme kọmputa oro ẹsidade ẹnọ etop ekeme ndiberede usụn̄ nnọ ikpọ n̄kpọndịk eke spirit. Ukem nte oburobụt owo ekemede ndida idiọk ndutịm kọmputa kiet mbiat se idọn̄ọde ke ediwak kọmputa oro ẹsịnede ke otu mme kọmputa oro ẹsidade ẹnọ etop, mbon mfiakedem, mme ọkwọrọ ederi, ye mbon oro ẹyomde ndibiat mbon en̄wen ke n̄kan̄ ido uwem m̀mê ke usụn̄ efen ẹkeme ndidọn̄ ndiọi ekikere ke itie unọ etop oro. Ibọhọke ẹnọ ata ntịn̄enyịn ke itie unọ etop emi, idem ye enye oro ẹkotde “JW Only,” (Mme Ntiense Jehovah Kpọt), ẹyakde sụk mbon oro ẹdide mme anam-akpanikọ asan̄autom Jehovah oro ẹkọride ẹsịm ọyọhọ idaha ẹda enye ẹnam n̄kpọ, mme Christian oro ẹdade enye ẹnam n̄kpọ ẹkeme ndidụk “idiọk nsan̄a.” (1 Cor. 15:33) Mme n̄kọk itieutom ẹmebọ ntọt nte ke owo idaha mme utọ ọkpọkpọ ndutịm usuanetop oro ẹdade kọmputa ẹsuan do inọ ekikere iban̄a mme n̄kpọ eke spirit kpọt edi n̄ko ke ẹda enye ẹnọ ndiọi item, ẹsuan ikọedem ye nsunsu ntọt, ẹtọn̄ọ etikwo etikwo ekikere, ẹdemede mbụme ye eyịghe oro abiatde mbuọtidem ndusụk owo, ẹnyụn̄ ẹsuan mme itie N̄wed Abasi oro mmọ ẹdade ekikere idemmọ ẹnam an̄wan̄a. Ke enyọn̄ enyọn̄, ndusụk ntọt ẹkeme nditie nte ẹfọn ẹnyụn̄ ẹsịne ifiọk, edi kpa ye oro mmọ ẹkeme ndiyọhọ ye ndiọi ntọt. Mme Christian ẹberi edem ke “asan̄autom emi anamde akpanikọ, onyụn̄ enyenede ọniọn̄” ndinọ ekemini udia eke spirit ye mme edinam an̄wan̄a. (Se Enyọn̄-Ukpeme eke July 1, 1994, page 9-11.) Christian enyene akwa mbiomo ndikpeme mbuọtidem esie mbiọn̄ọ kpukpru ndiọi odudu ndien, ke edide akpan n̄kpọ, ekpenyene ndifiọk owo oro enye odụkde ndụk kpukpru ini.—Matt. 24:45-47; 2 John 10, 11.

¹⁰ Kpa ibuotikọ Enyọn̄-Ukpeme oro ama ọsọn̄ọ etịn̄ aban̄a ufọn edikpeme mbet oro aban̄ade unen edisio n̄wed. Ata ediwak usiakifia oro ẹtịmde ẹnyụn̄ ẹnyamde ndutịm kọmputa ẹnyene mbet oro ẹkpemede unen edisio ndutịm emi, ndien mmọ ẹsinọ unyịme ke nte ẹkpedade mme ndutịm emi ẹnam n̄kpọ nte ekemde ye ibet. Nte ido edide, unyịme emi esidọhọ ke andidep ikpenyeneke ndinọ mbon efen se mmọ ẹkedepde emi; ke akpanikọ, mbet ofụri ererimbot oro aban̄ade unen n̄kpọ oro ẹsiode ọdọhọ ke ikemke ye ibet ndinam ntre. Ediwak mbon idiọkitọn̄ ẹsiwak ndibiat mbet emi. Nte ededi, mme Christian ẹkpenyene ndinam akpanikọ ke mme n̄kpọ ẹban̄ade ibet, ẹnọde Caesar se inyenede Caesar.—Matt. 22:21; Rome 13:1.

¹¹ Ediwak ikpọ usiakifia ẹsinyam mme kọmputa emi ẹdọn̄ọde mme ndutịm oro ẹsan̄ade ye kọmputa oro ẹma ẹkenọnọ andidep unyịme ndida nnam n̄kpọ. Nte ededi, ndusụk ufọkurua kọmputa inọhọ unyịme koro mme ndutịm oro mmọ ẹkedọn̄de ikekemke ye ibet, ọwọrọde ke andidep abiat ibet ke ndida mme ndutịm oro nnam n̄kpọ. Kaban̄a emi, ke itie ubon ntọt otu mme kọmputa oro ẹsidade ẹnọ etop, mme Christian ẹkpenyene ndifep ndidọn̄, m̀mê ndision̄o mme n̄kpọ oro ẹyomde ẹbọ unyịme mbemiso ẹdade ẹnam n̄kpọ ye mme n̄kpọ oro owo mîkọbọhọ unyịme ito mme andinyene (utọ nte mme n̄wed N̄ka).—Heb. 13:18.

¹² Ana ẹmen ufọn oro odude ke ndida ifiọk ubotn̄kpọ ekededi nnam n̄kpọ ẹdomo ye mme n̄kpọndịk emi ẹkemede ndidu ke ndida enye nnam n̄kpọ. Ukem nte ẹkemede ndida ekebe ndise nnam n̄kpọ ke eti usụn̄, mbiara odudu oro enye enyenede ke idem ubonowo mfịn amanam idem mbon ererimbot ẹtịn̄ n̄kpọ oro odotde ẹkere ẹban̄a. Mme ndutịm usuanetop oro ẹdade kọmputa ẹsuan ẹtara ẹsịm ofụri ererimbot ndien ẹkeme nditie ke ufọk m̀mê itieutom ẹkọ ọsọn̄urua ntọt oro mînyeneke adan̄a. Mmọ ẹsinọ mme mbubehe ye mme esop ọkọrọ ye mme owo un̄wam oro ẹnen̄erede ẹyom man ọkpọkpọ m̀mê mme udọn̄ mbubehe ẹkeme ndisan̄a mfọn mfọn ke n̄kaowo oro nnyịn idude uwem mi, oro etiede itọk itọk. Ke ukem ini oro, mme ndutịm usuanetop oro ẹdade kọmputa ẹsuan ẹyọhọ ye mme utọ idiọkn̄kpọ nte mme ndise idan̄, ekikere usua oro ọtọde ubahade, ye ọyọhọ ntọt ke nte ẹkpenamde oburobụt ye ndiọi edinam.

¹³ Ke ntre, ata ediwak ntak ẹdu oro anade Christian enyene ekikere oro adade ukem ukem aban̄a kọmputa. Ediwak owo ke ẹkop inem New World Translation, mme eboho Insight, ye GetVerse emi N̄ka osiode ke ọkpọ umụm-ntọt kọmputa. Mbon efen ke ẹdia ufọn ẹto ẹdida Watchtower Library emi odude ke usan umụm-ntọt kọmputa nnam n̄kpọ, emi ẹkemede ndikama nnam mme ndụn̄ọde efen efen. Ke adan̄aemi ọdiọn̄ọde ufọn oro ndusụk ifiọk ubotn̄kpọ enyenede, owo oro adade utọ ifiọk ubotn̄kpọ eyomfịn oro anam n̄kpọ ye eti uduak ekpenyene ndidu ke ukpeme n̄ko man ekpeme idemesie ye mbon efen osio ke ndiọi utịp ekededi. Oyom nnyịn ida ukem ukem man otodo idem eti usụn̄ uda ifiọk ubotn̄kpọ nnam n̄kpọ okûdia ini nnyịn akaha m̀mê ndiwọn̄ọde ntịn̄enyịn nnyịn n̄kpọn̄ akpan utom ye utịtmbuba nnyịn.—Matt. 6:22; 28:19, 20.