Ẹdu Uwem nte Odotde ye Eti Mbụk
1 Nte Mme Ntiense Jehovah, ọdọn̄ nnyịn ndida ukpono nsọk enyịn̄ Jehovah. Nnyịn imọfiọk ite ke eduuwem, ikọ, ukamaidem, ye usịnen̄kpọ nnyịn ẹkeme nditụk usụn̄ oro mbon en̄wen ẹsede utuakibuot akpanikọ. Emi edi ntre akpan akpan ke ini nnyịn idụkde mme mbonoesop nnyịn. Oyom nnyịn ikụt ite ke kpukpru n̄kpọ oro itịn̄de inyụn̄ inamde ke mme mbonoesop ẹdot ye eti mbụk ẹnyụn̄ ẹda ukpono ẹsọk Jehovah.—Phil. 2:4.
2 Ediwak ke otu idaha usịnen̄kpọ ye ukamaidem ererimbot ikemke ye idaha mme Christian. Emi edi n̄kpọ oro mme asan̄autom eti mbụk ẹkpenọde akpan ntịn̄enyịn. Enyọn̄-Ukpeme eke June 1, 1989, page 20, ọkọdọhọ ete: “Inaha ọfọn̄ nnyịn akpa enan̄, edi enye ekpenyene ndisana, eye, onyụn̄ owụt iso o-bụt. Ikpaukot nnyịn ekpenyene ndidu ke eti idaha onyụn̄ eye ke enyịn. Ukem ntre n̄ko, ke kpukpru mbonoesop, ọkọrọ ye Ukpepn̄kpọ N̄wedesop, idem nnyịn ẹkpenyene ndisana, ndien nnyịn ikpenyene ndikama idem eye inyụn̄ isịne n̄kpọ nte odotde.”
3 Edika n̄kpọ ke ini edi idiọn̄ọ ima ima edikere mban̄a ye eti ekikere. Ke ini ke ini, mme idaha oro owo mîkemeke ndinyan̄a ẹkeme ndibiọn̄ọ nnyịn ndisịm mbonoesop ke ini. Edi ediyak edi edu ndisika ke idiọk ini ekeme ndiwụt unana ukpono ẹnyenede ẹnọ edisana uduak eke mme mbonoesop ye unana edifiọk mbiomo nnyịn eke editre nditịmede mbon efen. Mbon oro ẹsikade ke idiọk ini ẹsiwak ndiwọn̄ọde ntịn̄enyịn mbon efen ẹnyụn̄ ẹbiọn̄ọ mmọ ndibọ ọyọhọ ufọn nto ndutịm. Edika ke ini owụt ukpono ẹnyenede ẹnọ ekikere ye udọn̄ kpukpru mbon oro ẹdude.
4 Ima oro inyenede inọ mme mbọhọidụn̄ nnyịn ekpenyene ndinam nnyịn itịn̄ enyịn man ifep ndiwọn̄ọde ntịn̄enyịn mme owo ke mme mbonoesop. Edidọn̄ odu, edidia udia, edita chewing gum, edifụt babru, ye edika itie ukaikọt nte mîdotke, ekeme nditịmede ntịn̄enyịn mbon efen onyụn̄ osụhọde uku oro ẹkpenọde itie utuakibuot Jehovah. Idotke ndinam mbubehe esop m̀mê ndineme nneme ye mbon en̄wen ibọhọke odu usọp usọp n̄kpọ oro oyomde nditọete ẹkpọn̄ itie mmọ. Ke ẹsiode oro efep, kpukpru owo ẹkpenyene nditetie nnyụn̄ n̄kpan̄ utọn̄ ke ndutịm man otodo mmọ ye mme ubon mmọ ẹbọ ufọn. Idiọk eduuwem idotke ke Ufọkmbono Obio Ubọn̄ koro “ima . . . inamke ido eke mîdotke.”—1 Cor. 13:4, 5; Gal. 6:10.
5 Eti eduuwem nditọ nnyịn ke mme mbonoesop n̄ko esida itoro ye ukpono ọsọk enyịn̄ Jehovah. Ukpeme ntịn̄enyịn ete ye eka edi akpan n̄kpọ. Ẹkpenyene ndisịn udọn̄ nnọ nditọ ndikpan̄ utọn̄ nnyụn̄ ntiene mbuana. Ediwak ete ye eka oro ẹnyenede nditọwọn̄ ẹsima nditie ke ebiet oro mmọ ẹkemede ndisọp n̄wọrọ nnyụn̄ n̄kese mban̄a se nditọ mmọ ẹyomde ye unana ediwọn̄ọde ntịn̄enyịn mbon efen nte mîdotke.
6 Paul eketeme ete: “Ẹkam ẹdu uwem ke otu mbio obio mbufo nte odotde ye gospel.” (Phil. 1:27) Do, ẹyak nnyịn idomo ndinyene nti eduuwem inyụn̄ ikere iban̄a mbon en̄wen ke ini idụkde mme mbonoesop. Kpukpru owo ndidiana kiet eyeda okosịm ke ‘ndọn̄esịt emi otode mbuọtidem edem mbiba.’—Rome 1:12.