Tịn̄ Ikọ ye Uko
1 Ke mme isua ndondo emi ototịm ọsọn̄ mme asuanetop ke ndusụk ebiet nditịn̄ ikọ nnọ mme owo ke ufọk mmọ. Ediwak owo ẹtọt ẹte se iwakde ikan mbahade owo 50 eke ikie ke efakutom mmimọ isidụhe ke ufọk ke ini isiwahade to ke ufọk sịm ufọk. Nte utịp, ekese ini oro ẹbiatde isin̄wụmke mfri.
2 Ediwak isua ko ke edem ẹma ẹsikụt ediwak owo ke ufọk ke Sunday, emi kpukpru owo ẹkedade nte usen nduọkodudu. Mme ido edinam ẹmekpụhọde. Edi ọsọ n̄kpọ mfịn ọnọ mme owo ndinam utom idịbi udia, ndise mban̄a mme udọn̄ ubon utọ nte edidep mme n̄kpọ, m̀mê edibuana ke unọ idem nduọkodudu, emi n̄ko esidade mmọ ọwọrọ ọkpọn̄ ufọk. Ntre, idem ke Sunday, ndisobo mme owo to ke ufọk sịm ufọk ediwak ini edidi mfịna.
3 Ke ini mme owo mîdụhe ke ufọk, emi nte an̄wan̄ade ọwọrọ ke enyene ebiet oro mmọ ẹdude. Sia utịtmbuba nnyịn edide ndinyene nneme ye mme owo, ntak mîtịn̄ke ikọ inọ mbon ẹmi isisobode—ke efak, ke an̄waurua, m̀mê ke itieutom. Ekedi ido Paul ndika mbịne “mmọ eke ẹsobode ye enye,” man ọnọ mmọ ikọ ntiense. (Utom 17:17) Emi ekedi usụn̄ unyene nneme emi okon̄wụmde mfri, enye onyụn̄ edi usụn̄ unyene nneme emi on̄wụmde mfri ke eyo nnyịn.
4 Ke ini nnyịn ikwọrọde ikọ to ke ufọk sịm ufọk, nnyịn imesiwak ndikụt mme owo ẹsan̄ade ẹbe ye unana edinyene akpan n̄kpọ emi ẹkade mîdịghe nte ẹdade ẹbet owo. Ke usen ọfọnde, mmọ ẹkeme ndiyet ọfọn̄ mmọ mîdịghe ẹdiọn̄ moto mmọ. Inua imam oro owụtde ima ye ufan ufan ekọm ekeme ndidi n̄kukụre se iyomde man itọn̄ọ nneme. Edieke mmọ ẹdụn̄de ẹkpere, nnyịn imakam ikeme ndidọhọ ke eyedi imesitaba mmọ ke ufọk mmọ ndien kemi nnyịn imokop idatesịt nte ke nnyịn imenyene ifet emi ndinyene nneme ye mmọ. Ke ndinam usio-ukot ediwụt esisịt uko efen efen, ediwak owo ẹma ẹnyene ifiọkutom oro akamade utịp.
5 Edinyene Uko Ada Mme Utịp Edi: Eyenete eren kiet ama obụk ete ke imọ isika ibịne mme owo ẹdade-da, ẹbetde bọs, ẹsan̄ade ẹbọ ofụm, m̀mê ẹtiede ke moto mmọ. Ke adade ima ima inua imam ye inem inem uyo, enye anam n̄kpọ nte ufan ufan mbọhọidụn̄ emi akam oyomde ndiwaha. Enye inịmke ekese n̄wed kpọt ke usụn̄ emi edi n̄ko enye ama ọtọn̄ọ ediwak ukpepn̄kpọ Bible.
6 Eyenete eren kiet efen ye n̄wan esie ẹkewaha to ke enyịnusụn̄ sịm enyịnusụn̄ ke ini mmọ ẹkesobode n̄wan kiet emi asan̄ade ebe ye akamba ekpaturua. Mmọ ẹma ẹtọn̄ọ nneme, ẹtoro enye ke ntịn̄enyịn esie ke ndise mban̄a udọn̄ ubon esie. Mmọ ẹma ẹbụp ẹte: “Edi anie ekeme ndinọ mme n̄kpọ ẹmi ubonowo oyomde?” Oro ama edemede udọn̄ n̄wan oro. Ibio ibio nneme ama ada okosịm ikot ndidi ufọk esie, kpa ebiet emi ẹketọn̄ọde ukpepn̄kpọ Bible.
7 Ntre ini efen oro afo ọnọde ikọ ntiense to ke enyịnusụn̄ sịm enyịnusụn̄, edide ke Sunday m̀mê usen en̄wen ke urua, onyụn̄ okụtde ete ke mme owo idụhe ke ufọk, ntak mûnyeneke esisịt uko efen efen unyụn̄ utịn̄ ikọ ye mme owo oro afo osobode—ke efak m̀mê ke ebiet en̄wen? (1 Thess. 2:2) Eyedi afo eyenam utom ukwọrọikọ oro on̄wụmde mfri akan, eyenyụn̄ okop idatesịt akan ke utom fo.