Ekebe Mbụme
◼ Kemi ima ikenyene n̄wed Ifiọk Oro Adade Osịm Nsinsi Uwem, ẹkpenịm ukpepn̄kpọ Bible ebịghi adan̄a didie?
Utom Obio Ubọn̄ Nnyịn eke October 1993 ama otoro ete ẹka iso ke ukpepn̄kpọ Bible ye mbufa owo ẹmi ẹnyenede udọn̄ tutu ẹkpep n̄wed iba. Kemi nnyịn ima ikenyene n̄wed Ifiọk, etie nte owụt ifiọk ndinam ukpụhọde ke ndutịm emi, nte ẹwụtde ke page 13 ye 14 ke nsiondi Enyọn̄-Ukpeme eke January 15, 1996.
Ẹtịm n̄wed Ifiọk ndin̄wam mbon oro “ẹkenịmde ẹnọ nsinsi uwem” ndikpep se oyomde mmọ ẹfiọk man ẹnam uyakidem ẹnọ Jehovah ẹnyụn̄ ẹna baptism. (Utom 13:48) Ke ntre, ke ẹma ẹkekụre obufa n̄wed emi, ikpoyomke ẹkpep ọyọhọ n̄wed iba ye ukem eyen ukpepn̄kpọ emi. Nte nditọ ukpepn̄kpọ Bible fo ẹtọn̄ọde ndikpep akpanikọ, afo emekeme ndika iso nsịn udọn̄ nnọ mmọ ndinam ifiọk mmọ ọyọhọ ebe ke ndidụk mme mbonoesop Mme Ntiense Jehovah ọkọrọ ye edikot Bible ye nsio nsio n̄wed Christian.
Edieke afo otịmde emehe ye mme mbụme ẹmi ẹdude ke n̄wed Ẹtịm Man Inam Utom Nnyịn Ima ke page 175 osịm 218, emi ekeme ndin̄wam. Okposụkedi afo mûnyeneke nditịn̄ n̄kpọ ntụk mme mbụme ẹmi m̀mê ndidụn̄ọde mmọ ye eyen ukpepn̄kpọ Bible, ọkpọfọn ndisọn̄ọ ntịn̄ mme n̄kpọ ke n̄wed Ifiọk oro ẹdin̄wamde eyen ukpepn̄kpọ etịn̄ nte mme akpan ukpepn̄kpọ Bible ẹn̄wan̄ade ke ini mbiowo ẹdụn̄ọde mbụme ye mbon baptism.
Ufọn idụhe ndidian n̄kpọ ke ntọt oro odude ke n̄wed Ifiọk, ndida n̄kpọ nto ebiet efen m̀mê mme udiana mfan̄a ndisọn̄ọ mme ukpepn̄kpọ Bible m̀mê ndiwụt nte nsunsu ukpepn̄kpọ mînenke. Emi n̄kukụre edinam ukpepn̄kpọ oro ada ini oro ọniọn̄de akaha. Utu ke oro, ẹdori enyịn nte ke ẹkeme ndikụre n̄wed oro usọp usọp, ndusụk ke n̄kpọ nte ọfiọn̄ itiokiet. Emi ọsọn̄ọ owụt nte oyomde nnyịn ibem iso ikpep n̄wed emi mfọn mfọn man otodo nnyịn ikeme nditịn̄ n̄kpọ in̄wan̄în̄wan̄ ye ibio ibio. Ẹkpenyene ndisịn udọn̄ n̄ko nnọ eyen ukpepn̄kpọ oro ndibem iso ntịm idem nnọ ukpepn̄kpọ, ndikot mme itien̄wed Abasi ẹmi ẹsiakde ẹsịn, nnyụn̄ ndomo ukeme ndifiọk in̄wan̄în̄wan̄ se n̄wed oro ekpepde ke ibuot kiet kiet.
Enyọn̄-Ukpeme odori nsọn̄uyo ke nte oyomde Mme Ntiense Jehovah ẹnịm ata ediwak ukpepn̄kpọ Bible oro ẹnyenede uforo ke ekpri ibio ini. (Se Isaiah 60:22.) Ndida n̄wed Ifiọk nnam n̄kpọ uforo uforo ekeme ndin̄wam mbufa owo ndinyene ifiọk oro adade osịm nsinsi uwem ẹnyụn̄ ẹda enye ẹsịn ke edinam.—John 17:3.