Kpebe Jehovah ebe ke Ndinen̄ede N̄kere Mban̄a Mbon En̄wen
1 Jehovah edi akakan uwụtn̄kpọ owo emi enen̄ede ekere aban̄a mbon en̄wen. Nte Andikara Ekondo, enye esikere aban̄a udọn̄ edibotn̄kpọ esie edide owo. (1 Pet. 5:7) Jesus ama esịn udọn̄ ọnọ mme anditiene enye ete ẹwụt mme edu Ete esie, emi anamde utịn asiaha onyụn̄ anamde edịm edep ọnọ ndinen owo ye mme anam ukwan̄ido. (Matt. 5:45) Afo emekeme ndikpebe Jehovah ebe ke ndinen̄ede n̄kere mban̄a mbon en̄wen—eben̄ede idem ndibuana etop Obio Ubọn̄ ye kpukpru owo emi afo osobode. Ebede ke nditịm mmehe ye ndiye uduot n̄kpri n̄wed oro ẹdikamade ke utom ukwọrọikọ ke July, afo eyedu ke eti idaha ndinọ mbon en̄wen un̄wam eke spirit. Mme ekikere ẹtienede mi ẹnọ ndusụk usụn̄ kaban̄a nte afo ekemede ndiben̄e idem nnọ akpa ediwaha ndien ekem anam n̄kpọ aban̄a udọn̄ ebe ke mme ekemini mfiakn̄ka.
2 Ke ini ọnọde ediye uduot ekpri n̄wed oro “Nte Abasi Enen̄ede Ekere Aban̄a Nnyịn?” afo emekeme ndidọhọ:
◼ “Nte akanam afo emekere aban̄a ntak emi Abasi ayakde mme owo ẹbọ ndutụhọ edieke enye enen̄ede ekere aban̄a mmọ? [Bet ibọrọ.] Ediye uduot ekpri n̄wed inọhọ ibọrọ oro ọnọde uyụhọ ke mbụme emi kpọt edi owụt n̄ko nte ke Abasi ọmọn̄wọn̄ọ ndinen̄ede kpukpru afanikọn̄ oro owo adade ọsọk idemesie ye ebietidụn̄ esie eke isọn̄.” Kot ikpehe ekikere 23 ke page 27. Wụt ndise oro odude ke idak esie, nyụn̄ kot Psalm 145:16 to ikpehe ekikere 22. Nọ ediye uduot ekpri n̄wed ke etịbe oro ẹsinọde. Edieke ẹbọde, bụp mbụme oro ẹkemede ndibọrọ isan̄ en̄wen awahade, utọ nte: “Nte afo akpama ndidiọn̄ọ nte Abasi ediyọhọde uduak esie eke edida mme edidiọn̄ nsọk ubonowo ye edinam isọn̄ akabade edi paradise?”
3 Ke ini afiakde aka ebịne mbon oro ọkọnọde ediye uduot ekpri n̄wed oro “Nte Abasi Enen̄ede Ekere Aban̄a Nnyịn?” afo emekeme nditọn̄ọ nneme en̄wen ke usụn̄ emi:
◼ “Ke ini n̄kedide isan̄ oko, nnyịn ima ineme nte ke Abasi enen̄ede ekere aban̄a nnyịn ye nte ke edi uduak esie ndisio kpukpru afanikọn̄ oro owo adade ọsọk idemesie ye ebietidụn̄ esie eke isọn̄.” Kụbọde ediye uduot ekpri n̄wed oro ka ndise oro ke page 2-3 nyụn̄ dọhọ ete: “Nnyịn ikeberi nneme nnyịn ye mbụme oro, Didie ke Abasi ediyọhọ uduak esie eke edida mme edidiọn̄ nsọk ubonowo ye edinam isọn̄ akabade edi paradise? Afo ekere didie?” Bet ibọrọ. Kụbọde ka page 17, nyụn̄ kot ikpehe ekikere 2 ye Daniel 2:44. Ke oro ebede, kot ikpehe ekikere 12 ke page 18. Bụp enyeneufọk m̀mê enye akpama ndineme ikpehe 9 ke ediye uduot ekpri n̄wed oro ye afo. Edieke enye edimade, kpep n̄kpọ ye enye.
4 Usụn̄ kiet emi ẹkemede ndida nnọ ediye uduot ekpri n̄wed oro “Ke Ini Owo Oro Afo Amade Akpade” edi emi. Wụt ikpaedem esie nyụn̄ dọhọ ete:
◼ “Mfịn nnyịn ibuana ediye uduot ekpri n̄wed oro adade ndọn̄esịt ye idotenyịn ọsọk ediwak miliọn owo ẹmi ẹtabade mbonima mmọ ke n̄kpa. Ndi akanam afo emekere m̀mê nso idotenyịn idu inọ mme akpan̄kpa? [Bet ibọrọ.] Bible etịn̄ un̄wọn̄ọ Abasi eke ediset ke n̄kpa in̄wan̄în̄wan̄.” Kot John 5:28, 29. Kụbọde ediye uduot ekpri n̄wed oro nyụn̄ tịn̄ n̄kpọ tụk mme n̄kpọ ẹtịn̄de ke akpatre ikpehe ekikere ke page 28 ye akpa ikpehe ekikere ke page 31. Wụt mme ndise oro ẹsan̄ade ye mmọ. Nọ ediye uduot ekpri n̄wed oro. Afo emekeme ndidiọn̄ usụn̄ nnọ mfiakn̄ka ebe ke ndibụp ete, “Didie ke nnyịn ikeme nditịm nnịm nte ke ẹyesio n̄kpa ẹfep ofụri ofụri ke akpatre?”
5 Ke ebiet emi afo okonịmde ediye uduot ekpri n̄wed oro “Ke Ini Owo Oro Afo Amade Akpade,” afo emekeme ndikama nneme enyeemi ke mfiakn̄ka:
◼ “Ke ini nnyịn ikenyenede nneme mbemiso, nnyịn ima ineme iban̄a utịbe utịbe idotenyịn ediset ke n̄kpa. Ediye uduot ekpri n̄wed oro n̄kọkpọn̄de nnọ fi anam an̄wan̄a ntak emi nnyịn ikemede nditịm nnịm nte ke ẹyesio n̄kpa ẹfep ofụri ofụri ke akpatre. Nte afo ukûkwe mme un̄wọn̄ọ Abasi nte ẹdide se inọde ndọn̄esịt ẹnyụn̄ ẹdide se ẹkemede ndiberi edem?” Bet ibọrọ. Ekem kụbọde ka page 31 ke ediye uduot ekpri n̄wed oro, nyụn̄ kot udiana ye ọyọhọ ikpehe ekikere ita, ọkọrọ ye Ediyarade 21:1-4. Sio idotenyịn edidara uwem ye unana edikpa n̄kpa tutu amama emi nnyịn inyenede wụt. Ọkọn̄ọde ke udọn̄ ẹwụtde ye idaha oro odude adan̄aoro, afo emekeme ndidọhọ ke iyenịm ukpepn̄kpọ Bible ke n̄wed Ifiọk mîdịghe obụp mbụme en̄wen man eberede usụn̄ ọnọ mfiakn̄ka en̄wen.
6 Afo emekeme nditịn̄ se itienede mi ke ini ọnọde ediye uduot ekpri n̄wed oro “Nso Idi Uduak Uwem? Didie ke Afo Ekeme Ndikụt Enye?”:
◼ “Ediwak owo ẹmekere se uduak uwem edide. Mmọ ẹbụp idemmọ ẹte: ‘Ntak emi ami ndude mi? N̄ka m̀mọ̀n̄? Nso ke ini iso akama ọnọ mi?’ Afo ekere ke nnyịn ikeme ndikụt ibọrọ ke m̀mọ̀n̄? [Bet ibọrọ.] Tịm fiọk se Bible ọdọhọde. [Kot Psalm 36:9.] Nte iwụtke ifiọk ndibiere nte ke Andibot owo odu ke mfọnn̄kan idaha ndinam ntak emi nnyịn idude mi an̄wan̄a? [Bet ibọrọ.] Ediye uduot ekpri n̄wed emi owụt akwa uduak oro Abasi onịmde ọnọ nnyịn.” Kụbọde ka page 20-21, kot uwetn̄kpọ ndise, nyụn̄ tịn̄ n̄kpọ tụk ndise; ekem nọ ediye uduot ekpri n̄wed ke etịbe oro ẹsinọde. Edieke ẹbọde, bụp ete: “Didie ke nnyịn ikeme nditịm nnịm ke osụk edi uduak Abasi mme owo ndidu uwem ke nsinsi ke Paradise ke isọn̄?”
7 Edieke onịmde ediye uduot ekpri n̄wed oro “Nso Idi Uduak Uwem? Didie ke Afo Ekeme Ndikụt Enye?” afo emekeme nditịn̄ n̄kpọ ntem ke ini afiakde aka:
◼ “Isan̄ oko n̄kedide, mma nnen̄ede n̄kop inem ndineme ekikere Bible ye afo nte ke uwem owo enen̄ede enyene uduak.” Wụt ndise oro odude ke page 31 nyụn̄ bụp ete, “Didie ke nnyịn ikeme nditịm nnịm ke osụk edi uduak Abasi mme owo ndidu uwem ke nsinsi ke Paradise ke isọn̄?” Kot ikpehe ekikere 3 ke page 20. Neme mme n̄kpọ ẹdude ke idak ekpri ibuotikọ oro, “Osụk Edi Uduak Abasi,” ke page 21. Wọn̄ọde ka ikpaedem ediye uduot ekpri n̄wed oro, nyụn̄ kot ban̄a ukpepn̄kpọ Bible mfọn oro ẹn̄wọn̄ọde ndinọ. Wụt n̄wed Ifiọk, nyụn̄ dọhọ ke imọn̄ iwụt nte nnyịn isikamade enye nte un̄wam ndikpep Bible.
8 Utom ukwọrọikọ nnyịn ekpenyene ndiwụt udọn̄ esịt akpanikọ oro nnyịn inyenede ndin̄wam mbon esịt akpanikọ “ẹsịm ifiọk akpanikọ.” (1 Tim. 2:4) Ke ntre, nam ini odu ke ndutịm utom fo ndifiak mbịne owo kiet kiet oro afo okonịmde ediye uduot ekpri n̄wed ọnọ. Afo ndiwụt ata edikere mban̄a nnọ mmọ ekeme ndida n̄kosịm edin̄wam mbon oro ẹsemede ẹnyụn̄ ẹtuan̄ade ẹban̄a mme mbubiam n̄kpọ oro ẹnamde ke nsunsu ido ukpono man ẹnịm mmọ idiọn̄ọ ẹnọ edinyan̄a. (Ezek. 9:4, 6) Afo n̄ko eyekop idatesịt ye uyụhọ oro otode edifiọk nte ke afo ekpebe Jehovah ebe ke ndinen̄ede n̄kere mban̄a mbon en̄wen.—Men Philippi 2:20 domo.