Kwọrọ Obio Ubọn̄
1 Ke Mme Hebrew 10:23, ẹsịn udọn̄ ẹnọ nnyịn ẹte “isọn̄ọ imụm ikọ eke idade iyarade idot-enyịn ikama.” Ndien idotenyịn nnyịn ọkọn̄ọ ke Obio Ubọn̄ Abasi. Jesus ama owụk nnennen nnennen ete ke ana ẹkwọrọ eti mbụk Obio Ubọn̄ ke kpukpru idụt. (Mark 13:10) Oyom nnyịn inyene emi ke ekikere ke ini ibuanade ke utom ukwọrọikọ nnyịn.
2 Ke ini nnyịn isobode mme owo, nnyịn imesidomo nditọn̄ọ nneme ke n̄kpọ oro edemerede udọn̄ mmọ m̀mê ebehede mmọ. Nte ido edide nnyịn isisiak mme n̄kpọ oro mmọ ẹtịmde ẹmehe, utọ nte ubiatibet ke n̄kann̄kụk, mme mfịna n̄kparawa owo, mme editịmede esịt kaban̄a mme n̄kpọ uduuwem, m̀mê afanikọn̄ ke mme mbubehe ererimbot. Sia ekikere ata ediwak owo ẹwụhọde ke “ekikere uwem” ẹmi, ke ini nnyịn iwụtde ke nnyịn imekere iban̄a inyụn̄ ifiọk, mme owo ẹyewak nditịn̄ se idude mmọ ke ekikere. (Luke 21:34) Emi ekeme ndiberede usụn̄ nnọ nnyịn ndibuana idotenyịn nnyịn.
3 Nte ededi, edieke nnyịn mîkpemeke idem, nneme ekeme ndikọn̄ọ ke mme etikwo etikwo n̄kpọ tutu nnyịn ikpu ndiyọhọ uduak ediwaha nnyịn—ndikwọrọ etop Obio Ubọn̄. Okposụkedi nnyịn isidụride ntịn̄enyịn iwụt ndiọi idaha oro ẹdade ekese mfụhọ ẹdi, utịtmbuba nnyịn edi ndidụri ntịn̄enyịn n̄wụt Obio Ubọn̄, emi ke akpatre edikọkde ofụri mfịna ubonowo. Nnyịn imenyene ata utịbe utịbe idotenyịn oro mme owo ke mbrenyịn ẹnyenede ndikop mban̄a. Ntre ke adan̄aemi ikemede ndibem iso nneme ndusụk ikpehe “ndiọk eyo” ẹmi, nnyịn ikpenyene ndisọsọp n̄wụk ntịn̄enyịn ke akpan etop nnyịn, kpa “nsinsi gospel.” Ke usụn̄ emi nnyịn iyanam utom nnyịn ima.—2 Tim. 3:1; 4:5; Edi. 14:6.