Edisịn Enyịn̄ ke Ufọkn̄wed Utom Ukara Abasi
1 Ufọkn̄wed Utom Ukara Abasi edi n̄kpọutom ẹdade ẹnọ ediwak miliọn Mme Ntiense Jehovah ukpep nte mme asan̄autom eti mbụk. Ediwak nnyịn imeti nte ikokopde ndịk ye nte ikananade ukeme ke ini nnyịn ikesịnde enyịn̄ ke akpa ini ke ufọkn̄wed emi, ndien nnyịn idahaemi ye esịtekọm imọfiọk udeme esie ke n̄kọri eke spirit nnyịn nte mme etịn̄ikọ ye mme andikpep Ikọ Abasi. (Men Utom 4:13 domo.) Nte afo emesịn enyịn̄ ke n̄wọrọnda ufọkn̄wed emi?
2 Mmanie ẹkeme ndisịn enyịn̄? Page 73 ke Ẹtịm Man Inam Utom Nnyịn Ima ọbọrọ ete: “Kpukpru mbon oro ẹbuanade ifịk ifịk ye esop ẹkeme ndisịn enyịn̄, esịnede mbon oro ẹdụkde mme mbonoesop obufa obufa, ama akam edi mmọ idụhe uwem oro mîdụhe ke n̄kemuyo ye mme edumbet Christian.” Nnyịn imọnọ kpukpru owo oro ẹdotde—iren, iban, ye nditọwọn̄—ikot ndika mbịne esenyịn ufọkn̄wed nnyụn̄ ndọhọ enye esịn mmimọ enyịn̄.
3 Ndutịm Ufọkn̄wed eke 1997: Ndutịm Ufọkn̄wed Utom Ukara Abasi eke 1997 eyeneme ntatara nsio nsio ukpepn̄kpọ ye mme owo etịn̄de ẹban̄a ke Bible. Ke adianade ye edifori mme ukeme utịn̄ikọ ye eke unọ ukpep nnyịn, nnyịn ikpep n̄kpọ ito ediwak n̄kpọuto eke spirit oro ẹdude ke ukpepn̄kpọ esie ke urua kiet kiet. (N̄ke 9:9) Edieke nnyịn itịmde idem inọ ufọkn̄wed, emi esịnede ndikot edikot Bible eke urua ke urua, inyụn̄ idụkde kpukpru ini, nnyịn imekeme ndinyene akwa ufọn eke spirit nto ndutịm emi.
4 Ekese edikot Bible oro ẹdiomide ẹnọ Utịn̄ikọ Nọ. 2 ke 1997 ẹmụhọ ẹkan eke mme isua ẹmi ẹkebede. Ke ini etịmde idem ọnọ utịn̄ikọ emi, eyen ufọkn̄wed ekpenyene nditịm ndomo ini edikot esie nse ndien ekem ebiere udomo ini ke otu minit ition ẹnọde ikpehe esie emi enye edidade ke ntọn̄ọikọ ye utịtikọ. Emi ayan̄wam eyen ufọkn̄wed ndida ini esie nnam n̄kpọ ọyọhọ ọyọhọ nnyụn̄ mfori ukeme ukot n̄wed esie ye usọ utịn̄ikọ oro owo mîkamake n̄wed.—1 Tim. 4:13.
5 Ẹdian ikọ ntiense ido nneme nte usụn̄ oro ẹkemede nditịm nneme ke Utịn̄ikọ Nọ. 3, ẹmi ẹkọn̄ọde ke n̄wed Ifiọk. Ntem, eyenete an̄wan ekeme ndimek mfiakn̄ka, ukpepn̄kpọ Bible, m̀mê ikọ ntiense ido nneme nte usụn̄ oro ẹtịmde utịn̄ikọ emi. Nte ededi, ẹkpenyene ndisụk ndori akpan nsọn̄uyo ke unọ ukpep oro enyenede uforo inyụn̄ idịghe ke nte ẹtịmde.
6 Edide afo enyene ifet ndinọ utịn̄ikọ item, mme akpan n̄kpọ ẹtode Bible, m̀mê utịn̄ikọ eyen ufọkn̄wed, afo emekeme ndiwụt esịtekọm fo kaban̄a Ufọkn̄wed Utom Ukara Abasi ebe ke nditịm idem nnyụn̄ ndomo ikpehe fo nse mfọn mfọn, ebe ke ndinọ enye ye nsọn̄uyo ye ifiopesịt, ebe ke nditre ndidia ini, ebe ke ndikpan̄ utọn̄ nnọ nnyụn̄ nda item esenyịn ufọkn̄wed nsịn ke edinam, onyụn̄ ebe ke ndidomo ukeme kpukpru ini ndinọ utịn̄ikọ fo ke edinam akpanikọ. Ntem afo ndisịn enyịn̄ ke ufọkn̄wed edidi edidiọn̄ ọnọ fi ye ofụri mbon oro ẹdụkde.