“Bọp Ufọk Fo”
1 Nte eyịghe mîdụhe, ke kpukpru n̄kaowo ke ofụri ererimbot, uwem ubon ke abiara. Ererimbot Satan esịn idem ke abian̄a ye oburobụt ido. (1 John 5:19) Emi ọsọn̄ọ owụt nte edide usọp usọp n̄kpọ ọnọ nnyịn ‘ndibọp ufọk nnyịn’ nnyụn̄ n̄kpep mmọ en̄wen nte mmọ ẹkemede ndinam ukem oro nnọ ufọk mmọ.—N̄ke 24:3, 27.
2 Mme Edumbet Bible Ẹdi N̄kpọ Ukpeme: Ẹkụt ukpọhọde ata inemesịt ubon ke ndida mme edumbet Bible nsịn ke edinam. Mme okopodudu akpanikọ ẹmi ẹnyene ufọn ẹnọ kpukpru mme andibuana ke ubon ke ofụri ikpehe uwem. Ubon oro adade mmọ esịn ke edinam oyokop inemesịt onyụn̄ enyene emem Abasi.—Men Isaiah 32:17, 18 domo.
3 Ẹwụt mme edumbet oro ẹkemede ndin̄wam nnyịn ibọp ufọk nnyịn ke ibio ibio usụn̄ ke obufa n̄wed oro, Ukpọhọde Inemesịt Ubon. Ibuot kiet kiet eberi ye ọnọ-un̄wam ekebe unọ ukpep oro ọsọn̄ọde owụt mme edumbet oro oyomde mme andibuana ke ubon ẹti. Ekese ke otu ekebe ẹmi ẹtọn̄ọ ye mbụme oro, “Didie ke mme edumbet Bible ẹmi ẹkeme ndin̄wam . . . ?” Emi odụri ntịn̄enyịn owụt mme ekikere Abasi man otodo nnyịn inyene ekikere esie ke ibuot nneme oro ẹnemede.—Isa. 48:17.
4 Mehe ye n̄wed oro. Fiọk nte ẹkụtde mme edumbet oro ẹkemede ndin̄wam ke ini nsio nsio mfịna ẹdemerede. N̄wed oro eneme mme utọ n̄kpọ nte mmọemi: se owo okpoyomde ke ini ekerede aban̄a nsan̄andọ ini iso (ibuot 2), mme akpan ukpọhọde ẹmi ẹtatde usụn̄ adade esịm inemesịt ubon emi ebịghide (ibuot 3), nte mme ete ye eka ẹkemede ndibọk mme uyen mmọ ndikabade ndi ikpọ owo ẹmi ẹbiomde mbiomo, ẹbakde Abasi (ibuot 6), nte ẹkemede ndikpeme ubon mbiọn̄ọ mme akama-nsobo odudu (ibuot 8), mme edumbet ndin̄wam ubon emi ete m̀mê eka kpọt esede enyịn ndikụt unen (ibuot 9), un̄wam eke spirit ẹnọde mme ubon ẹmi mbumehe un̄wọn̄ ọkpọsọn̄ mmịn ye afai afịnade (ibuot 12), se ẹkpenamde ke ini mme mbọbọ ndọ ẹdude ke idaha ndiwụre (ibuot 13), se ẹkemede ndinam man ẹkpono mme ete ye eka oro ẹsọn̄de (ibuot 15), ye nte owo ekpenịmde ini iso oro ebịghide ọnọ ubon esie (ibuot 16).
5 Da Obufa N̄wed Emi Nam N̄kpọ Ọyọhọ Ọyọhọ: Edieke edide afo ukanamke-nam ntre, ntak mûkpepke n̄wed Inemesịt Ubon ọtọkiet nte ubon? N̄ko, ini ekededi oro ubon fo osobode mbufa mfịna m̀mê mme n̄kpọsọn̄ idaha, ẹdụn̄ọde mme ibuot ke n̄wed oro ẹmi ẹnemede ẹban̄a mmọemi, ẹnyụn̄ ẹkere ke akam nte ẹkpedade item oro ẹsịn ke edinam. Ke adianade do, ke March, tat ubọk ke ndidiomi ini nnọ utom ukwọrọikọ man otodo afo okpodomo ndiyak Ukpọhọde Inemesịt Ubon nsịn ke ubọk ediwak owo nte ekekeme.
6 Mme ubon oro ẹnyenede uten̄e Abasi ẹyesọn̄ idem ke n̄kan̄ eke spirit ẹnyụn̄ ẹdiana kiet ẹyenyụn̄ ẹtịm idem mfọn mfọn ndiyọ mme en̄wan Satan. (1 Tim. 4:7, 8; 1 Pet. 5:8, 9) Nnyịn iwụt esịtekọm didie ntem nte ke imenyene item Abasi otode Anditọn̄ọ ubon!