Ekebe Mbụme
◼ Ke ini ẹnọde esop ikot edin̄wam ndinam ndutịm ubụkowo, mme mbụme ẹtienede mi ẹkeme ndidemede:
Anie ọkpọnọ utịn̄ikọ ubụkowo? Emi edi ubiere oro mbonubon ẹnyenede ndinam. Mmọ ẹkeme ndimek eyenete ekededi emi ama akana baptism emi odude ke eti idaha. Edieke ẹdọhọde otu mbiowo ọnọ etịn̄ikọ, mmọ nte ido edide ẹyemek ebiowo oro odotde ọnọ utịn̄ikọ emi ọkọn̄ọde ke n̄wed utịn̄ikọ N̄ka. Okposụkedi owo mîditoroke akpan̄kpa, ekeme ndidot ndidụri ntịn̄enyịn n̄wụt n̄wọrọnda nti edu emi enye ekenyenede.
Nte ẹkeme ndida Ufọkmbono Obio Ubọn̄ nnam n̄kpọ? Ẹkeme edieke otu mbiowo ẹnọde unyịme ndien edieke enye mîtuahake ye ndutịm mbonoesop ofụri ini. Ẹkeme ndida ufọkmbono edieke edide akpan̄kpa oro ama ọwọrọ eti etop okonyụn̄ edi andibuana ke esop m̀mê ekpri eyen andibuana. Edieke edide owo oro ama ọwọrọ idiọk etop ke ido oro mîkedịghe eke Christian, mîdịghe edieke mme n̄kpọ efen ẹdude ẹmi ẹkemede ndibiat enyịn̄ esop, mbiowo ẹkeme ndibiere nditre ndiyak ẹda ufọkmbono ẹnam n̄kpọ.—Se n̄wed Utom Nnyịn, page 62-63.
Nte ido edide, owo idaha Mme Ufọkmbono Obio Ubọn̄ inịm edinam ubụkowo mbon ẹmi mînịmke ke akpanikọ. Idaha ẹsiode ẹfep ekeme ndidi edieke edide mbonubon oro ẹsụhọde ẹbuana ifịk ifịk ke esop nte mme asuanetop ẹmi ẹma ẹkena baptism, ediwak owo ke esop ẹma ẹdiọn̄ọ nte ke akpan̄kpa ama enyene eti edu aban̄a akpanikọ ye eti etop kaban̄a eti ido uwem ke n̄kann̄kụk, ndien owo ibuanke mme ido ererimbot ke ndutịm.
Ke ini ẹnọde unyịme ndida Ufọkmbono Obio Ubọn̄ nnam n̄kpọ, mbiowo ẹyekere ẹban̄a m̀mê edi ido ndinịm ekebe ke itie edinam ubụkowo. Edieke edide, mmọ ẹkeme ndinyịme ẹmen ẹdụk ẹdi ufọkmbono.
Nso kaban̄a edinam ubụkowo ẹnamde ẹnọ mbon ererimbot? Edieke akpan̄kpa oro ọkọwọrọde eti etop ke n̄kann̄kụk, eyenete ekeme ndinọ utịn̄ikọ Bible oro ọnọde ndọn̄esịt ke ufọk m̀mê okụre akpan̄kpa oro m̀mê ke itie udi. Esop eyesịn ndise mban̄a edibụk owo emi ẹdiọn̄ọde kaban̄a oburobụt ido oro mîkemke ye ibet m̀mê emi usụn̄uwem esie enen̄ede atuaha ye mme edumbet Bible. Ke akpanikọ eyenete ikpabuanake ye ọkwọrọ ederi ke ndinịm edinam mbuaha mbuọtidem m̀mê ke edinam ubụkowo ekededi emi ẹnịmde ke ufọkabasi Akwa Babylon.
Nso edieke edide ẹma esio akpan̄kpa oro ẹfep? Esop, nte ido edide, idisịnke idem. Owo ididaha Ufọkmbono Obio Ubọn̄ inam n̄kpọ. Edieke edide owo ama ọnọ uyarade edikabade esịt onyụn̄ owụtde udọn̄ edidi se ẹfiakde ẹda, ubieresịt eyenete ekeme ndiyak enye ọnọ utịn̄ikọ Bible ke ufọk m̀mê okụre akpan̄kpa oro m̀mê ke itie udi, man ọnọ mbon oro mînịmke ke akpanikọ ikọ ntiense onyụn̄ ọnọ mme iman oro ndọn̄esịt. Mbemiso anamde ubiere emi, nte ededi, oyowụt eti ibuot eyenete oro ndisobo ye otu mbiowo nnyụn̄ n̄kere mban̄a se mmọ ẹkemede nditeme enye anam. Ke mme idaha ẹmi mîdiwụtke eti ibuot eyenete oro ndibuana, ekeme ndidot eyenete emi edide andibuana ke ubon akpan̄kpa ndinọ utịn̄ikọ man ọdọn̄ mme iman oro esịt.
Ẹkeme ndikụt n̄kaiso ndausụn̄ ke mme nsiondi Enyọn̄-Ukpeme eke October 15, 1990, page 30-31; February 1, 1982, page 31; March 15, 1980 (Ikọmbakara), page 5-7; June 1, 1978 (Ikọmbakara), page 5-8; June 1, 1977 (Ikọmbakara), page 347-348; March 15, 1970 (Ikọmbakara), page 191-192; ye Awake! eke September 8, 1990, page 22-23, ye March 22, 1977, page 12-15.