Mbono District “Mbuọtidem ke Ikọ Abasi” eke 1997
1 Apostle Paul ama eti Timothy ete ke “ẹda odudu spirit Abasi ẹwet kpukpru N̄wed Abasi.” (2 Tim. 3:16, NW) Sia ẹdade odudu spirit ẹwet Ikọ Abasi, nnyịn imenyene kpukpru ntak ndinyene mbuọtidem ke enye. Ibuotikọ mbono district isua emi edi “Mbuọtidem ke Ikọ Abasi.” Ndutịm oro ọyọsọn̄ọ mbuọtidem nnyịn ke Bible, edide nnyịn imọfiọk akpanikọ ke ediwak isua m̀mê isụk idụk esop Jehovah ke ndondo emi. Kpukpru nnyịn ikpenyene ndidiomi ndidụk ofụri ndutịm oro. Edidi se ibọpde-bọp didie ntem edieke mbufa mbon oro ẹnyenede udọn̄, akpan akpan mbon oro nnyịn ikpepde mmọ Bible, ẹdidụkde ye nnyịn!
2 Mbono Usen Ita: Isua emi ẹdiomi ndutịm mbono district usen ita kaban̄a ufọn nnyịn. Kemi ẹdinịm mbono 110 ke Nigeria. Etisịm idahaemi ẹmetọt mbufo ẹban̄a mbono oro esop mbufo edidụkde, ndien akpana edi afo amanam ndutịm ndidụk ofụri ndutịm usen ita oro. Ndi afo ama aka ebịne eteutom fo man ọbọ ini utre utom oro oyomde? Edieke afo enyenede nditọ oro ẹdude ke isua uka ufọkn̄wed ndien mbono mbufo ọduọ ke ini ufọkn̄wed, ndi afo amasian mme andikpep mmọ ukpono ukpono nte ke mmọ ẹyefiak n̄wed ke Friday kaban̄a akpan ikpehe ubọ ukpep ido ukpono mmọ emi?—Deut. 31:12.
3 Ke adianade ye Ikọmbakara, mbono ẹyedu ke Abua, Edo, Efịk, Gokana, Gun, Hausa, Igbo, Ijaw, Ishan, Isoko, Khana, Tiv, Urhobo, Usem Idiọn̄ọ Mbon America, ye Yoruba.
4 Ndutịm editọn̄ọ ke Friday ke n̄kanika ebede 9 usenubọk ke minit 20, ndien editọn̄ọ ke Saturday ye Sunday ke n̄kanika usụkkiet usenubọk.
5 Ẹtịm Ẹnam ke Ndinọ N̄kpan̄utọn̄: Apostle Peter ama eti mme Christian akpa isua ikie ete ke mmọ ẹyetịm ẹnam ndinọ n̄kpan̄utọn̄ ke ikọ prọfesi nte utuenikan̄ eke ayamade ke n̄kịmn̄kịm ebiet. (2 Pet. 1:19) Ukem oro ke edi ye nnyịn. Ndidu uwem ke akani ererimbot emi odude ke idak ukara Satan mi etie nte ndidu ke n̄kịmn̄kịm ebiet. Nnyịn imowụt esịtekọm nte ke ẹma ẹkot nnyịn ẹsio ke ekịm eke spirit. (Col. 1:13; 1 Pet. 2:9; 1 John 5:19) Man ika iso idu ke un̄wana, oyom nnyịn inyene ọkpọsọn̄ mbuọtidem ebe ke ndinọ n̄kpan̄utọn̄ ke Ikọ eke odudu spirit Jehovah. Mbono district nnyịn isua emi edisịn udọn̄ ọnọ nnyịn ndikam nnam ntre.
6 Ekeme ndiyom ukeme ke n̄kan̄ nnyịn edieke anade iwụk ekikere ke ndutịm, edi ke akpanikọ ẹyediọn̄ nnyịn ke ndinam ntre. Nnyịn ikpenyene ndiduọk odudu mfọn mfọn mbemiso idide itie mbono man ikpodu ke edidemede ke mme ini ikpehe edinam. Nam ini awak ekem ndida nsịm itie mbono ke usen kiet kiet man otodo odu ke itie fo mbemiso ndutịm ọtọn̄ọde. Ekem buana ke ikwọ ye akam editọn̄ọ ke ini ndutịm usen kiet kiet ọtọn̄ọde. Ikpọ owo ẹkpenyene ndinịm uwụtn̄kpọ, mme ete ye eka ẹkpenyụn̄ ẹnyene ndinọ nditọ mmọ ukpep.—Eph. 6:4.
7 Edieke nnyịn isede mme ibuotikọ edinam mbemiso ndutịm usen kiet kiet ọtọn̄ọde, nnyịn imekeme nditọn̄ọ ndidori enyịn ke mme akpan n̄kpọ oro ẹkemede ndineme ke ini ikpehe edinam oro. Emi ayanam nnyịn inyene ntotụn̄ọ udọn̄ ke n̄kpọ oro ke ini ẹnemede. Nnyịn imekeme ndiyom mme akpan n̄kpọ oro ẹdin̄wamde nnyịn nditịn̄ nnọ mbon en̄wen ntak emi nnyịn inịmde Abasi ke akpanikọ ye enyene-nsọn̄ọ un̄wọn̄ọ esie ndinọ mbon oro ẹyomde enye ke ofụri esịt utịp. (Heb. 11:1, 6) Ẹtoro ẹte iwet n̄kpọ mbio mbio man an̄wam nnyịn nditi mme akpan n̄kpọ ke ndutịm. Edieke iwetde n̄kpọ ẹwak ẹkaha, nnyịn imekeme nditaba ndusụk akpan n̄kpọ ke ntak emi isịnde idem ikaha ke ndiwet n̄kpọ. Ayan̄wam nnyịn n̄ko ndinọ n̄kpan̄utọn̄ ọfọn akan ke ini itienede ise Bible nnyịn nte ẹkotde mme itien̄wed Abasi.
8 Isua oko ẹma ẹfiak ẹkụt ibat ibat ikpọ owo ye mme uyen ke nsio nsio mbono nte ẹyode ẹkanade itie mbono ẹnyụn̄ ẹsan̄ade ẹse mme owo ke adan̄aemi ndutịm okosụk akade iso, utu ke ndinọ n̄kpan̄utọn̄ ke se “asan̄autom emi anamde akpanikọ, onyụn̄ enyenede ọniọn̄” ọnọde kaban̄a ufọn nnyịn. Jesus ama ọn̄wọn̄ọ ndinọ nnyịn udia eke spirit ke edikem ini. (Matt. 24:45-47) Ke ntre, nnyịn inyene ndidu man ibọ ufọn ito udia oro ikûnyụn̄ iwụt unana esịtekọm. (2 Cor. 6:1) Etie n̄ko nte ke ini idem efenede ndusụk nditọwọn̄, mmọ ẹsiwak ndidọhọ ke iyom ndika itie utọk ikịm m̀mê itie ukaikọt nte ntak man ẹdaha ẹda ẹsan̄a ẹkanade. Eti ukpep oro ẹnọde ke ufọk nte ido edide oyosụhọde edinam isan̄ ndien ndien nte mîdotke n̄ka itie utọk ikịm m̀mê itie ukaikọt. Ndusụk ini, n̄kparawa ẹsitie ọtọkiet, ẹneme nneme, ẹdọn̄ odu, ẹnyụn̄ ẹwet n̄kpọ ẹnọ kiet eken. Oyom n̄kparawa owo nnyịn, ẹmi ẹsobode ediwak mfịghe mfịn, ẹnọ n̄kpan̄utọn̄ ke se ẹnemede, idịghe ndinam mme n̄kpọ efen ke ini ndutịm. Ẹkpenyene ndifep mme udọn̄ uyen ẹmi mîkemke ye mme edumbet Bible. (Men 2 Timothy 2:22 domo.) N̄kpan̄utọn̄ oro kpukpru owo ẹnọde, ikpọ owo ye mme uyen, ọyọnọ Jehovah ukpono onyụn̄ anam enye okop inemesịt.
9 Edieke oyomde kiet ke otu mme adaidaha ọnọ owo ekededi item ke mme n̄kpọ ẹmi, ẹkpenyene ndida enye nte ima ima item otode Jehovah. (Gal. 6:1) Kpukpru nnyịn ikpenyene nditi nte ke ntak anamde nnyịn isịn ukeme ndidụk mbono emi edi man otodo ikeme ‘ndikop nnyụn̄ n̄kpep.’ (Deut. 31:12) N̄ko, “enyene-ibuot owo oyokop onyụn̄ ọkọrọ ke se ekpepde.” (N̄ke 1:5) Ke ini osụhọde mbemiso odụkde mbono, ẹneme nte ubon ẹban̄a ufọn editie ọtọkiet ke otuowo, edidu ke itie ke ini ndutịm, nnyụn̄ nnen̄ede nnọ n̄kpan̄utọn̄, man otodo ẹbọ ọyọhọ ufọn ẹto ndutịm.
10 Mbanaidem Oro Enemde Jehovah Esịt: Ikọt Jehovah edi n̄kpọ ndise ẹnọ ofụri ererimbot. (1 Cor. 4:9) Ẹdiọn̄ọ nnyịn nte otu kaban̄a nti idaha usịnen̄kpọ ye ukamaidem nnyịn. Ndida mme edumbet N̄wed Abasi ẹkụtde ke 1 Timothy 2:9, 10 ye ke 1 Peter 3:3, 4 nsịn ke edinam omosụn̄ọ ke ikpọ ukpụhọde ke ukamaidem ediwak owo ke ndimen ndomo ye nte mmọ ẹketiede ke ini ẹketọn̄ọde-tọn̄ọ ndibuana ye esop Christian. Emi edi ata isio ye mme idaha usịnen̄kpọ ye ukamaidem ẹmi ẹkade-ka iso ndidiọk oro nnyịn ikụtde ke ererimbot. Oyom nnyịn idu ke ukpeme mbak nnyịn idibiet ererimbot ke ukamaidem nnyịn—ndisịne edisịnen̄kpọ emi etiede esen esen, ndisịn udọn̄ nnọ n̄kon̄ine ererimbot ke ido unamidet, m̀mê ndisịne n̄kpọ nte mîwụtke iso o-bụt. Eti uwụtn̄kpọ nnyịn ke usịnen̄kpọ ye ukamaidem nnyịn ekpenyene ndin̄wam mbufa owo ẹmi ẹdụkde mbono ndikụt nte mme Christian ẹkpebanade idemmọ.
11 Ke adan̄aemi edu ẹkekụtde nte ofụri nditọete enyenede nte utịp mbono isua oko ọkọfọnde etieti, usịnen̄kpọ ye ukamaidem ererimbot ẹka iso ndidi mfịna ẹnọ ndusụk nditọete iren ye iban nnyịn, akpan akpan ke ini nduọkodudu. Ke adan̄aemi inamde ndutịm ndidụk mbono, nnyịn ikpenyene ndidụn̄ọde idem nnyịn kaban̄a usịnen̄kpọ ye ukamaidem nnyịn. Mme ete ye eka, ẹda eti ibuot ẹkpeme se n̄kpri nditọ ye mme uyen mbufo ẹdisịnede. Ẹkụt ẹte ke nnyịn iyakke mme ido unam n̄kpọ ye n̄kon̄ine ererimbot ẹnyene idiọk utịp ke ukamaidem Christian nnyịn.
12 Nyene Eti Ido: Eti ido edi idiọn̄ọ mme ata Christian. (1 Pet. 2:12) Eduuwem nnyịn ke ebiet ekededi oro nnyịn ikemede ndidu—ke mbono, ke mme an̄wan̄wa ebiet, ye ke mme itieidụn̄ nnyịn, ọkọrọ ye ke ini ikade isan̄—ẹkeme ndinọ eti ikọ ntiense ẹnyụn̄ ẹn̄wam mbon en̄wen ndikụt se mbuọtidem ke Abasi ye ke Ikọ esie ekemede ndinam nnọ mme owo. Emi ekeme ndinụk ndusụk owo ndidi ndifiọk Jehovah. (Men 1 Peter 3:1, 2 domo.) Nnyịn imenyene ifet edida ido nnyịn nnọ Abasi ubọn̄. Kọmiti Itie Mbono kiet ekewet ete: “Emem emem idaha oro okodude [ke] mbono ke ini ikpehe edinam kiet kiet ye ke ama okokụre anam nnyịn ikop idatesịt.” Ntọt mmọ ama aka iso etịn̄ ete: “Mme ete ye eka ẹma ẹnen̄ede ẹdiana kiet inyụn̄ iyakke nditọ mmọ ẹyo ẹkanade.” Ntọt otode itie mbono efen ọkọdọhọ ete ke “nditọete ẹma ẹmụm n̄kokon̄ idaha ke eti ndutịm ẹkama ke ofụri ini mbono oro.” Ọbọn̄ kiet emi okodụkde kiet ke otu mbono ama okop inemesịt aban̄a ido mme andidụk. Enye ọkọdọhọ ete: “Ami mmaka nsio nsio esop ido ukpono . . . Nte ededi mmokụt nte ke ndusụk ukpụhọde ẹdu ke ufọt mbufo ye mmọ. Ke uwụtn̄kpọ, mma n̄kụt mme bodisi ye mbon ukpeme efen ke mme mbono ido ukpono mmọ eken, edi n̄kwe n̄kpọ ekededi ntre mi. . . . Mbufo ẹmenen̄ede ẹnam se mbufo ẹkpepde.” Ndikot mme utọ ntọt ẹmi edi n̄kpọ inemesịt, nte idịghe? Nte ededi, oyom nnyịn idu ke ukpeme, man ikeme ndikpeme eti enyịn̄ ikọt Jehovah.
13 Ẹmenọ ediwak n̄kpọ editi ẹban̄a edikpeme nditọ nnyịn, ikûyak mmọ ẹfehe ẹkanade ye unana edise enyịn mban̄a, ẹfịnade mbon efen. Isua kiet kiet, N̄ka esibọ mme ntọt nte ke owo isinọhọ ndusụk nditọ nnyịn ukpeme ke esịt ye ke an̄wa efe mbono m̀mê ke ẹsikụt mmọ ẹfehede ẹkanade an̄wa mbono. Okonyụn̄ edi n̄kpọ n̄kpaidem ndibọ ntọt nto mbono kiet nte ke “ẹma ẹmụm eyeneren kiet edide n̄kpọ nte isua 12 ke emana nte eyịpde okụk ke kiet ke otu ekebe etịbe.” Okposụkedi mme mbono ẹnọde nnyịn ifet ndika n̄kese nnyụn̄ mbuana ye otu nditọete nnyịn, ana mme ete ye eka ẹsụk ẹnyene mbiomo mmọ ke ekikere ndise nditọ mmọ enyịn kpukpru ini. Emi edi mbiomo oro Jehovah odoride kpukpru ete m̀mê eka ke idem. (N̄ke 1:8; Eph. 6:4) Mme edinam unana ukpeme nditọwọn̄ ẹkeme ndibiat eti enyịn̄ oro Mme Ntiense Jehovah eken ẹkenamde utom ọkpọsọn̄ ndinyene. (N̄ke 29:15) Mme ibat ibat ikpehe efen ẹdu ẹmi ẹkemede ndinam n̄kọri. Ke ndusụk itie ediwak owo ẹkemek nditie ke idak eto m̀mê ke mme itieidụn̄ mmọ, ẹnyụn̄ ẹnọ esisịt n̄kpan̄utọn̄ ke ndutịm. N̄ko, ke mme ibat ibat idaha, ndusụk owo ẹma ẹyak idem ẹnọ idomo edida mbono nnam mbubịne. Mmọ ndusụk ini ẹma ẹka anyan ẹkesịm udomo ẹwetde ibuotikọ mbono ke mme n̄kpọ ẹsiode ẹdi ndinyam ke itie mbono. N̄ka inyịmeke emi.
14 Ndise Mban̄a Mme Ubiatokụk Mbono: Kpukpru nnyịn iyabiat okụk ke ebuana ye edidụk mme mbono. Ubiatokụk efen odu ọfọnde nnyịn ikere iban̄a. Ọsọn̄ urua ndise mban̄a itie oro ẹdade ẹnịm mme mbono. Mme ubiatokụk efen ẹdu n̄ko oro anade ẹse ẹban̄a. Mbọk ẹti ẹte ke idahaemi ekpere ndidi ẹnyene ofụri etịbe unyịmesịt ẹto mme ekebe etịbe sia itie udia mîdụhe, edi sụk mfefere udia ẹn̄wam ke ndise mban̄a mme ubiatokụk. Kpa nte ekedide ke Israel eset, “yak owo okûdi ke iso Jehovah ubọk ubọk.” (Deut. 16:16) Ẹdara mme etịbe unyịmesịt nnyịn ẹmi ẹnọde ke ntatubọk ke mme mbono etieti.—Utom 20:35; 2 Cor. 9:7, 11, 13.
15 N̄kpọitie: Mme ndausụn̄ oro ẹma ẹkenọ ke ediwak isua ẹyeka iso ndinyene ufọn, oro edi, ẸMEKEME NDIMỤM N̄KPỌITIE NNỊM NNỌ MBONUFỌK MBUFO IKPỌN̄ÎKPỌN̄ YE OWO EKEDEDI ORO EKEMEDE NDIDI ASAN̄A YE MBUFO KE MOTO MBUFO. Edi eti n̄kpọ ndikụt nte ke ediwak owo ke ẹtiene mme ndausụn̄ ẹmi ke mme isua ndondo emi, ndien emi ememenede ima ima idaha ẹwụtde ke mme mbono. Ke ata ekese itie mbono enen̄ede emem utom ndisan̄a n̄kesịm ndusụk n̄kpọitie akan mmọ eken. Mbọk wụt edikere mban̄a, nyụn̄ kpọn̄ mme n̄kpọitie oro eferede owo ke idem ẹkan nọ mbon ẹmi mme idaha mmọ ẹyomde.
16 Mme Ukwak Usio Ndise, Ukwak Umụm N̄kpọ Vidio, ye Mme N̄kpọ Umụmikọ: Ẹkeme ndikama mme ukwak usio ndise ye mme n̄kpọ umụm n̄kpọ ke mme mbono. Nte ededi, inaha nnyịn ndikama mmọ ọwọn̄ọde ntịn̄enyịn mbon oro ẹdụkde. Nnyịn ikpenyeneke ndisan̄a n̄kanade ke mme ini ikpehe edinam ndisio mme ndise, sia oro edifịnade mbon eken ẹmi ẹdomode ndiwụk ntịn̄enyịn ke ndutịm. Owo inyeneke ndifak n̄kpọ umụm n̄kpọ ndomokiet ke ikan̄ ilektrik m̀mê ke ndutịm ukwak utịn̄ikọ, m̀mê ndiyak n̄kpọutom emi esịri usụn̄ emi ẹsan̄ade m̀mê ndibiọn̄ọ mbon en̄wen.
17 Akpa Usọbọ: Itieutom Akpa Usọbọ edi kaban̄a mme mbabuat n̄kpọntịbe ikpọn̄îkpọn̄. Enye ikemeke ndise mban̄a mbon oro ẹnyenede uyịre uyịre udọn̄ọ. Ntak edi oro afo ekpenyenede ndikere mban̄a idaha nsọn̄idem fo ye eke ubon ke mbemiso. Mbọk da ibọk utoenyịn, aspirin, se in̄wamde udia ataha, ubọp unan, mme pin, ye mme mbiet n̄kpọ ntre, sia mme utọ n̄kpọ ntre mîdidụhe ke mbono. Mme owo ekededi ẹmi ẹnyenede udọn̄ọ ndisi, udọn̄ọ isiọn̄, mme mfịna esịt, ye ntre ntre eken, ẹkpenyene ndikere mban̄a se mmọ ẹdiyomde nte ẹkekeme. Mmọ ẹkpenyene ndinyene mme ibọk oro ẹyomde, ndien andibuana ke ubon m̀mê ke esop emi ọfiọkde idaha mmọ ekpenyene ndidu do kpukpru ini ndinọ un̄wam ekededi oro ẹyomde. Edieke ndusụk owo ẹmi ẹnyenede akpan udọn̄ọ mînyeneke mbonubon ẹmi ẹkemede ndin̄wam mmọ, oyom ẹsian mbiowo esop mmọ ẹban̄a idaha ẹnyụn̄ ẹnam ndutịm oyomde man ẹn̄wam.
18 Udia ke Mbono: Nte akpa ini, owo idinamke inyụn̄ inọ udia ke ikpọ mbono isua emi. Emi ayanam ata ediwak owo ẹnyene ifụre ke ofụri ini ikpehe edinam ndiwụk ntịn̄enyịn ke udia eke spirit. Ẹbọ ediwak ikọ esịtekọm ẹban̄a ukem mmemmem usụn̄ edinam emi tọn̄ọ ẹketọn̄ọ ndutịm emi ke mbono circuit ye usen akpan mbono. Kpukpru owo ẹkpenyene ndiben̄e idem nnyụn̄ nda mfefere, ọnọ-nsọn̄idem udia mmọ ndidia ke ini nduọkodudu uwemeyo, utọ nte mbon oro ẹkenọde ekikere ẹban̄a ke leta eke May 15, 1997, emi ẹkenọde ẹsọk kpukpru esop. Nnyịn imesịn udọn̄ inọ mbufo ndidia udia uwemeyo mbufo ke efe mbono. Emi edi eti ifet ndiduọk odudu nnyụn̄ mbuana ye mbon oro ẹtiede ẹkan fi ẹkụk. Nnyịn n̄kukụre isịn udọn̄ inọ fi ndinam n̄kpọ asana ndien kûdehe ebiet oro afo etiede. Mbọk kwọhọde mben̄e udia ekededi nyụn̄ dọn̄ mmọ ke n̄kpọ udọn̄ mbio ọkọrọ ye mme n̄kpọ ubọpn̄kpọ, babru, ye mbio eken ekededi. Itieutom unịm ebiet asana ekpenyene ndidu ke edidemede ndinam mme n̄kpọ mbio ẹdu ẹnọ emi ke efe mbono. Owo ikpenyeneke ndida n̄kpọsọn̄ mmịn, esịnede mmịn Efịk ye ufọfọp, ndi itie mbono. Iwụtke eti ibuot ndin̄wọn̄ n̄kpọsọn̄ mmịn ke mme ini nduọkodudu. Mme n̄kpọ usịn udia ẹdade ẹdi efe mbono ẹkpenyene ndidụk ufan̄ udịm n̄kpọitie ikponyụn̄ inyeneke ndisịri usụn̄. Ẹma ẹkụt ndusụk ke otuowo ẹdiade ẹnyụn̄ ẹn̄wọn̄de n̄kpọ ke ini ndutịm. Ndinam emi edi unana ukpono. N̄ko, ẹma ẹkụt ndusụk owo ẹkade ndidep n̄kpọ nto mme anyamudia ke ini ndutịm. Utọ edinam oro idotke.
19 Nnyịn imenen̄ede iwụt esịtekọm iban̄a usọrọ eke spirit ye ọnọ-nduọkodudu, emem emem idaha ebuana ke ibio ibio ini nduọkodudu uwemeyo nnyịn. Ke ndinam n̄kpọ ekekem ye uduak ndutịm emi, utu ke ndikpọn̄ itie mbono n̄ka ndidep udia ke ini nduọkodudu uwemeyo, mbọk san̄a ye n̄kpọ di. Mfefere udia oro ẹnamde ẹdu idahaemi edi n̄kukụre kaban̄a mbabuat udọn̄ owo inyụn̄ inamke inọ ediyụhọ ofụri udọn̄ udia nnyịn. Ntem, afo eyenyene ekese ini ndidara ebuana nditọete mbufo iren ye iban. Nnyịn imesịn udọn̄ inọ mbufo nditiene ukem ndutịm emi nditọete nnyịn ke ofụri ererimbot ẹtienede mi. Ke ndinam ndutịm mban̄a udia uwemeyo fo, ti mme ubuene ye mbon unana.
20 Nnyịn ikop idatesịt didie ntem nte Mbono District “Mbuọtidem ke Ikọ Abasi” ọmọn̄ ọtọn̄ọ ke mîbịghike! Oyom kpukpru nnyịn ikụt ite ke imanam ntịmidem nnyịn man idụk ofụri ndutịm, man otodo ikeme ndidara akwa usọrọ eke spirit emi Jehovah etịmde ọnọ nnyịn ebe ke esop esie ọyọhọ ọyọhọ. Ke usụn̄ oro nnyịn ‘iyeben̄e idem ke kpukpru nde ndinam eti utom ekededi’ ke mme usen oro ẹdide ke iso.—2 Tim. 3:17.
[Ekebe ke page 6]
Mme N̄kpọ Editi Mbono District
Baptism: Mbon baptism ẹkpenyene nditie ke ikpehe oro ẹmekde ẹnịm ẹnọ mmọ mbemiso ndutịm ọtọn̄ọde ke usenubọk Saturday. Owo kiet kiet oro aduakde ndina baptism ekpenyene ndisan̄a ye ọfọn̄ uyeremmọn̄ eke owụtde iso o-bụt ye ọfọn̄ ukwọhọdeidem. Ke ini edem ndusụk owo ẹma ẹsịne ọfọn̄ oro mîdotke onyụn̄ odụride ntịn̄enyịn ọkpọn̄ edinam oro. Mbiowo ẹmi ẹdụn̄ọrede mme mbụme ke n̄wed Utom Nnyịn ye mbon baptism ẹkpenyene ndikụt ẹte ke mme akpan n̄kpọ ẹmi ẹn̄wan̄a owo kiet kiet. Sụk mbon oro ẹma ẹkekụre ukpepn̄kpọ Bible ke n̄wed Ifiọk emi otu mbiowo ẹnyụn̄ ẹnọde unyịme ke ẹkpenọ Baptism Statement. Ke etịn̄ikọ ama okokụre utịn̄ikọ baptism onyụn̄ ọbọn̄ akam, etieibuot okpokoro edinam ayasiak ikwọ. Ke ẹma ẹkekwọ akpatre udịm ikwọ, mme adaidaha ẹyeda mbon baptism usụn̄ ẹka itie emi ẹdibụhọde ke mmọn̄. Mbọk kûkpọn̄ itie fo mbemiso etieibuot okpokoro edinam ọtọtde ke ẹberi ikpehe edinam oro. N̄ko kûfefehe m̀mê ndibobụmede n̄ka itie emi ẹdibụhọde ke mmọn̄. Baptism ke idiọn̄ọ uyakidem owo nnọ edi n̄kpet n̄kpet ye ọkpọkpọ mbubehe ke ufọt owo oro ye Jehovah. Ntem, idotke mbon baptism ndifat kiet eken n̄kama m̀mê ndimụm ubọk ke adan̄aemi ẹnade baptism.
Mme Kad Idiọn̄ọ: Mbọk dian kad idiọn̄ọ 1997 kpukpru ini ke adan̄aemi odude ke obio mbono ye ke adan̄aemi anamde isan̄ aka onyụn̄ ọnyọn̄de-nyọn̄. Emi esiwak ndinọ nnyịn mme ifet ndinọ eti ikọ ntiense. Ẹkpenyene ndibọ kad idiọn̄ọ ye efọk ebe ke esop mbufo, sia mmọ mîdidụhe ke itiembono. Kûbet tutu osụhọ usen ifan̄ ndisịm mbono mbemiso oyomde kad fo ye eke ubon fo. Ti ndikama kad Medical Directive/Release fo eke idahaemi.
Itieidụn̄: Nnyịn imafiak iben̄e edidianakiet ito kpukpru owo kaban̄a ufọkidụn̄ oro itiembono ọnọde. Edieke nnyịn ifụmide ndutịm N̄ka inyụn̄ ikọbọ ufọkidụn̄ oro itiembono ama ọkọbọbọ, nnyịn ibiat ọkpọsọn̄ utom oro nditọete nnyịn ẹmi ẹkediomide se imemde urua ikan ẹkenamde. EDIEKE AFO ENYENEDE MFỊNA KE UFỌKIDỤN̄, mbọk kûmen̄e ndidụri ntịn̄enyịn esenyịn Itieutom Unọ Ufọkidụn̄ ke itiembono oro n̄wụt man enye ekeme ndin̄wam fi ndikọk mfịna oro inikiet inikiet. Mme ewetn̄wed esop ẹkpenyene ndikụt nte ke ẹnọ mme babru Special Needs Room Request ke eti ini ẹka nnennen adres mbono. Edieke anade afo abiat ndutịm ufọkidụn̄ oro ẹkenamde ẹbe ke ndutịm san̄asan̄a udọn̄, afo ekpenyene nditọt enyeneufọk ye Itieutom Unọ Ufọkidụn̄ usọp usọp man ẹkeme ndifiak mmen ubet oro nnọ owo efen. KÛNỌ mme babru Room Request oro ẹma ẹkewet n̄kpọ ẹyọhọ ẹsọk N̄ka. Ẹnọ mmọ nnennen ẹsọk Itieutom Unọ Ufọkidụn̄ ẹdade nnennen adres ke edem babru oro.
Utom Unyịmesịt: Nte afo emekeme ndisio ini nnịm ke mbono emi man an̄wam ke kiet ke otu itieutom? Ndinam n̄kpọ nnọ nditọete nnyịn, ekpededi ke hour ifan̄, ekeme ndinen̄ede nnọ un̄wam onyụn̄ ada ekese ọkpọkpọ uyụhọ edi. Edieke afo ekemede ndin̄wam, mbọk ka kowụt idemfo ke Itieutom Utom Unyịmesịt ke itie mbono. Nditọwọn̄ oro mîsịmke isua 16 ke emana ẹkeme n̄ko nditịp n̄kpọ nsịn ediye ediye ebe ke ndinam utom ke idak ndausụn̄ ete m̀mê eka m̀mê akamba owo efen oro odotde.
Ikọ Ntọt: Du ke edidemede ban̄a mme mfịna oro ẹkemede ndidemede man ekpefep mme mfịna oro mîdotke. Ediwak ini mme inọ ye mme oburobụt owo eken ẹsiyịp n̄kpọ mbon oro ẹwọrọde ẹkpọn̄ n̄kann̄kụk ufọk mmọ. Kụt ete ke ọmọkọbi moto fo kpukpru ini, ndien kûdede ukpọn̄ n̄kpọ ndomokiet oro ẹkemede ndida n̄kụt oro esịnde owo oyom ndibom ndụk. Mbon n̄wo ye mme inọ ekpatọfọn̄ ẹsiwụk ntịn̄enyịn mmọ ke ikpọ otu. Ikpowụtke eti ibuot ndikpọn̄ ọsọn̄urua n̄kpọ ekededi ke n̄kpọitie fo. Afo ukemeke ndifiọk m̀mê kpukpru owo ẹmi ẹdude ẹkpere fi ẹdi Christian. Ntak emi enịmde n̄kpọ idomo ekededi? Ẹma ẹbọ mme ntọt ẹban̄a nte ndusụk mbonan̄wa ẹkedomode nditap nditọwọn̄ nda ndaha. NAM NDITỌ FO ẸDU KE EBIET EMI EKEMEDE NDIKỤT KPUKPRU INI.