“Sịn Ifịk”
1 Ke ini ikayakde idem nnyịn inọ Jehovah, nnyịn ima in̄wọn̄ọ ndinọ enye ofụri ukeme nnyịn. Nte odotde, apostle Peter ama esịn udọn̄ ọnọ mme Christian akpa isua ikie ndisịn ifịk mfiọk idaha mmọ ke iso Jehovah. (2 Pet. 1:10) Nnyịn ke akpanikọ iyom ndisịn ifịk man inem Jehovah esịt ke ndinam n̄kpọ nnọ enye mfịn. Nso ke emi abuana? Nte itie ebuana nnyịn ye Jehovah enen̄ede otụn̄ọ nnyịn inyụn̄ itiede ikere iban̄a kpukpru se enye anamde ọnọ nnyịn, esịt onụk nnyịn kpukpru ini ndisịn ofụri ukeme nnyịn ke utom esie. Nnyịn iyom ndifori uduot ndien, ke ebiet ikemede, ikọri udomo utom nnyịn.—Ps. 34:8; 2 Tim. 2:15.
2 Ekpri eyenete eren emi okoyomde ndinam ekese ke utom ukwọrọikọ ama okụt nte ke edikpep Ikọ Abasi kpukpru ini ama anam esịtekọm oro enye enyenede ọnọ Jehovah enen̄ede otụn̄ọ onyụn̄ anam enye enyene ifịk oro okponde akan. Emi ama onụk enye ndisịn eben̄e utom usiakusụn̄. Eyenete an̄wan emi ekedide ọkpọsọn̄ n̄kpọ ọnọ enye ndinyene nneme ye isenowo ama esidomo ndusụk nneme ke ekpri n̄wed Nte Ẹkpetọn̄ọde Ẹnyụn̄ Ẹkade Iso ke Nneme Bible ndien ikebịghike ama ọtọn̄ọ ndikụt unen oro okponde akan ke utom ukwọrọikọ esie. Enye ama ekeme ndinịm ukpepn̄kpọ Bible ye ebe ye n̄wan emi ẹkebọde akpanikọ.
3 Dat Esịt ke Se Afo Ekemede Ndinam: Ndusụk nnyịn imesisobo utọ n̄kpọsọn̄ idaha nte unana nsọn̄idem, ubiọn̄ọ otode ubon, unana, m̀mê unana udọn̄ ke efakutom. Ediwak mfịna eken oro ẹdide ọsọ ke mme ukperedem ini ẹmi ẹkeme ndibiọn̄ọ utom nnyịn. (Luke 21:34, ikọ idakisọn̄ NW; 2 Tim. 3:1) Ndi emi ọwọrọ ke nnyịn imokpu ke uyakidem nnyịn nnọ Jehovah? Baba edieke nnyịn inamde n̄kpọ inọ enye ke ofụri ukeme nnyịn.
4 Iwụtke eti ibuot ndida se mbon en̄wen ẹkemede ndinam mbiere ikpe nnọ idem nnyịn. Utu ke oro, N̄wed Abasi esịn udọn̄ ọnọ nnyịn ete “yak owo kiet kiet odomo utom esie ese.” Ndinọ idem nnyịn ọyọhọ ọyọhọ ke udomo oro nnyịn ikemede ọkpọkpọ enem Jehovah esịt onyụn̄ anam nnyịn inyene se ‘ibụrede iban̄a idem.’—Gal. 6:4; Col. 3:23, 24.
5 Nnyịn ikpakam inam mme ikọ Peter ‘ndinyene ifịk man Abasi ekpesịm nnyịn nte itiede ke emem, inana ntọi, inyụn̄ inana ndo.’ (2 Pet. 3:14) Edu oro ayanam nnyịn ikop ifụre oyonyụn̄ anam nnyịn inyene ifụre ekikere oro Jehovah ikpọn̄ ekemede ndinọ.—Ps. 4:8.