Mme Ete ye Eka—Ẹnọ Nditọ Mbufo Ukpep Ndikwọrọ Ikọ
1 Mme esop nnyịn ẹnyene ekese nditọwọn̄ ẹmi ẹnyenede udọn̄ esịt akpanikọ ndinam n̄kpọ Abasi. (Eccl. 12:1) Mmọ ẹsịne ke otu mbon oro Jehovah ọnọde ikot ndibuana ke nditoro imọ. (Ps. 148:12-14) Ntem, ukpep eke usen ke usen oro mme ete ye eka ẹnọde nditọ mmọ ekpenyene ndisịne item ke nte ẹkemede ndibuana mbuọtidem mmọ ye mbon en̄wen ke utom ukwọrọikọ Obio Ubọn̄.—Deut. 6:6, 7.
2 Nọ Nditọwọn̄ Ukpep ke Adiana ke Adiana: Odot ndinọ nditọwọn̄ ukpep ndisan̄a ye ete ye eka mmọ ke utom ukwọrọikọ ke ata ntọn̄ọ ntọn̄ọ isua emana. Mbemiso ẹkade ukwọrọikọ, ẹtịm nditọ mbufo idem ndibuana ke usụn̄ oro enyenede se ọwọrọde. Ẹbem iso ẹbiere se mbufo ẹdoride enyịn mmọ ndinam ke enyịnusụn̄. Ata n̄kpri nditọ ẹkeme ndinọ mme tract ye mme n̄wedikot ẹnyụn̄ ẹnọ mme owo ikot ndidi Ufọkmbono Obio Ubọn̄. Ẹkeme ndidọhọ n̄kpri owo ẹmi ẹdiọn̄ọde ndikot n̄wed ọfọn ẹte ẹkot mme itien̄wed Abasi ke enyịnusụn̄. Mmọ ẹkeme ndinọ mme magazine, ẹkamade ibio ibio nneme. Nte mmọ ẹkọde ifiọk, ẹnọ mmọ ukpep ndida Bible nnam n̄kpọ ke nneme mmọ. Ediwak n̄kpri asuanetop ẹmetọn̄ọ mme afan̄ magazine mmọ ẹnyụn̄ ẹsinam mme mfiakn̄ka kpukpru ini. Etịm ọfọn eyenọwọn̄ asan̄a ye akwa owo utu ke ndisan̄a ye uyen en̄wen. Akwa owo ekeme ndinam an̄wan̄a enyeneufọk nte ke ẹnọ ekpri owo emi ukpep ke utom ukwọrọikọ.
3 Ekpri eyenan̄wan kiet ama oyom un̄wam oto mbiowo man enye odot ndidi asuanetop Obio Ubọn̄. Idem okposụkedi enye ekedide isua ition kpọt ke ini oro mîkonyụn̄ ifiọkke ndikot n̄wed, enye ama ekeme ndinọ etop Obio Ubọn̄ uforo uforo ke mme enyịnusụn̄. Enye ama esimụm mme ikpehe itien̄wed Abasi ọdọn̄ ke ibuot, okụbọde mmọ, ọdọhọ enyeneufọk ete okot mmọ, ndien ekem enye anam an̄wan̄a.
4 Ẹkpenyene n̄ko ndikpep nditọ mban̄a ufọn edinyene eti ndutịm kaban̄a edibuana kpukpru ini ke utom ukwọrọikọ ebe ke uwụtn̄kpọ ete ye eka. Oyom mme ete ye eka ẹnyene ndutịm edinam ofụri ini eke urua ke urua emi enyenede iwụk ẹnọ ukwọrọikọ ẹnyụn̄ ẹyịre ke enye, man otodo nditọ ẹfiọk m̀mê ini ewe ke urua ke ẹnịm kpukpru ini ẹnọ utom ukwọrọikọ.
5 Ke ini ẹnọde nditọ ukpep ndima nnyụn̄ n̄kop inem utom ukwọrọikọ toto ke uyen, oyonụk mmọ ndinyanade mbịne mme ifetutom ẹmi ẹkponide ẹkan ke ini iso, iso-ọfọn esịnede utom usiakusụn̄. (1 Cor. 15:58) Kpukpru nnyịn ikpenyene ndisịn udọn̄ nnọ nditọ ẹdude ke otu nnyịn ndinam eti n̄kọri nte mme anditoro Jehovah.