Beri Edem ke Jehovah Ndinam N̄kpọ Ẹkọri
1 “Mma n̄kụt n̄wọrọnda idatesịt oro odude ke ndisiak obufa esop ke akpa ini. Emi ama ada se ibede ifịk ifịk utom isua iba, akam ofụri ini ye ediberi edem ke Jehovah emi ‘n̄kọri otode.’” Ntre ke asiakusụn̄ emi anamde utom ofụri esịt emi ọkọfiọkde ufọn ediberi edem ke Jehovah kaban̄a n̄kọri, ekewet. (1 Cor. 3:5-9) Ke ediyom oro nnyịn iyomde mme owo oro ẹnyenede udọn̄ ke n̄kpọ eke spirit, nnyịn n̄ko imoyom un̄wam Abasi edieke anade utom nnyịn on̄wụm mfri.—N̄ke 3:5, 6.
2 N̄kọri Oyom Editọ: Oyom ẹtọ n̄kpasịp akpanikọ edieke anade ọkọri. Edifiak n̄waha ke ufan̄ usen kiet m̀mê iba ke ẹma ẹkewaha ke akpa ini esiwak ndida nti utịp ndi. Tie ufiop ufiop ye ufan ufan. Nam owo enye eken enyene ifụre. Kûtịn̄ ikọ ikpọn̄. Yak enye ọfiọk fi, nyụn̄ wụt ete ke afo emenyene udọn̄ ke idemesie nte owo.
3 Ke July ndien tutu esịm August, nnyịn iwụk ntịn̄enyịn ke ndinọ mme owo ẹmi isobode nsio nsio ndiye uduot n̄kpri n̄wed. Nte ededi, oyom nnyịn n̄ko inam n̄kpọ iban̄a udọn̄ oro ikụtde ye mme n̄wed oro inịmde. Nnyịn inam emi ebe ke ndinam mme mfiakn̄ka ye edinịm mme ukpepn̄kpọ Bible. (Matt. 28:19, 20) Ke ntak emi, ẹkeme ndida ediye uduot ekpri n̄wed Oyom ntọn̄ọ mme ukpepn̄kpọ. Afo emekeme ndikụt nte mme ekikere inan̄ ẹtienede mi ẹdide n̄kpọ un̄wam.
4 Edieke afo ekenyenede nneme ye owo emi ekekerede aban̄a mme idiọk idaha ererimbot, afo emekeme ndifiak ntọn̄ọ nneme oro ebe ke ndidọhọ ete:
◼ “Mmenịm ke akpanikọ nte ke afo emekere aban̄a mbiara ido uwem n̄kaowo ukem nte ami n̄kerede. Nnyịn imesikop mme mfụhọ mfụhọ etop iban̄a afai esịtufọk, osụn̄ọde ke edinam n̄kpọ ye nditọwọn̄, mme ete ye eka, ye mme nsan̄andọ ke idiọk usụn̄. Ndien etie nte ediwak owo ikereke ke akwan̄a ndisu nsu m̀mê ndiyịp inọ man ẹyụhọ mme udọn̄ idemmọ. Ndi afo emekere ke nte mme owo ẹdude uwem mmọ ebehe Abasi? [Bet ibọrọ.] Abasi ama enịm ndusụk idaha ọnọ mme owo ndida ndu uwem, ndien mmọ ke akpanikọ idịghe mbiomo inọ nnyịn.” Kot 1 John 5:3. Ekem nọ ediye uduot ekpri n̄wed Oyom, nyụn̄ kụbọde ka ukpepn̄kpọ 10. Kot akpa ikpehe ekikere. Wụt mme ikọ ye mme ubak udịmikọ oro ẹwetde ke sịghisịghi ubọkn̄wed ke ntọn̄ọ ntọn̄ọ ikpehe ekikere 2-6, nyụn̄ bụp enyeneufọk m̀mê ewe edinam ke enye ekere ke enen̄ede ọnọ n̄kaowo unan. Kot ikpehe ekikere oro enyenede ebuana nyụn̄ kot itien̄wed Abasi kiet m̀mê iba nte ifet ayakde. Beri ke ndikot ikpehe ekikere 7, ndien ekem nam ndutịm ndifiak n̄waha kaban̄a n̄kaiso nneme.
5 Ye mbon oro afo okosobode ẹmi ẹnyenede udọn̄ ẹban̄a ubon, afo emekeme ndidọhọ ntem:
◼ “Ndi afo ekere ke owụt ifiọk ndidori enyịn nte ke Andibot ọyọnọ nnyịn mme n̄kpọutom oro iyomde man ibọp uwem ubon oro okụtde unen?” Bet ibọrọ. Wụt ediye uduot ekpri n̄wed Oyom, kụbọde ka ukpepn̄kpọ 8, nyụn̄ nam an̄wan̄a nte ke ọdọn̄ọ mme edumbet ẹtode Bible ẹnọ kpukpru mme andibuana ke ubon. Dọhọ ke imọn̄ inam iwụt nte ẹdade ediye uduot ekpri n̄wed oro ye Bible ẹbọ n̄kponn̄kan ufọn ẹto enye. Tiene mme item oro ẹdude ke page 2 ke ediye uduot ekpri n̄wed oro. Nam ndutịm ndifiak n̄ka man aka iso ke ukpepn̄kpọ oro, mîdịghe edieke okụrede enye, ndikpep ukpepn̄kpọ en̄wen oro enyeneufọk emekde ke ediye uduot ekpri n̄wed oro.
6 Emi edi nnennen usụn̄ edisobo ye owo emi afo ekemede ndida n̄wụt ndutịm ukpepn̄kpọ Bible nnyịn. Wụt ediye uduot ekpri n̄wed “Oyom,” nyụn̄ dọhọ ete:
◼ “Ediye uduot ekpri n̄wed emi ọdọn̄ọ ọyọhọ ukpepn̄kpọ enemede mme akpan ukpepn̄kpọ Bible. Ke page kiet kiet, afo oyokụt mme ibọrọ ke mme mbụme oro ẹtịmerede mme owo ke ediwak isua ikie. Ke uwụtn̄kpọ, Nso idi uduak Abasi kaban̄a isọn̄?” Kụbọde ka ukpepn̄kpọ 5, nyụn̄ kot mme mbụme ẹdude ke ntọn̄ọ ukpepn̄kpọ oro. Bụp enyeneufọk m̀mê ewe enen̄ede edemerede enye udọn̄, ndien ekem kot (mme) ikpehe ekikere oro asan̄ade ekekem, okotde mme itien̄wed Abasi oro ẹdotde. Nam an̄wan̄a nte ke ẹkeme ndikụt mme ibọrọ oro ẹnọde mme mbụme eken ata mmemmem mmemmem ukem nte enyeemi. Nọ ekikere ke imọ iyafiak idi ndineme mbụme ye ibọrọ efen.
7 Mîdịghe ekeme ndidi afo akpama ndidomo mmemmem usụn̄ edisobo ye owo kaban̄a editọn̄ọ ukpepn̄kpọ Bible ebe ke ndidọhọ ete:
◼ “Ndi afo ama ọfiọk ete ke ndida n̄kpasịp minit ifan̄, afo emekeme ndikụt ibọrọ ọnọ akpan mbụme Bible? Ke uwụtn̄kpọ, . . .” Ekem bụp mbụme kiet oro odude ke ntọn̄ọ ke kiet ke otu ukpepn̄kpọ ke ediye uduot ekpri n̄wed oro, enyeoro afo ekerede ke eyedemede udọn̄ owo oro. Kaban̄a ndusụk ekikere ke mme mbụme oro ekemede ndikama, se ikpehe ekikere 15 ye 16 ke esịne-esịt Utom Obio Ubọn̄ Nnyịn eke March 1997, emi ibuotikọ edide: “Nyene Uko Ndinam Mme Mfiakn̄ka.”
8 Ndinyịme n̄kpọ-ata edinam mme mfiakn̄ka ye edinịm mme ukpepn̄kpọ Bible idara idara edi ubak usụn̄ edidi “mme anamutom” Abasi. (1 Cor. 3:9) Nte nnyịn inamde utom ọkpọsọn̄ ndikọri udọn̄ oro ikụtde ndien ekem iberi edem ke Jehovah ndinam n̄kpọ ẹkọri, nnyịn iyokop ata uyụhọ emi utom en̄wen mîkemeke ndida ndi.