Mme Ukpepn̄kpọ Bible Oro Ẹsion̄ode Mme Mbet Ẹdi
1 “Nso ibiọn̄ọ mi ndina baptism?” ntre ke eunuch owo Ethiopia okobụp ke Philip ‘ama ọkọkwọrọ Jesus ọnọ enye.’ (Utom 8:27-39) Ke idaha eke eunuch oro, enye ama enyenyene ima ọnọ mme uwetn̄kpọ eke odudu spirit Abasi, ndien ke ama ọkọbọ un̄wam eke spirit oto Philip, enye ama eben̄e idem ndikabade ndi mbet. Edi idịghe kpukpru owo ẹnịm ke akpanikọ ke oyom mmimọ idụn̄ọde N̄wed Abasi ke idem mmimọ.
2 Ke edide n̄kpọ idatesịt, esop Jehovah ọmọnọ obufa ediye uduot ekpri n̄wed, Nso ke Abasi Oyom Oto Nnyịn?, man esịn udọn̄ ọnọ mme owo ndida ndụn̄ọde etop Bible kaban̄a eyo nnyịn. Ntọt ẹdude ke ediye uduot ekpri n̄wed emi ekpenyene ndidemede udọn̄ mbon esịt akpanikọ ẹmi ẹnyenede ukeuke ukeme ukot n̄wed ndien ke ntem ẹfiọkde esisịt ẹban̄a Bible. Ẹtịm ediye n̄kpọutom emi ndida nnịm ukpepn̄kpọ Bible.
3 Ke ini ọtọn̄ọde ukpepn̄kpọ Bible, ọkpọfọn ndidụn̄ọde nti ekikere ẹkemịn̄de ke esịne-esịt Utom Obio Ubọn̄ Nnyịn eke June 1996 ke nte ẹkemede ndida n̄wed Ifiọk nnịm ukpepn̄kpọ oro enyenede uforo. Ke ini ukpepn̄kpọ oro, kere ban̄a n̄kọri oro eyen ukpepn̄kpọ anamde man otodo ekeme ndibiere ebiet emi oyomde n̄kaiso ntịn̄enyịn. Sịn udọn̄ nọ eyen ukpepn̄kpọ nditịm idem nnọ mme ukpepn̄kpọ esie ke mbemiso, esede mme itien̄wed Abasi. Mme ibọrọ oro ọnọde ke mme ikọ idemesie ẹkeme ndiwụt esịtekọm ofụri esịt oro enye enyenede aban̄a akpanikọ. Mbon oro ẹsiwakde ndikot n̄wed N̄ka efen efen ẹnyụn̄ ẹsidụkde mme mbonoesop kpukpru ini ẹsinam usọp usọp n̄kọri. Sịn udọn̄ nọ enye nditịn̄ nnọ mbon efen ke ido nneme mban̄a se enye ekpepde. Ke mfọnido, wụt se oyomde enye anam man anam n̄kọri eke spirit. Nnyịn ikpenyeneke ndikpep n̄kpọ ke nsinsi ye mbon unana iwụk. Nditọ ukpepn̄kpọ ẹkpenyene ndinam usio-ukot ndikpep n̄kpọ, ndisọn̄ọ nda nnọ akpanikọ, nnyụn̄ nnam n̄kọri mbịne ediyak idem nnọ ye baptism.
4 Ke ndusụk ufọk, ẹsinịm se ibede ukpepn̄kpọ kiet, nte nsio nsio mme andibuana ke ubon ẹsikpepde n̄kpọ nsio nsio. Nte ededi, ofụri ubon ndidiana kiet n̄kpep Bible ekeme ndifọn n̄kan ke ata ediwak idaha, sia emi edin̄wamde ndidụri ubon ndian ọtọkiet ke n̄kan̄ eke spirit.
5 Ewụhọ Jesus edi nte yak nnyịn ika ikanam mme mbet. (Matt. 28:19) Man inam ntre, ana nnyịn inịm mme ukpepn̄kpọ Bible oro ẹn̄wamde nditọ ukpepn̄kpọ ndinam n̄kọri nsịm idaha oro mmọ ẹkemede ndibụp ẹte, “Nso ibiọn̄ọ mi ndina baptism?”