Jehovah Ọnọ Akwa Ubom Odudu
1 Ẹmeyak ọsọn̄urua ifet eke edisana utom—kpa utom ukwọrọikọ Christian—ẹsịn kpukpru mbet Jesus ke ubọk. (Matt. 24:14; 28:19, 20) Edi unana mfọnmma eke owo ye mme mfịghe eke editịm n̄kpọ emi ndusụk ini ẹsinam nnyịn ida ke nnyịn itịmke idot.
2 Ke ini emi etịbede nnyịn imekeme ndibọ ndọn̄esịt ito leta emi apostle Paul ekewetde ọnọ mme Christian oro ẹyetde aran ke Corinth. Enye ekewet ete: “Nnyịn ikama ọsọn̄urua n̄kpọ emi ke aban̄ mbat.” (2 Cor. 4:7) Paul ama enyene mbuọtidem ntem: “Mmọdo sia nnyịn inyenede utom emi . . . , esịt iduọhọ nnyịn.” (2 Cor. 4:1) Ke akpanikọ, edi n̄kpọ-ata ọnọ nnyịn owo kiet kiet, edide enye emi ẹyetde aran m̀mê “erọn̄ en̄wen,” ndika iso ntan̄a eti mbụk ndien “esịt iduọhọ nnyịn.” Nnyịn imoyom odudu ito Abasi, emi ọnọde “akwa ubom odudu.”—John 10:16; 2 Cor. 4:7b.
3 Ke edide n̄kpọ nsịnudọn̄, ediwak Ntiense ẹdi ifịk ifịk mme ọkwọrọikọ kpa ye oro ẹnyenede ndin̄wana ye ọkpọsọn̄ ubiọn̄ọ, n̄kpọsọn̄ mfịna unana nsọn̄idem, m̀mê esisịt okụk. Ana kpukpru nnyịn ifiọk ite ke Jehovah ọnọ utom edikwọrọ ikọ nnyịn ibetedem. Utu ke ndiyak mmemidem m̀mê ndịk anam ubiere nnyịn ndikwọrọ ikọ emem, ẹyak nnyịn ‘isọn̄ọ idem ke Ọbọn̄ ye ke ọkpọsọn̄ odudu Esie.’—Eph. 6:10; N̄ke 24:10.
4 Nte Ẹkemede Ndinyene Odudu Abasi: Kọbọ ke akam, oyomde un̄wam ye odudu Abasi. (Rome 12:12; Phil. 4:6, 7) Ekem, ke ofụri esịt fo, buọt idem ke Jehovah ndinọ akwa ubom odudu. (N̄ke 3:5) Kot mbụk uwem eyomfịn ke mme magazine nnyịn, koro mmọ ẹnọde uyarade nte ke Jehovah ke an̄wam mme asan̄autom esie mfịn ndiyọ mme idomo. Kpere nditọete ke esop, kûnyụn̄ ufụmi mme mbonoesop.—Rome 1:11, 12; Heb. 10:24, 25.
5 Akpakam nnyịn inam kpukpru se ikemede ndidot ndibọ odudu Jehovah—kpa akwa ubom odudu ndien oro ayan̄wam nnyịn nditre ndikpa mba ke ata akpan utom eke edikwọrọ Obio Ubọn̄ emi.