Mbono District “Usụn̄ Uwem Abasi” eke Mme Ntiense Jehovah eke 1998
1 Ke isua ke isua mme andituak ibuot nnọ Jehovah eke eyomfịn ke ofụri ererimbot ẹsidori enyịn ye ọkpọsọn̄ udọn̄ ndisop idem ke akamba ibat ke ikpọ mbono. Ke emi, mmọ ẹwụt edu mme anam-akpanikọ asan̄autom Jehovah ke Israel eset ẹmi ẹkekwọde mme ikọ eke Psalm 122 idara idara ke adan̄aemi ẹkade ndituak ibuot nnọ Jehovah ke Jerusalem. Ufan̄ikọ 1 ke psalm oro okot ete: “Mmọ eke ẹdọhọde mi, ete, ‘Nnyịn iyaka ke ufọk Jehovah,’ ẹdat mi esịt.” Ke mme utọ idaha oro nnyịn n̄ko ikụt uyarade oro ọkọride-kọri nte ke mme ikọ odudu spirit eke Isaiah 2:2, 3 ke ẹsu.
2 Isua emi nnyịn imenyene akpan ntak ndidara ke ikerede iban̄a inem eke ofụri ererimbot oro ediwak mme andidụk ẹtode mme idụt ofụri isọn̄ oro ẹdụkde ndusụk ikpọ mbono edisịnde. Ndutịm mbono ke obio kiet kiet oyowụt mme ifiọkutom an̄wautom ye mme ntọt kaban̄a n̄kọri utom ukwọrọikọ Obio Ubọn̄ ke mme idụt en̄wen.
3 Edi akpanikọ, mme esop oro ẹnọde ikot kpọt ke n̄kann̄kụk oro ẹnịmde ikpọ mbono ofụri ererimbot ẹdikeme ndidụk mme mboho oro. Edi akpan n̄kpọ nte kpukpru owo ẹkpono mme adan̄a ẹmi man ẹkeme ndinịm kpukpru ikpọ mbono ke usụn̄ oro asan̄ade ke ndutịm. Ẹyekụt inem eke ofụri ererimbot in̄wan̄în̄wan̄ ke kpukpru ikpọ mbono ke ndusụk ikpehe ndutịm ye mme ntọt, ọkọrọ ye ke edidu eke mme isụn̄utom ẹmi ẹkemede ndidụk.
4 Nte ntịmidem akade iso kaban̄a Mbono District “Usụn̄ Uwem Abasi” nnyịn eke 1998, nnyịn iyama ndidụn̄ọde ndusụk akpan ntọt ẹmi afo ediyomde man ọbọ itieidụn̄ ke mbono oro. Ọyọhọ edidianakiet fo oyowụt esịtekọm oro afo enyenede ọnọ kpukpru ndutịm oro ẹnamde ke ufọn fo.
5 Mme Item ke Ndibọ Itieidụn̄: Nnyịn iyodomo ndinọ esop kiet kiet ibat babru Room Request oro ekemde. Ewetn̄wed esop ekpenyene ndikụt nte ke ẹwet n̄kpọ nnennen nnennen ẹyọhọ babru Room Request kiet kiet oro ẹnọde edi. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn̄ mbon ẹmi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt kaban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn̄ ikpọ owo kpọt. Emi esinam ndutịm unọ itieidụn̄ enen̄ede ọsọn̄ utom. Edieke oyomde ufan̄ oro okponde akan se idude ke babru oro, da ikọn̄ babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ Mbono.
6 Isua kiet kiet, nnyịn imesiben̄e nditọete ndidiana kiet ye Itieutom Unọ Ufọkidụn̄ Mbono. Ke nsụhọde n̄kaha ẹsiyọhọ n̄kpọ iba ke nditiene ndausụn̄ emi:
7 Afam okụk nditọete nnyịn iren ye iban: Ke ini nnyịn idianade kiet ye ndutịm N̄ka, okụk ubet osụhọde ọnọ nditọete nnyịn. Utu ke okụk nnyịn ndika mbịne mme enyene ebiet, ẹkeme ndida mmọ nnam n̄kpọ nte ọfọnde ndida n̄n̄wam mme ubon nditọete nnyịn iren ye iban ye utom ofụri ererimbot. Idem edieke nnyịn ke idem nnyịn ikemede ndibọ mme itieidụn̄ oro ẹsọn̄de urua, nnyịn ikpenyene ndinọ mme ukeme Itieutom Unọ Ufọkidụn̄ ibetedem. Ẹtịn̄ ẹban̄a edu edikere mban̄a mbon efen emi ke 1 John 3:17 onyụn̄ edi edumbet oro odude ke 1 Corinth 10:24.
8 Owụt edisụk ibuot nnọ ndausụn̄ N̄ka: N̄kpọ emi ekpenyene ndidi kiet ke otu n̄kpọ ẹmi ẹtịmde ẹbehe nnyịn. Mme Hebrew 13:17 ọdọhọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọ ẹmi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.” Nte nditọete nnyịn ẹnamde ekese ndutịm kaban̄a mbono district nnyịn, nnyịn iyom ndinam mmọ ẹfiọk ke mmimọ imenyene ọyọhọ ibetedem nnyịn. Sia ẹyomde edidianakiet nnyịn ke n̄kpọ emi ke usen iba m̀mê ita kpọt ke isua, emi edi eti usụn̄ ndinọ mme ukeme mmọ ibetedem. Idem edieke se nnyịn imekde ọkpọkpọ edide isio, eti uwụtn̄kpọ nnyịn, nte nditọete nnyịn ye ererimbot ẹkụtde, eyesịn udọn̄ ọnọ edu ima, edidianakiet, ye ibetedem.—Phil. 2:1-4.
9 San̄asan̄a Un̄wam: Ndutịm emi edi n̄kukụre kaban̄a mbon oro ẹyomde san̄asan̄a un̄wam ẹto mbon en̄wen ke ndinam ndutịm mmọ ẹmi ẹnyenede ebuana ye mbono, akpan akpan mme ndutịm itieidụn̄, ke ini mbono. Mmọ ẹmi ẹkeme n̄ko ndiyom un̄wam ke mme usụn̄ eken, ọkọn̄ọde ke san̄asan̄a idaha mmọ. Edi mme asuanetop ye mme asiakusụn̄ ẹmi ẹnịmde eti uwụtn̄kpọ kpọt, esịnede nditọ mmọ oro ẹdude eti uwem, ẹmi Kọmiti Utom Esop ọnọde unyịme ẹdot ndibọ un̄wam ke idak ndutịm San̄asan̄a Un̄wam emi. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbono esop, utu ke ndiyak mbiomo emi ndori ndutịm mbono ke idem. Mbiowo ye mbon en̄wen ẹmi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ ini, mbonusọn̄, mbon n̄kpọnnam, ye ndusụk mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke mme usụn̄ efen.—Jas. 2:15-17; 1 John 3:17, 18.
10 Nte ededi, Itieutom Unọ Ufọkidụn̄ oyodomo ndinọ mme asuanetop ẹyomde san̄asan̄a un̄wam ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop ẹmi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ẹse m̀mê esop eyekeme ndin̄wam mme owo ẹmi ke ndise mban̄a itieidụn̄ mmọ. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request kiet emi enye emịn̄de in̄wan̄în̄wan̄ mme ikọ ẹmi, “SAN̄ASAN̄A UN̄WAM” ke enyọn̄ akpa page oro. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ babru emi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak enye nnọ ewetn̄wed, emi edisede m̀mê ẹwet n̄kpọ ẹyọhọ, enen, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Mme idaha oro ẹdi se ewetn̄wed enyenede NDINAM AN̄WAN̄A KE NDE KE NDE ke ufan̄ oro ẹnịmde ke edem babru emi. Ẹkpenyene ndibabak nnam kpukpru ẹmi mbemiso mbono. Ewetn̄wed ndien ọyọnọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a mme itieidụn̄.
11 Mbon oro ẹyomde san̄asan̄a un̄wam IKPENYENEKE ndika itie mbono nnyụn̄ n̄kesịn eben̄e ufọkidụn̄ ke ini mmọ ẹsịmde, koro Itieutom Unọ Ufọkidụn̄ ana enyene unyịme oto Kọmiti Utom Esop.
12 Ndidụk Mbono Efen: Ẹdeme esop kiet kiet ẹsịn ke mbono oro ekperede akan. Ọkọn̄ọde ke ibat asuanetop oro ẹdemede ẹdọn̄ ke mbono kiet kiet, N̄ka esikere ibat mme andidụk ese man ẹnam ndutịm ẹnọ n̄kpọitie, ufọkidụn̄, mme n̄wed oro ekemde, ye ntre ntre eken. Nte ededi, edieke edide eti ntak anam afo oyom ndidụk mbono efen ọwọrọde ọkpọn̄ enye oro ẹdemede fi ẹsịn onyụn̄ oyomde itieidụn̄, ewetn̄wed esop ekeme ndinọ fi idem babru Room Request kiet. Afo emekeme ndiwet n̄kpọ nyọhọ onyụn̄ ọnọ ewetn̄wed esịn ubọk mbemiso ọnọde enye ẹsọk mbono oro amade ndidụk.
13 Fam Okụk Nịm nọ Mbono Oro: Ke adianade ye mme ndutịm eken, IDAHAEMI edi ini nditọn̄ọ ndifam okụk nnịm nnọ mbono district oro. Ndusụk owo ẹdu oyom usụn̄ esisịt ọkpọn̄ obio mbono. N̄ko, ndusụk owo ẹnyene ikpọ ubon. Kaban̄a mmọ ẹmi ye kpukpru nnyịn, oyom okụk kaban̄a mme etịbe, ukpeusụn̄, udia ke ini mbono, mme n̄wed, esịnede mbufa nsiondi ekededi, ye mme n̄kpọ eken. Oyom mbon oro ẹnyenede ikpọ ubon ẹbem iso ẹnam ndutịm ndifam okụk oro ekemde nnịm man ofụri ubon ẹkeme ndidụk mbono. Eti usụn̄ edinam edi ndikere ofụri ibatokụk emi ẹyomde nse. Owụt ifiọk ndinịm ufan̄ nnọ edidọk ekọmurua mme n̄kpọ ke adan̄aemi anamde ibat fo. Bahade ibatokụk oro ekerede nte ediyomde ye ibat ọfiọn̄ oro odude tọn̄ọ ke emi sịm usenọfiọn̄ mbono district mbufo. Emi edi ibatokụk oro afo edifamde enịm ke ọfiọn̄ kiet kiet. Ke ọfiọn̄ kiet kiet, sịn ofụri ukeme ndibem iso nsio okụk emi nnịm nte okụk mbono. Ẹkeme ndisịn emi ke ekpri ekebe m̀mê efọkn̄wed. Edi akpanikọ, ẹkeme ndibahade okụk emi ẹfamde ẹnịm ke ọfiọn̄ ke ọfiọn̄ mi ke itie inan̄ ẹnyụn̄ ẹsisio ẹnịm ke urua ke urua. Akpan n̄kpọ edi nte ke ukpenyeneke ndibet tutu esịm ọfiọn̄ kiet m̀mê iba ndisịm ini mbono mbemiso afo ọtọn̄ọ ndifam okụk uka isan̄ ofụri ini eke isua ke isua emi.—N̄ke 21:5.
14 Utịt: Mme utịn̄ikọ ẹtode mme mbono ẹwụt nte ke mbufo nditọete iren ye iban ẹmedi se ẹtorode ke ndiwụt mme edu Abasi. Ntọt kiet ọkọdọhọ ete: “Mbono oro akasan̄a ke ndutịm onyụn̄ edi emem emem, ndien nditọete iren ye iban ẹma ẹtịm ẹnọ n̄kpan̄utọn̄ ke mme n̄kpọ eke spirit ẹkan mme n̄kpọ eken. . . . Ke ini ikpehe edinam, otuowo ẹma ẹnen̄ede ẹkpan̄ utọn̄ ẹnọ edinam.” Andinyene ufọkn̄wed kiet emi mme andidụk mbono ẹkedụn̄de ọkọdọhọ ete: “Mma nsikop nte ke Mme Ntiense Jehovah ẹdi mbon oro ẹsanade idem, edi n̄kọnọhọ n̄kpan̄utọn̄. Edi idahaemi mmokụt ke idemmi. Ama otụk mi etieti ndikụt nte mmọ ẹkenịmde n̄kann̄kụk ufọkn̄wed mi etịm asana, owo ikadaha ifuọ isabade isọn̄. Mbufo ẹmenyene ifụre ndida ufọkn̄wed oro nnam n̄kpọ ini ekededi oro ẹnyenede mbono mbufo.” Mme utịn̄ikọ nte mmọ ẹmi ẹnem ndikop, nte inemke? Edu uwem nditọete iren ye iban ẹmi akanamde ẹtịn̄ mme utọ ikọ ẹmi anam esịt Jehovah enem.
15 N̄ka ama ọbọ ediwak leta ẹtode nditọete iren ye iban ẹwụtde esịtekọm mmọ kaban̄a mme ndutịm oro ẹkenamde ẹnọ mmọ. Eyenete eren kiet ekewet ete: “Ẹsọsọn̄ọ etieti . . . Emi edi kaban̄a Mbono District ‘Mbuọtidem ke Ikọ Abasi’ eke usen ita emi ami ke idemmi n̄kadarade. . . . Ẹsọsọn̄ọ etieti ke nte ẹketịmde mbono oro ọfọn ntre.” Eyenete an̄wan kiet ekewet ete: “Nyom ndikọm kpukpru nditọete ẹmi ẹkebuanade ke ndutịm unọ ufọkidụn̄ ke ofụri esịt. Ami ye ebe mi ima iwụt esịtekọm iban̄a mme usụhọde ekọmurua, sia nnyịn idade okụk owo kiet idu uwem man n̄keme ndika iso ke utom usiakusụn̄. Mme ndutịm ẹmi ẹma ẹn̄wam nnyịn itịm ibọ ufọn ito mbono oro.”
16 An̄wan̄a kpukpru nnyịn nte ke Jehovah ke ọnọ ibetedem ke ndutịm mbono district eke isua ke isua. Sia ediwak nditọete ẹnamde isan̄ ẹka mme ikpọ mbono ẹdiyomde mme ubet, nnyịn imekeme ndinịm ke akpanikọ nte ke Jehovah ọyọnọ mme n̄kpọ ẹmi n̄ko nte ekemde. Ndiwụt ke nnyịn imanam “akpanikọ ke ata ekpri n̄kpọ” anam nnyịn ibọ ikpọ edidiọn̄ oro ẹnade ẹbet mbon oro Jehovah amade.—Luke 16:10.
[Ntọt Ẹnọde Otu Mbiowo: Ke ẹbọde esịne-esịt emi, mbọk ẹtọt ke Esoputom efen ye ke Ukpepn̄kpọ Enyọn̄-Ukpeme oro editienede ebiet ye mme usenọfiọn̄ ẹmi N̄ka edemede esop mbufo esịn. Ọkpọfọn ndidụri udịm ke obio mbono ye mme usenọfiọn̄ oro ẹdemede esop mbufo ẹsịn nnyụn̄ ndian ikpehe esịne-esịt emi ke obukpọk ntọt.
Ewetn̄wed esop ekpenyene ndise mban̄a n̄kpọ ẹban̄ade mme mbono ye mme ntọt mbono ke mme mbono esop ini iso. Kpukpru mbiowo ẹnyene ndidiana kiet ọyọhọ ọyọhọ man ẹkụt ẹte ke ẹse ẹban̄a mme n̄kpọ ẹban̄ade mbono usọp usọp, ke usụn̄ emi esịnede ufiop, ifịk ifịk, ye nte ọfọnde.]
[Ekebe ke page 4]
Mme Ini Ndutịm
Friday
9:20 a.m.–4:50 p.m.
Saturday
9:00 a.m.–4:30 p.m.
Sunday
9:00 a.m.–3:30 p.m.