N̄wam Mme Mbọhọidụn̄ Fo Ẹkụt Ukpọhọde Inemesịt Ubon
1 Owo omokụt ekese unen ke afan̄ ifiọk ntaifiọk ke isua ikie 20 emi. Emi amanam mme owo ẹmi ibat mmọ akade-ka iso ndiwak ẹnyene idaha udu uwem oro akanam mînyeneke. Nte ededi, ediwak owo ke nsio nsio idaha ke uwem ẹmekpu idiọk idiọk ke ikpehe kiet eke uwem owo—kpa ubon. Edikpu mmọ edi utịp edifụmi mme ndausụn̄ ẹtode Enye emi “ẹsiode kpukpru ubon ke enyọn̄ ye ke isọn̄ enyịn̄ ke Enye,” kpa Jehovah Abasi.—Eph. 3:15.
2 Anana-ibat ubon ẹnyene Bible, edi enye ọbọ ntọn̄ ke n̄kpọ udọn̄ n̄wed utu ke ndidi se ẹdade ẹnam n̄kpọ ke ndikọk mme mfịna ubon. Man ẹnyene inemesịt ubon, ana ẹda mme ndausụn̄ ye mme edumbet N̄wed Abasi ẹsịn ke edinam. Ke February, nnyịn iyesịn ọkpọsọn̄ ukeme ndibuana n̄wed Ukpọhọde Inemesịt Ubon ye kpukpru owo. Ndusụk ekikere ke ndinọ n̄wed oro ẹdi ẹmi:
3 Edieke afo osobode ete m̀mê eka ke utom eke ufọk ke ufọk, afo emekeme ndidemede udọn̄ ke ndidọhọ ete:
◼ “Ye kpukpru mfịghe ye editịmede esịt oro nnyịn isobode ke usen ke usen, nte afo emekere ke ẹkeme ndinyene ata inem inem uwem ubon? [Bet ibọrọ.] Ẹkụt ukpọhọde ata inemesịt ubon ke ndida mme edumbet Bible nsịn ke edinam. Ubon oro adade mmọ esịn ke edinam ayadara emem Abasi. [Kot Isaiah 32:17, 18.] N̄wed emi, Ukpọhọde Inemesịt Ubon, owụt mme edumbet oro ẹkemede ndin̄wam nnyịn inam ikọtufọk nnyịn ẹkọri.” Kụbọde ka page 11, nyụn̄ kot ikpehe ekikere 20. Nọ n̄wed oro ke etịbe edide ₦55.
4 Ke afiakde aka afo emekeme ndika iso ke nneme oro ntem:
◼ “Ke ini ikosobode isan̄ oko, mma n̄keme ndikụt ke afo emenen̄ede ekere aban̄a ubon fo. N̄kpama ndiwụt fi n̄kpọ ke n̄wed oro afo ọkọbọde oro n̄kerede ke ayama. Akpatre ibuot anam ata ukpọhọde inemesịt ubon an̄wan̄a. [Kot ikpehe ekikere 2 ke page 183.] Tịm fiọk ete ke ndinam utom ọtọkiet ke ndinam uduak Abasi edi ukpọhọde. Nnyịn itoro ite mme ubon ẹsikpep Bible ọtọkiet man ẹkpep se uduak Abasi edide ye nte ẹkpedade enye ẹsịn ke edinam ke ubon. Nnyịn imesinịm ukpepn̄kpọ Bible mfọn oro ẹsidade ọfiọn̄ ifan̄ kpọt ndikụre. Ke afo ediyakde mi, nyowụt fi nte ẹsinịmde enye.” Da n̄wed Ifiọk fiak ka kaban̄a n̄kaiso nneme.
5 Ke ini enyenede nneme ye mme uyen ke efakutom, afo emekeme ndida usụn̄ edisobo enye emi:
◼ “Ediwak uyen mfịn ẹseme nte ke mme ete ye eka idiọn̄ọke mmimọ. Afo ekere ke nso idi ntak kaban̄a emi? [Bet ibọrọ.] N̄wed emi oro ẹtịmde man an̄wam ke mme mfịna ubon etịn̄ inem inem n̄kpọ emi ke ibuot nneme oro ‘In̄wan̄în̄wan̄ Nneme Esịt Akpanikọ.’ [Kot ikpehe ekikere 4 ke page 65 ke n̄wed Inemesịt Ubon.] Mme ikpehe ekikere oro ẹtienede ẹnọ nti item ke nte ẹkemede ndifori nneme ke ubon. Enyịn̄ n̄wed emi edi Ukpọhọde Inemesịt Ubon. Afo emekeme ndinyene enye emi ke etịbe edide ₦55.” Diomi mfiakn̄ka.
6 Afo emekeme ndika iso ke akpa nneme fo ye uyen kaban̄a edinyene nneme ke ufọt ete m̀mê eka ye eyen ke ndidọhọ ete:
◼ “Mmokop inemesịt mban̄a udọn̄ oro afo enyenede ndinyene eti nneme ke ubon mbufo. Nte uyen, nso ke afo ekeme nditịp nsịn kaban̄a edifori nneme ye ete m̀mê eka fo? [Bet ibọrọ. Kụbọde ka page 65 ke n̄wed Inemesịt Ubon, nyụn̄ kot ikpehe ekikere 5.] Ifiọk n̄kpọntịbe omowụt ete ke ẹsinyene mfọnn̄kan utịp ebe ke nditiene nti item ẹdude ke Bible.” Nọ ediye uduot ekpri n̄wed oro Nso ke Abasi Oyom Oto Nnyịn? Nam an̄wan̄a nte ke mme ukpepn̄kpọ 16 ẹmi ẹnọ akpan etop Bible ke ibio ibio usụn̄. Kot ntọn̄ọikọ ke page 2, ndien ekem ẹneme akpa ukpepn̄kpọ oro ọtọkiet.
7 Kûyak ubọk emem fi ke ndisuan n̄kpasịp Obio Ubọn̄ koro Jehovah ọyọdiọn̄ mme ukeme fo ke ndin̄wam mme mbọhọidụn̄ fo ẹkụt ukpọhọde inemesịt ubon.—Mark 12:31.