Mme Magazine Ẹnọ Ntọt Obio Ubọn̄
1 Nte Mme Ntiense Jehovah, ẹtịm ẹdiọn̄ọ nnyịn kaban̄a ifịk ifịk edikwọrọ ikọ nnyịn mban̄a Obio Ubọn̄ Abasi. Magazine Enyọn̄-Ukpeme ye Awake! ẹmi nnyịn isisuande ẹnyene akwa udeme ke ndin̄wam ediwak miliọn owo ẹkpep ẹban̄a mme uduak Abasi. Etop oro esịnede ke mmọ ke akpanikọ edi eti mbụk, koro enye ọnọde ntọt Obio Ubọn̄ Abasi eke heaven nte n̄kukụre idotenyịn ubonowo.
2 Mme magazine oro ẹse ẹban̄a mme ata udọn̄ mme owo—eke ntụk, eke n̄kaowo, ye eke spirit. Ye mme ido uwem ye ido ubon ẹbiarade ke kpukpru ebiet, Enyọn̄-Ukpeme ye Awake! ẹn̄wam mme owo ndifori uduot uwem mmọ ebe ke ndiwụt mmọ nte ẹkpedade mme edumbet Bible ẹsịn ke edinam. Edidi inemesịt nnyịn ndinọ mme editobo ke mme magazine ke April ye May.
3 Mmọ Ẹdemede Ata Udọn̄: Enyọn̄-Ukpeme ye Awake! ẹdu ke ekperede ndidi ke usem kpukpru mme andidu ke ererimbot. Ke ntak emi, ẹtịm ẹdiọn̄ọ mme magazine nnyịn. Ndusụk ntak anamde mmọ ẹmụm udọn̄ mme owo ẹdi ẹmi:
◼ Nte mme magazine nsọn̄ọnda ye akpanikọ, mmọ ẹwụt ukpụhọde eti ye idiọk in̄wan̄în̄wan̄.
◼ Mmọ ẹnọ idotenyịn edinen paradise edidide, ọkọn̄ọde ke un̄wọn̄ọ Abasi ndinam isọn̄ odu ke idak ukara Obio Ubọn̄ esie.
◼ Ẹsineme ntatara nsio nsio ekem ini ibuot nneme, ẹmi ẹdemede udọn̄ mme owo ẹdude ke kpukpru idaha ke uwem ye ido.
◼ Mme ibuotikọ ẹdi mbio mbio, ẹnọ ukpep, ẹdi akpanikọ, ẹnyụn̄ ẹbọhọ asari ye edikan̄ mbuọtidem.
◼ Ndiye ndise ẹdemerede udọn̄ usọp usọp, ndien in̄wan̄în̄wan̄ ido uwetn̄kpọ ẹnam mme magazine ẹmi ẹmem ndikot.
4 Suan Mmọ Ntatara Ntatara: Edikụt unen ke ndisuan mme magazine ẹkọn̄ọ akamba akamba ke nnyịn nditịn̄ enyịn ntịm mme nneme nnyịn, idiomide ini nnyịn, inyụn̄ itịmde utom ukwọrọikọ nnyịn. Ẹma ẹnọ nti ekikere ke mme nsiondi Utom Obio Ubọn̄ Nnyịn eke March ye October 1996, emi edifọnde ndifiak ndụn̄ọde nnyụn̄ nda nsịn ke edinam.
5 Mehe ye Mme Magazine Ẹmi: Nte afo okotde nsiondi kiet kiet, kere ban̄a owo emi akpamade ndibọ idem kiet. Yom mme akpan n̄kpọ m̀mê itien̄wed Abasi oro afo ekemede ndikot nsịn ke nneme fo. Kere ban̄a mbụme emi afo ekemede ndibụp man ọtọn̄ọ nneme ọnyụn̄ edemede udọn̄ ke ibuot nneme oro.
6 Nam Nneme Ekekem ye Owo: Tịm mmemmem nneme emi ekemede ndikpụhọ ekekem ye erenowo, n̄wan, owo usọn̄, m̀mê uyen, edide ọdiọn̄ọ m̀mê esenowo.
7 Ben̄e Idem Ndinọ Enyọn̄-Ukpeme ye Awake!: Sia mme magazine ẹkemede ndidụk ekpat, ekpatokụk, m̀mê ekpatọfọn̄ mmemmem mmemmem, nnyịn imekeme ndikama mmọ ke ini ikade isan̄ m̀mê idepde n̄kpọ. Nọ mmọ ke ini enyenede nneme ye mme iman, mme mbọhọidụn̄, mme nsan̄autom, mme nsan̄a ufọkn̄wed, m̀mê mme andikpep. Sio usen kiet nịm kpukpru urua kaban̄a edida magazine nnọ ikọ ntiense.
8 Wụt Esịtekọm nọ Mme Magazine: Akananam ufọn mmọ ikụreke. Edibe eke mme ini isụhọkede nte etop oro ọdọn̄ọde ke mmọ ẹdide akpan n̄kpọ. Nte ededi, edieke nnyịn isịnde akpan ukeme ndinịm kpukpru magazine oro nnyịn ibọde, n̄kani nsiondi idikụbọke ke mme n̄kpọ udori n̄wed nnyịn.
9 Edinọ Ikọ Ntiense Efak Enyene Uforo: Emi edi kiet ke otu mfọnn̄kan usụn̄ ndinọ ediwak mme magazine. Ndusụk asuanetop ẹsinam utom ke mme efak oro ẹyọhọde ye mme edinam ndien ndien ke ini ke ini ke mme usen urua.
10 Efakutom Mbubehe Esin̄wụm Mfri: Ke ini inọde ikọ ntiense to ke ufọkurua sịm ufọkurua, nnyịn isinyene ibat ibat mbon oro mîdụhe ke ufọk. Ata ediwak mbon mbubehe ẹsiye ido, ndien ediwak ẹsidat esịt ndibọ mme magazine. Wụt mme ibuotikọ oro ẹdotde kaban̄a akpan mbubehe oro osobode.
11 Idotenyịn Odu ke Mme Afan̄ Magazine: Sia ẹsimịn̄de mme magazine ikaba ke ọfiọn̄, akam edi ndammana n̄kpọ ndifiak n̄ka mbịne mbon oro ẹkekotde mmọ nnyụn̄ nnọ mmọ mme nsiondi efen. Nnyịn ikpenyene ndinam mfiakn̄ka kpukpru ini, idịghe ndinịm mme magazine kpọt edi n̄ko ndinam udọn̄ owo oro ọkọri ke Bible. Mme afan̄ magazine ẹdi ata eti ebiet ọnọ mme ukpepn̄kpọ Bible ini iso.
12 Nen̄ede Da April ye May Nam N̄kpọ: Ediwak miliọn mme andikot ẹmi ẹwụtde esịtekọm ẹmenyene mbuọtidem ke Enyọn̄-Ukpeme ye Awake! Mmọ ẹnen̄ede ẹnyene uforo ke nditọt Obio Ubọn̄ anam nnyịn ikpenyene ndisịn ofụri ukeme ndisan̄a ye mmọ nnyụn̄ nnọ mme editobo ke kpukpru ifet. Ọfiọn̄ April ye May ẹkpekam ẹdi n̄wọrọnda ọfiọn̄ ndinọ mme editobo ye mme magazine!