Mek Mme Ibuotikọ Ndida Ndemede Akpan Udọn̄ Mme Owo
1 Ukem nte mme otop idan̄ oro ẹtịmde ẹket idan̄ mmọ, ediwak mme asuanetop esop ye mme asiakusụn̄ ke ẹkụt nti unen ke ndida mme ibuotikọ ẹtode Enyọn̄-Ukpeme ye Awake! oro ẹmekde man ẹdemede akpan udọn̄ mme owo ke efakutom mmọ. Mmọ ẹbiere m̀mê mmanie ẹdinen̄ede ẹyom ndikot ndusụk ibuotikọ ẹtode mme magazine ẹmi. Didie ke mmọ ẹnam emi?
2 Akpa mmọ ẹkot nsiondi kiet kiet ofụri ofụri. Ekem mmọ ẹbụp idem mmọ, Nso orụk owo ke ibuotikọ kiet kiet edidemede udọn̄? Do ẹyesịn ukeme ndika mbịne mme owo ẹmi ekemede ndidi ẹyenyene udọn̄ ndikot ibuotikọ oro. Ke ini ẹkerede ke ẹyenen̄ede ẹma ndibọ akpan nsiondi ke efakutom mmọ, mmọ ẹsitobo efen efen.
3 Ẹtịm Ẹkpono Mme Magazine Nnyịn: Kiet ke otu mme anditobo nnyịn emi anamde utom ọnọ magazine Nigeria oro ẹkotde ẹkan emi esịmde ediwak idụt ama etịn̄ se itienede mi aban̄a Awake!: “Amanam etieti ke magazine oro omụmde udọn̄ ofụri ofụri akan ke ererimbot.” Ifịk ifịk andikot mme magazine nnyịn kiet ama ọdọhọ ete: “Nso utịbe utịbe n̄kpọuto oro akamade ata ọniọn̄! Ọsọsọn̄ ndikụt ibuot nneme oro nnyenede udọn̄ emi owo mînyeneke ebiet oro ẹnemede ke kiet ke otu [n̄wedmbụk] ẹmi.”
4 Mme magazine oro ẹsineme ediwak ibuot nneme, esịnede Bible, mme n̄kpọntịbe ererimbot, mme udọn̄ ubon, mme mfịna n̄kaowo, mbụk, ifiọk ntaifiọk, uwem unam ye eto, ke ndisiak ifan̄ kpọt. Ke akpanikọ ẹsinen̄ede ọdọn̄ owo ndikot n̄kpọ ke ini oro enyenede ebuana ye mme udọn̄, idaha, m̀mê ubọkọkọ esie. Sia nnyịn itịn̄de ikọ inọ ediwak owo, kiet kiet enyenede mme akpan udọn̄ ye mfịna mmọ, ndimek mme ibuotikọ akpan akpan man ẹdemede udọn̄ mme owo oro nnyịn isobode enen̄ede enyene uforo.
5 Tịm fiọk se iketịbede ke ini Ntiense iba ẹkedade nsiondi Awake! eke September 8, 1996, ẹkenọ owo emi esiwetde n̄kpọ ke n̄wedmbụk n̄kpọntịbe. Enye ekewet ete: “Mbemiso n̄kenyenede ifet ndidọhọ ke nnyeneke udọn̄, kiet ke otu mmọ ama adian ete: ‘Ibuotikọ kiet odu aban̄ade mbon India America. Nnyịn imọfiọk ke afo emesiwet ekese aban̄a ibuot nneme oro.’” Enye ama ọbọ magazine oro ndien, ke ini udia usenubọk, okot uwetn̄kpọ aban̄ade mbon India, ekem enyịmede nte ke “enye ekedi mfọnn̄kan” onyụn̄ “etịn̄ ofụri akpanikọ.”
6 Nso Idemede Udọn̄ Mme Owo ke Efakutom Mbufo? Nso ke afo okụt ke mme magazine ke ndondo emi oro ekpedemerede udọn̄ mme enyene ufọkurua ye mme ọwọrọiso owo ke efakutom mbufo m̀mê mme mbọhọidụn̄, mme nsan̄a utom, ye mme nsan̄a ubet ukpepn̄kpọ fo? Nso ididi akpan n̄kpọ udọn̄ inọ mme lọya, mme ọnọ ukpep, mme ọnọitem ufọkn̄wed, mme anamutom n̄kaowo, ye mme andise mban̄a nsọn̄idem? Ndinyene mme owo oro afo ọkwọrọde ikọ ọnọ ke ekikere nte afo odụn̄ọrede nsiondi kiet kiet ọyọnọ fi nti usụn̄ ndisuan ikọ akpanikọ.
7 Ke ini afo okụtde owo emi owụtde akpan udọn̄ ke ibuotikọ Enyọn̄-Ukpeme m̀mê Awake! emi onyụn̄ ọbọde magazine oro, afo emekeme ndidọhọ: “Ke ini ibuotikọ odude ke nsiondi ini iso oro n̄kerede nte ke eyedemede fi udọn̄, nyenem esịt ndida idem kiet nsọk fi.” Afo emekeme ndisịn owo oro ke afan̄ magazine fo, afiakde aka ndien ndien ye mme magazine eke ndondo emi. Oro edi ukem ye se ẹsinamde ke ini ẹbọde an̄wan̄wa ikot ndifiak n̄ka mbịne mme owo oro ekemede ndidi ẹnen̄ede ẹnyene udọn̄ ke ndusụk ibuotikọ ẹmi ẹdude ke mme magazine nnyịn.
8 Nyene Uduak eke Spirit: Isua ifan̄ ko ke edem, owo emi ekebịnede ubọkọkọ ama ọbọ magazine Awake! ke ibuotikọ oro ekedemerede enye udọn̄. Nte ededi, owo ido ukpono emi n̄ko ama okot nsiondi Enyọn̄-Ukpeme emi akasan̄ade ye enye, emi ekesịnede ibuotikọ emi okonụkde enye ndidụn̄ọde Abasi-Ita-ke-Kiet emi enye ekenịmde ke akpanikọ ke ofụri eyouwem esie. Ọfiọn̄ itiokiet ke ukperedem enye ama ana baptism! Ntem, kûmen̄e ndibuan mme andikot mme magazine nnyịn ke mme nneme eke N̄wed Abasi. Afo emekeme ndimen ediye uduot ekpri n̄wed oro Nso ke Abasi Oyom Oto Nnyịn? n̄wụt onyụn̄ ọdọhọ ke iyesida minit ifan̄ kpọt ineme ukpepn̄kpọ kiet kpukpru ini imọ ifiakde iwaha ye mbufa otu magazine.
9 Tịm kere m̀mê mmanie ke otu mfiakn̄ka fo ye mbon mbubehe fo ẹdikam ẹnen̄ede ẹma ndibọ mme nsiondi Enyọn̄-Ukpeme ye Awake! eke ndondo emi. Ndien sịn ọkpọsọn̄ ukeme ndisịm mmọ. Da nti n̄wedmbụk ẹmi ka bịne ata ediwak owo nte afo ekekeme. Ndien kûfre ete ke adan̄a nte afo odomode ndin̄wam ediwak owo ẹkot mme magazine nnyịn, afo ke ‘ọduọk uyo fo ke enyọn̄ mmọn̄.’ Nte ini akade, afo emekeme ndikụt unen ke ndinyene ekemmọ mbet ini iso.—Eccl. 11:1, 6.