Mbono District “Usụn̄ Uwem Abasi” eke 1998

¹ Mme N̄ke 10:29 eti nnyịn ete ke “usụn̄ Jehovah edi ọkpọsọn̄ idụn̄.” Nso ibuotikọ oro odotde ke mbono isua emi enyene ntem—“Usụn̄ Uwem Abasi”! Didie ke ẹdikam ẹtat ibuotikọ emi ke ofụri ndutịm usen ita emi? Kpukpru nnyịn isak iso ise se ẹtịmde ẹnọ nnyịn ye ọkpọsọn̄ udọn̄. Ndien ẹyeneme mme akpan n̄kpọ.

² Ekeme ndidi mme isụn̄utom, mme asan̄autom ofụri ererimbot, m̀mê mbon eken ẹnamde utom ke esenidụt ẹyedụk mbono mbufo. Ekeme ndidi afo oyosobo ndusụk isenowo ẹmi. Ndutịm mbono ọyọnọ mme ntọt aban̄a nte Jehovah ọdiọn̄de utom ke nsio nsio efakutom.

³ Ndidụk Odot ye Ukeme Oro Ẹsịnde: Ediwak nditọete nnyịn ke Africa ẹmesobo nsọn̄ọn̄kpọ ke ntak ekọn̄ ye ndutịme ẹmi ẹkade iso ke ndusụk ikpehe ke akamba ubak isọn̄ oro. Mmọ ẹse mme mbono ikọt Jehovah nte se inọde mmọ uwem. Ana ndusụk owo ẹnam isan̄ anyan usụn̄ man ẹkedụk mbono, edi mmọ ikereke nditaba ndomokiet. Eyenete kiet edide isua 73 ke emana ke Democratic Republic of Congo (ke akpa ekedide Zaire) ama asan̄a n̄kpọ nte kilomita 450 ndikodụk mbono. Enye ama ekesịm ke usen 16 ẹma ẹkebe tọn̄ọ nte enye akadaha isan̄, ikpat ama ofụt, edi okop inemesịt ndidu do. Ke mbono oro okụrede, enye ama asan̄a ke ikpat afiak ọnyọn̄ ufọk ọyọhọde ye idatesịt onyụn̄ okopde nsọn̄idem ke n̄kan̄ eke spirit. Enye esinam emi ofụri ini ke ediwak isua!

⁴ Ke Mozambique esenyịn district ye n̄wan esie ẹma ẹdọk edikon̄ obot ẹnyụn̄ ẹbe ikpehe oro etiede nte desat ke ukot ndikodụk mbono circuit. Mmọ ẹma ẹsan̄a kilomita 90 ke hour 45. Kpukpru owo oro ẹkedụkde ẹma ẹbọ akwa nsịnudọn̄ ẹto eti uwụtn̄kpọ ebe ye n̄wan emi. Ediwak ubon ẹmi ẹkedude do ẹma ẹsịn utọ ukeme oro ndidụk. Esenyịn district ama ọtọt nte ke ndusụk nditọete, esịnede kiet edide isua 60 ke emana, ẹma ẹsan̄a kilomita 200 ke ukot!

⁵ Ndi afo emenịm okụk oro ẹdiyomde ndida n̄kpe usụn̄ n̄ka mbono ye mme ubiatokụk eken man ofụri owo ke ubon ẹkeme ndidụk? N̄ko, ndi afo amanam ndutịm ye eteutom fo man ọbọ ini utre utom ndidụk ofụri usen ita eke mbono oro? Mme ete ye eka nditọ oro ẹdude ke isua uka ufọkn̄wed oro ẹdidụkde kiet ke otu mbono ẹmi ke adan̄aemi ufọkn̄wed osụk akade iso ẹkpenyene nditịn̄ ukpono ukpono nnọ mme andikpep nte ke nditọ ẹyefiak n̄wed ke Friday kaban̄a akpan ikpehe utuakibuot ido ukpono mmọ emi. Ke m̀mọ̀n̄ ke mbono emi ekperede fi akan odu? Etisịm idahaemi ewetn̄wed esop mbufo anam ẹfiọk ọyọhọ ntọt aban̄ade eke esop mbufo.

⁶ Ndutịm Usen Ita: Isua emi ndutịm oyodu ke mbono 106 ke Nigeria. Ke adianade ye Efịk, ẹyenịm mbono ke Abua, Edo, Gokana, Gun, Hausa, Igbo, Ijaw, Ikọmbakara, Ishan, Isoko, Kana, Tiv, Urhobo, Usem Idiọn̄ọ Mbon America, ye Yoruba.

⁷ Ndutịm editọn̄ọ ke Friday ke n̄kanika ebede 9 ke minit 20 usenubọk onyụn̄ etre ke Sunday ke n̄kpọ nte n̄kanika ebede 3 ke minit 30 uwemeyo. Ke Saturday ye Sunday, ndutịm editọn̄ọ ke n̄kanika usụkkiet usenubọk.

⁸ Nte nnyịn inamde isan̄ ika inyụn̄ inyọn̄de mbono, nnyịn ikpenyene ndiyom ifet edinọ ikọ ntiense ido nneme. Mme anyam aran uwat, mme ewetn̄wed ufọkurua, mme ọbọ etịbe ọkpọusụn̄, mme anam utom ke ufọkisen, ye mme edeme udia ẹkeme ndinyene udọn̄ ke etop Obio Ubọn̄. Tịm idem nọ emi ebe ke ndikama mme tract, mme magazine eke ndondo emi, ndiye uduot n̄kpri n̄wed, m̀mê mme n̄wed eken man ekeme ndida ifet oro nnam n̄kpọ nte ọfọnde ke ndinọ mbon oro ẹkemede ndidi owo ikpesịmke mmọ ye eti mbụk ikọ ntiense.—2 Tim. 3:17.

⁹ ‘Ẹtịn̄ Enyịn Ẹkpeme nte Ẹkpan̄de Utọn̄’: Mme andidụk mbono ẹnyene ọniọn̄ ke ndinam item oro ẹkụtde ke Luke 8:18. Ẹsịn udọn̄ ẹnọ kpukpru owo ndida Bible ọkọrọ ye n̄wedikwọ ye n̄wed uwetn̄kpọ ndi. Tịm nọ n̄kpan̄utọn̄ ke mme akpan n̄kpọ ke utịn̄ikọ kiet kiet, nyụn̄ wet mbio mbio n̄kpọ editi. Bụp idemfo nte ekemede ndida se okopde nnam n̄kpọ ọkpọkpọ. Ke okoneyo mbono oro kiet kiet, mbemiso odụkde idap, ntak mûdụn̄ọkede n̄wetnnịm n̄kpọ fo unyụn̄ use nte afo ọsọn̄ọde eyịre ketket ke usụn̄ uwem Jehovah.—N̄ke 4:10-13.

¹⁰ Ẹma ẹkụt nte ke ini mme ikpehe edinam ẹkade iso, ndusụk owo ẹma ẹkpọn̄ efe mbono ẹketie ke moto mmọ, ke ntre ẹtabade se ẹnamde ke ndutịm. Ẹma ẹkụt mbon en̄wen ẹyode ẹsan̄a ke ini akpanade mmọ ẹtie ke efe mbono ẹkpan̄ utọn̄. Ẹma ẹkụt otu n̄kparawa owo ẹkpọn̄de itie mbono ke ufọt uwemeyo. Ndusụk asan̄autom Jehovah ke ini edem ẹma ẹnam ikpọ ndudue ke ntak mmọ mîketịmke ikpan̄ utọn̄ inọ mme n̄kpọ editi Jehovah. Ke akpanikọ nnyịn iyom ndifep ndinam ukem ndudue oro. (2 Ndi. 17:13-15) “Asan̄autom emi anamde akpanikọ, onyụn̄ enyenede ọniọn̄” emetịm ukpep oro kpukpru nnyịn iyomde. Enen̄ede edi akpan n̄kpọ nte nnyịn “ikpetịm ikpan̄ utọn̄ ikan inọ mme n̄kpọ emi ikokopde” ke mme ikpehe edinam kiet kiet ke ndutịm mbono usen ita emi. Ẹyeneme n̄kpọ oro edide akpan udọn̄ ẹnọ nnyịn ke usen kiet kiet, esịnede ntọt oro ke akpanikọ edinyenede eti odudu ke usụn̄ uwem nnyịn ke ini iso. Ebede ke nnyịn ndinọ n̄kpan̄utọn̄ ye edida se Jehovah ọnọde ke n̄kan̄ eke spirit nnam n̄kpọ ọyọhọ ọyọhọ ke mbono oro asan̄ade ekpere, idotenyịn nnyịn eyenen̄ede enyene iwụk, man ‘nnyịn ikûfiọrọ ikpọn̄’ usụn̄ uwem Abasi.—Matt. 24:45; Heb. 2:1.

¹¹ Usịnen̄kpọ Oro Ọnọde Jehovah Ukpono: Ke ndiọkeyo emi, oyom nnyịn itetịm ikpan̄ utọn̄ ikan man spirit ererimbot emi edikan nnyịn ubọk. (1 Cor. 2:12) Ọfọn̄ ye ukamaidem nnyịn ekpenyene ndiwụt iso o-bụt okponyụn̄ enyene ndiwụt uku Abasi emi nnyịn ikponode. (1 Tim. 2:9, 10) Iyomke ọsọn̄urua ọfọn̄ man owo esịne ke otu mbon oro ‘ẹnamde ukpep-n̄kpọ Abasi Andinyan̄a nnyịn enyene uku.’ (Titus 2:10) Tịm fiọk ata eti item N̄wed Abasi ke page 17 ye 18 ke nsiondi Enyọn̄-Ukpeme eke June 15, 1997, ikpehe ekikere 14-18. Kûdede ubat okopodudu ikọ ntiense oro ikemede ndinọ ebe ke ndisịne n̄kpọ ke usụn̄ ọnọde Jehovah ukpono ke ekpri n̄kpọ.

¹² Ntiense edide isua 16 ke emana etịn̄ ete ke ini imọ ye eyeneka imọ eren ikakade itie unyamudia mbubịteyo kiet ke ikpehe edinam ama akasuana, mmimọ ima ikụt nte ke ndusụk nditọete iren ye iban ẹma ẹkpụhọde ẹsịne edisịnen̄kpọ oro mîdotke. Nte ededi, mme andidep n̄kpọ ke itie unyamudia oro ẹma ẹnam n̄kpọ nte ọfọnde ke ẹkụtde Mme Ntiense oro ẹkesịnede n̄kpọ ediye ediye ye nte odotde ẹnyụn̄ ẹdiande mme kad idiọn̄ọ mmọ. Emi ama eberede usụn̄ ọnọ edinọ ndusụk mme andidep n̄kpọ do ikọ ntiense.

¹³ Edu Uwem Oro Ọnọde Jehovah Itoro: Nnyịn imọdiọn̄ọ ite ke edu uwem Christian nnyịn ekeme nditụk nte mbon efen ẹsede utuakibuot akpanikọ. Ke ntre, nnyịn iyom ndidu uwem ke usụn̄ oro odotde ye eti mbụk onyụn̄ ọnọde Jehovah itoro.—Phil. 1:27.

¹⁴ Isua oko, ẹma ẹnịm mbono district ke akpa ini ke edem edere Angola. Ke ọyọhọ usen mbono iba, ẹma ẹnọ ikpọ owo bodisi iba ẹka itie mbono man ẹkụt ẹte ke n̄kpọ ẹsan̄a ke nde. Mmọ ẹma ẹdu do ke ofụri usen oro. Ke utịt usen oro, mmọ ẹma ẹtịn̄ nte mmimọ imade se ikokopde ye eti edu uwem oro mmimọ ikokụtde. Kiet ke otu mmọ ama ọdọhọ ete: “Ntak ẹkenọde nnyịn idi mi? Nnyịn imọdiọn̄ọ ke Mme Ntiense Jehovah ẹsinam n̄kpọ ke ndutịm ke mme mboho mmọ.”

¹⁵ Andibuana ke n̄ka mbre ukara ke idụt Africa kiet ama efehe aka Europe ke ini ẹkewotde kpukpru mmọ eken ke n̄ka mbre ukara esie. Enye ama enyene ediwak ọkpọkpọ mfịna onyụn̄ enen̄ede anana udọn̄. Nte ini akade enye ama enyịme ukpepn̄kpọ Bible. Ke adan̄aemi odụkde mbono district ke akpa ini, enye ama okop inemesịt nte mme owo ẹtode nsio nsio idaha ke uwem ẹsopde idem ọtọkiet ke emem ye ke n̄kemuyo. Enye ama enịm ete ke imọ imokụt akpanikọ, ndien ke mbono oro enye ama ebiere nditre kpukpru ebuana mbre ukara esie. Ekem enye ama ana baptism, ndien idahaemi enye ye nditọ esie ke ẹnam n̄kpọ ẹnọ Jehovah.

¹⁶ Didie ke edu uwem nnyịn ke mbono isua emi editụk mbon oro ekemede ndidi ẹdidụk ke akpa ini? Ndi mmọ ẹyekụt uyarade edu edidianakiet ke ini nnyịn inamde utom ọtọkiet nte mme anamutom unyịmesịt? Ndi mmọ ẹyekop inemesịt kaban̄a nte n̄kann̄kụk nnyịn asanade ye ke ndikụt nte ke mbemiso ikpọn̄de itie mbono, nnyịn ye nditọ nnyịn imatan̄ mbio ekededi oro ekemede ndidi ẹma ẹbono ẹkpere itie nnyịn? Ndi mmọ ẹyekụt eti edu uwem nnyịn nte inamde isan̄ ika inyụn̄ inyọn̄de itieidụn̄ nnyịn ye itie mbono? Ndi mmọ ẹyekụt nte ke nte mme ete ye eka, nnyịn imetịm ise nditọ nnyịn enyịn kpukpru ini? Ẹyak nnyịn ikụt ite ke imanam kpukpru mbon oro ẹsede nnyịn ẹnyene mfọnn̄kan ekikere nte ekekeme.

¹⁷ Ndise Mban̄a Mme Ubiatokụk Mbono: Kpukpru ini N̄ka esinyene ido “n̄kpọitie edi ke mfọn, etịbe idụhe” ke mme mbono. Didie, ndien, ke ẹdise ẹban̄a mme ubiatokụk mbono? Ebe ke etịbe ofụri esịt mbon oro ẹdụkde. Nnyịn imenịm ke afo oyowụt edu ntatubọk nte enye oro mme asan̄autom Abasi ke eset ẹkewụtde ke ndikpebe Jehovah Abasi ye Jesus Christ. (2 Cor. 8:7) Ẹnọ akwa ntịn̄enyịn ndikụt nte ke ẹtịm kpukpru etịbe ẹnịm, ẹnyene n̄wetnnịm n̄kpọ, ẹnyụn̄ ẹda mme etịbe ẹnam uduak oro ẹketịpde ẹnọ. Ẹkpenyene ndinọ kpukpru etịbe oro ẹnamde ke babru ubọ okụk ban̄k ẹsọk “Watch Tower.”

¹⁸ N̄kpọitie: Mme ndausụn̄ oro ẹma ẹkenọ ke ediwak isua ẹyeka iso ndinyene ufọn, oro edi, ẸMEKEME NDIMỤM N̄KPỌITIE NNỊM NNỌ MBONUFỌK MBUFO IKPỌN̄ÎKPỌN̄ YE OWO EKEDEDI ORO EKEMEDE NDIDI ASAN̄A YE MBUFO KE MOTO MBUFO. Edi eti n̄kpọ ndikụt nte ke ediwak owo ke ẹtiene mme ndausụn̄ ẹmi ke mme isua ndondo emi, ndien emi emenerede ima ima idaha ẹwụtde ke mme mbono. Ke ata ekese itie mbono, enen̄ede emem utom ndisan̄a n̄kesịm ndusụk n̄kpọitie akan mmọ eken. Mbọk wụt edikere mban̄a, nyụn̄ kpọn̄ mme n̄kpọitie oro ẹferede owo ke idem ẹkan nọ mbonusọn̄ ye mbon eken ẹmi mme idaha mmọ ẹyomde. Ti ete ke ‘ima iyomke ufọn esiemmọ.’—1 Cor. 13:4, 5; Phil. 2:4.

¹⁹ Mme Ukwak Usio Ndise, Ukwak Umụm N̄kpọ Vidio, ye Mme N̄kpọ Umụmikọ: Ẹkeme ndikama mme ukwak usio ndise ye mme n̄kpọ umụm n̄kpọ ke mme mbono. Nte ededi, inaha afo ndikama mmọ ọwọn̄ọde ntịn̄enyịn mbon en̄wen. Ndisan̄a n̄kanade nsio ndise ke ini ikpehe edinam akade iso ekeme ndifịna mbon efen oro ẹdomode ndiwụk ntịn̄enyịn ke ndutịm. Owo inyeneke ndifak ukwak umụm n̄kpọ ndomokiet ke ikan̄ ilektrik m̀mê ke ndutịm ukwak utịn̄ikọ, m̀mê ndiyak n̄kpọ emi esịri barakọn̄, usụn̄ emi ẹsan̄ade, m̀mê ndibiọn̄ọ mbon en̄wen.

²⁰ Akpa Usọbọ: Itieutom Akpa Usọbọ edi kaban̄a mme mbabuat n̄kpọntịbe ikpọn̄îkpọn̄. Mbọk da aspirin, se in̄wamde udia ataha, ubọp unan, mme pin, ye mme n̄kpọ ntre, sia owo mîdinọhọ mme utọ n̄kpọ oro ke mbono. Mme owo ekededi ẹmi ẹnyenede udọn̄ọ ndisi, isiọn̄, mme mfịna esịt, ye ntre ntre eken, ẹkpenyene ndikama mme ibọk ẹmi mmọ ẹdiyomde. Mmọ ẹkpenyene ndisan̄a ye andibuana ke ubon m̀mê ke esop mmọ emi ọfiọkde idaha mmọ emi onyụn̄ ekemede ndinam n̄kpọ kaban̄a mbabuat n̄kpọntịbe, edieke oro etịbede. Mfịna ẹma ẹdemede ke mme mbono ke ini ẹkedahade ẹkpọn̄ mme owo oro ẹnyenede uyịre uyịre udọn̄ọ ndien mmọ ẹduọ udọn̄ọ. Edieke ndusụk mbon ẹmi ẹnyenede akpan udọn̄ọ mînyeneke mbonubon ẹmi ẹkemede ndin̄wam mmọ, oyom ẹsian mbiowo esop mmọ ẹban̄a idaha mmọ ẹnyụn̄ ẹnam ndutịm oyomde man ẹn̄wam. Owo ikemeke ndinam ndutịm ke itie mbono nnọ san̄asan̄a ubet ndisịn mbon oro ẹnyenede udọn̄ọ oro n̄kann̄kụk anamde etetịm ọsọn̄ ubọk m̀mê oro ibọk usọbọ afịnade.

²¹ Udia ke Mbono: Owo kiet kiet oro odụkde ekpenyene ndikama udia esie ndi utu ke ndikpọn̄ itie mbono ke ibio ini nduọkodudu n̄ka ndidep n̄kpọ ke an̄wa. Mfefere udia oro ọnọde owo nsọn̄idem onyụn̄ edide se ẹkemade mfefere mfefere ekeme ndikem. Esịne-esịt Utom Obio Ubọn̄ Nnyịn eke September 1997, ikpehe ekikere 18, ọnọ ndusụk ekikere kaban̄a se ẹkpemende ẹdi. Owo inyịmeke ẹkama mme ọtọakpa ye n̄kpọsọn̄ mmịn ke itie mbono. N̄kpọ udọn̄ udia m̀mê mme ekpat ana ẹkpri ekem ndidi se esịnde ke idak n̄kpọitie fo. Ẹma ẹkụt nte ndusụk otuowo ẹdiade ẹnyụn̄ ẹn̄wọn̄de n̄kpọ ke ini ndutịm. Emi owụt unana ukpono ọnọ edinam oro.

²² Nnyịn ikop idatesịt didie ntem nte ke Mbono “Usụn̄ Uwem Abasi” eke 1998 ọmọn̄ ọtọn̄ọ ke mîbịghike! Ndi amanam ndutịm fo okụre man ekeme ndidụk? Afo akpakam aka onyụn̄ ọnyọn̄ ke ifụre afiakde okop nsọn̄idem, ebierede ndikaiso ke ọsọn̄urua utom Jehovah ye ke ndika iso mbịne usụn̄ uwem Abasi man enyene nsinsi edidiọn̄.

[Ekebe ke page 6]

Mme N̄kpọ Editi Mbono

▪ Baptism: Mbon baptism ẹkpenyene nditie ke ikpehe oro ẹmekde ẹnịm ẹnọ mmọ mbemiso ndutịm ọtọn̄ọde ke usenubọk Saturday. Owo kiet kiet oro aduakde ndina baptism ekpenyene ndisan̄a ye ọfọn̄ uyeremmọn̄ eke owụtde iso o-bụt ye ọfọn̄ ukwọhọdeidem. Ke ini edem ndusụk owo ẹma ẹsịne ọfọn̄ oro mîdotke onyụn̄ ọwọn̄ọrede ntịn̄enyịn ọkpọn̄ edinam oro. Mbiowo ẹmi ẹdụn̄ọrede mme mbụme ke n̄wed Utom Nnyịn ye mbon baptism ẹkpenyene ndikụt ẹte ke mme akpan n̄kpọ ẹmi ẹn̄wan̄a owo kiet kiet. Baptism ke idiọn̄ọ uyakidem owo nnọ edi n̄kpet n̄kpet ye ọkpọkpọ mbubehe ke ufọt owo oro ye Jehovah. Ntem, idotke mbon baptism ndifat kiet eken n̄kama m̀mê ndimụm ubọk ke adan̄aemi ẹnade baptism.

▪ Mme Kad idiọn̄ọ: Mbọk dian kad idiọn̄ọ 1998 kpukpru ini ke adan̄aemi odude ke obio mbono ye ke adan̄aemi anamde isan̄ aka onyụn̄ ọnyọn̄de-nyọn̄. Emi esiwak ndinọ nnyịn ifet ndinọ eti ikọ ntiense. Ẹkpenyene ndibọ kad idiọn̄ọ ye efọk ebe ke esop mbufo, sia mmọ mîdidụhe ke mbono. Kûbet tutu osụhọ usen ifan̄ ndisịm mbono mbemiso oyomde kad fo ye eke ubon fo. Ti ndikama kad Advance Medical Directive/Release fo eke idahaemi.

▪ Itieidụn̄: Nnyịn imafiak iben̄e edidianakiet ito kpukpru owo kaban̄a ufọkidụn̄ oro mbono ọnọde. Edieke nnyịn ifụmide ndutịm N̄ka inyụn̄ ibọde ufọkidụn̄ oro mbono ama ọkọbọbọ, nnyịn imabiat ọkpọsọn̄ utom oro nditọete nnyịn ẹmi ẹkediomide se imemde urua ikan ẹkenamde. EDIEKE AFO ENYENEDE MFỊNA KE UFỌKIDỤN̄, mbọk kûmen̄e ndidụri ntịn̄enyịn esenyịn Itieutom Unọ Ufọkidụn̄ ke mbono oro n̄wụt man enye ekeme ndin̄wam fi ndikọk mfịna oro inikiet inikiet. Mme ewetn̄wed esop ẹkpenyene ndikụt nte ke ẹnọ mme babru Special Needs Room Request ke eti ini ẹka nnennen adres mbono. Edieke anade afo abiat ndutịm ufọkidụn̄ oro ẹkenamde ẹbe ke ndutịm san̄asan̄a udọn̄, afo ekpenyene nditọt enyeneufọk ye Itieutom Unọ Ufọkidụn̄ usọp usọp man ẹkeme ndifiak mmen ubet oro nnọ owo efen.

▪ Utom Unyịmesịt: Nte afo emekeme ndisio ini nnịm ke mbono emi man an̄wam ke itieutom kiet? Ndinam n̄kpọ nnọ nditọete fo, ekpededi ke hour ifan̄, ekeme ndinen̄ede nnọ un̄wam onyụn̄ ada ekese ọkpọkpọ uyụhọ edi. Edieke afo ekemede ndin̄wam, mbọk ka Itieutom Utom Unyịmesịt ke mbono oro. Nditọwọn̄ oro mîsịmke isua 16 ke emana ẹkeme n̄ko nditịp n̄kpọ nsịn ediye ediye ebe ke ndinam utom ke idak ndausụn̄ ete m̀mê eka mmọ m̀mê akamba owo efen oro odotde.

▪ Mme Ikọ Item: Kụt ete ke ọmọkọbi moto fo kpukpru ini, ndien kûdede ukpọn̄ n̄kpọ ndomokiet oro ẹkemede ndida n̄kụt oro esịnde owo oyom ndibom ndụk. Mbon n̄wo ye mme inọ ekpatọfọn̄ ẹsiwụk ntịn̄enyịn mmọ ke ikpọ otu. Ikpowụtke eti ibuot ndikpọn̄ mme ọsọn̄urua n̄kpọ ke n̄kpọitie fo. Afo ukemeke ndifiọk m̀mê kpukpru owo ẹmi ẹdude ẹkpere fi ẹdi Christian. Ntak emi enịmde n̄kpọ idomo ekededi? Ẹma ẹbọ mme ntọt ẹban̄a nte ndusụk mbonan̄wa ẹkedomode nditap nditọwọn̄ nda ndaha. NAM NDITỌ FO ẸDU KE EBIET EMI EKEMEDE NDIKỤT KPUKPRU INI.

Mme edinam ekebe ndise ye vidio oro ẹdude ke ediwak ufọkisen ẹsiwak ndiwụt mme edinam idan̄. Kûyak nditọ fo ẹse ekebe ndise ke ubet ke mûsehe enyịn uban̄a.