Anie Edede Adia Ufọk Mme Ebeakpa?
1 ‘Mmọ ẹmi ẹdia ufọk mme ebe-akpa, . . . mmọ ẹyebọ ubiom-ikpe eke okponde akan.’ (Mark 12:40) Ntak emi Jesus eketịn̄de ikọ emi? Okposụkedi enye ekenemede aban̄a ntan̄idem ye mbiara edu mme scribe eke eyo esie, nte ededi ana in̄wan̄în̄wan̄ nte ke enye ndisiak mme ebeakpa ke udọn̄ikọ emi odori nsọn̄uyo ke nte ọdiọkde ndifịk mme unen utọ owo ẹmi nnịm. Enye ekeme ndida n̄kesịm ubiomikpe Jehovah.—Isa. 1:23.
2 Edi nso ke ‘edidia ufọk mme ebe-akpa’ ọwọrọ? Kere ban̄a mme idaha ẹmi ise. N̄wedmbụk n̄kpọntịbe kiet ama ọtọt ete ke ini n̄wan kiet akatabade ebe esie ke n̄kpa, mme ukot esie ẹma ẹdeme ufọk akpan̄kpa oro ke otu idem mmọ ẹnyụn̄ ẹdori ebeakpa oro ikọ nte ke enye okowot ebe esie. Mmọ ẹma ẹkaha enye ye n̄kpọsọn̄ mbụme ẹkpere ndisịm hour ita. Ekem, mmọ ẹma ẹdọhọ enye ọn̄wọn̄ mmọn̄ oro ẹkedade ẹyet okpo oro. Mmọ ẹma ẹdomo ndinyịk enye ndidọ ukot kiet. Ke ini enye ekesịnde, mmọ ẹma ẹbịn enye ẹfep ke ubon ẹnyụn̄ ẹkpọn̄ enye ndise mban̄a idemesie ye nditọ esie ita oro mînyeneke ete. Ke idaha efen, ebeakpa kiet ọkọdọhọ ke imọ ima ibọ ufen idem ke ubọk ndusụk mbiowo esop ke ini mmọ ẹketan̄de n̄kpọ akpa ebe imọ ke odudu ke ikpîkpu ntak nte ke mmimọ ikoyom ndikpeme usụn̄ oro imọ ididade inyene emi inam n̄kpọ. Eyịghe idụhe ebeakpa kiet ọkọdọhọde ete ke ‘ndidi ebeakpa etie nte ndidụn̄ ke idụt emi owo ndomokiet mîsemke usem oro afo esemde, idụt oro ẹdade ke afo edi n̄kpọ mbet.’
3 Ke nsan̄a mmọ ẹkpade, ẹdiọn̄ọ ke mme ebeakpa ẹsikop iyatesịt, ẹkụt edikpu, ẹkop mfụhọ, ẹdu ikpọn̄, ndien ke ndusụk ini ẹdu ke ndutịme. Owo ekededi ndimen nnama unana n̄kpọ udu uwem ndian ke mme mfịna ẹmi etie nte edisịk urụk nnen̄ede mbọp ọsọn̄ ke itọn̄ owo oro okopde mmemidem. Enye akama nsobo. Idiọkitọn̄, edida odudu nnam n̄kpọ ke idiọk usụn̄, unana ifiọk, ye ndịk ido obio ẹdi ibat ibat ke otu mme n̄kpọ oro ẹnamde mme owo ẹfịk mme ebeakpa ye nditọakpa. Nte ededi, ntak ẹmi ndomokiet inamke owo oro eduede ọbọhọ iyatesịt Abasi. (Ex. 22:22, 23) Ntak edi oro anade kpukpru Christian ẹdu ke ukpeme nditre ndifịk m̀mê nditụk mme ebeakpa ye nditọakpa.
4 Edi n̄kpọ mfụhọ ndidọhọ, ndusụk ebe ẹdide Christian, tutu esịm n̄kpa mmọ, ẹtịp n̄kpọ ẹsịn ke n̄kpọnnam eke iban ẹmi mmọ ẹkpade ẹkpọn̄ ebe ke ndidịp inyene mmọ m̀mê ebe ke ndibiọn̄ọ iban mmọ ndidiọn̄ọ ebiet emi okụk ban̄k, insurance, ye mme inyene obụkidem mmọ eken ẹdude. Akan oro, mmọ ẹkpu ndiwet unen n̄kpọ akpa oro anamde an̄wan̄a nte ẹkpedemede inyene mmọ, eyedi iyomke iban (ye nditọ) mmọ ẹda n̄kpọ ndomokiet ẹnyene ke mmọ ẹkpade. Mmọ ke ntre ye unana edifiọk ẹsio iban (ye nditọ) mmọ ẹnyan ẹnọ ndutụhọ oro mîdotke. Emi owụt ke mme utọ owo oro inen̄ekede ima iban mmọ nte idem mmọ.—Eph. 5:28, 29.
5 Nte ededi, nte odotde itoro, mmọ en̄wen ẹsiwet unen n̄kpọ akpa oro etịmde an̄wan̄a owụtde mme n̄kpọ oro mmọ ẹyomde ẹnọ n̄kpet n̄kpet mme andibuana ke ubon mmọ ke mmọ ẹkpade. Ifiọk n̄kpọntịbe owụt nte ke emi edi ima ima ye ọniọn̄ ọniọn̄ ndutịm. Enye ọbiọn̄ọ ufịk oro ekemede ndidu. Ke akpanikọ, enye edi ‘ubọk-utom Eti Ibuot emi owụtde ete ke Eti Ibuot enen.’—Matt. 11:19; 2 Cor. 12:14; 1 Tim. 5:8.
6 Kiet ke otu mme n̄kpọ oro akanamde Jehovah obiom “mme ebiereikpe Sodom” ikpe ekedi edifịk mme ebeakpa. (Isa. 1:10, 17) Enye ke oro ebede ama esịn ndibiọn̄ utọn̄ ke n̄kpeubọk ye eben̄e mmọ. Idiọk edikama mme ebeakpa m̀mê nditọakpa ekeme ndida n̄kesịm editaba mme akpan ifet utom ke esop. Ubiomikpe ekeme ndikam ndobi n̄kan nnọ mbon oro idiọk edikama mme ebeakpa ye/m̀mê nditọakpa abuanade n̄kanubọk ye idiọkitọn̄. Ẹkeme ndisio mme utọ owo oro nte enende mfep ke esop Christian ibọhọke mmọ ẹnen̄erede ẹkabade esịt ẹnyụn̄ ẹfiak edem. Mbiowo ke ntre ẹkpenyene ndidu ke edidemede ‘ndikpe edinen ikpe’ nnọ mme ebeakpa nnyụn̄ n̄kpeme mmọ mbiọn̄ọ mme owo oro ẹbietde ekpe m̀mê mbon n̄wo.—Isa. 1:17; Mark 12:40; 1 Cor. 5:10, 11; 6:10; 1 Tim. 3:8.
7 Akpakam kpukpru nnyịn idu ke mben̄eidem inyụn̄ inyịme “ndisan̄a nse nditọ-akpa ye mme ebe-akpa ke ukụt mmọ,” ndien ke ntre inamde utuakibuot oro Jehovah, Abasi nnyịn oro ekerede aban̄a, enyịmede.—Jas. 1:27.