Nte August Eyedi N̄wọrọnda Ọfiọn̄?
1 Ke isua 1948 ibat mme asuanetop ke ofụri ererimbot ama ebe 226,000. Edieke afo okodude ke akpanikọ ke ini oro, afo emekeme nditi nte idem akaduaide nnyịn ndinyene ediwak owo ntre ẹkwọrọde etop Obio Ubọn̄! Idahaemi, mme asuanetop ẹwakde ntre ẹdu ke idụt emi ikpọn̄. Nte ededi, ke ọfiọn̄ kiet kiet, ke ẹbaharede ukem ukem, owo 20,000 ke otu nnyịn isitọtke ke ima inyene ndusụk ebuana ke utom ukwọrọikọ.
2 Nyịme N̄kpọ-Ata Oro: Ke August nnyịn idomo ndisịm n̄wakn̄kan ibat oro akanam ẹsịmde edide mme asuanetop 215,000 ke Nigeria. Edieke mme ukeme nnyịn ẹkụtde unen, August eyedi n̄wọrọnda ọfiọn̄ ke akpanikọ! Nnyịn imekeme ndinam emi edieke kpukpru nnyịn inamde udeme nnyịn.
3 Mbon oro ẹdiomide ndika nduọkodudu ẹkeme ndibiat ndusụk ini ke utom ukwọrọikọ mbemiso ẹdahade. San̄a ye mme tract, ndiye uduot n̄kpri n̄wed, m̀mê mme magazine man otodo afo ekeme ndinọ mme owo oro afo osobode ke usụn̄ ikọ ntiense. N̄ko, ke ebiet oro afo akade afo emekeme ndidara edibuana ke utom ukwọrọikọ ye mme asuanetop n̄kann̄kụk.
4 Edieke afo edide owo n̄kpọnnam, afo emekeme ndisụk nnyene ebuana ke utom ukwọrọikọ. Afo emekeme ndinọ mme dọkta, mme nurse, m̀mê mme isenowo ikọ ntiense. Iso-ọfọn afo emekeme ndida leta m̀mê urụk ukopikọ nnọ ikọ ntiense.
5 Ndusụk owo nte eyịghe mîdụhe ẹyema ndibọ un̄wam man ẹbuana ke utom ukwọrọikọ ke August. Mbiowo, mme asan̄autom unamutom, ye mme ada ukpepn̄kpọ ẹkpenyene ndidiomi man ẹnọ un̄wam emi. Ke kpukpru usụn̄, kûfre ndikpọn̄ ibatutom an̄wautom fo nnọ ye unana ubiatini ke utịt ọfiọn̄ man ẹbat fi nte asuanetop ke August.
6 Ma Ifetutom Oro: Utom ukwọrọikọ edi “eti enọ.” (2 Tim. 1:14) Nnyịn imama ifetutom oro ẹnọde nnyịn ndikwọrọ eti mbụk. (1 Thess. 2:4) Ke ini nnyịn ikerede iban̄a kpukpru n̄kpọ oro Jehovah anamde ọnọ nnyịn, ekpenyene ndinụk nnyịn ndinyene n̄kaiso ebuana ke akakan utom emi ke ofụri isua. Nnyịn ikpenyeneke ndiyak n̄kpọ ndomokiet ọbiọn̄ọ nnyịn ndikwọrọ ikọ kpukpru ini. Ẹyak nnyịn inam August emi edi n̄wọrọnda ọfiọn̄ ke utom Jehovah inyụn̄ ibiere ndinọ ikọ ntiense mban̄a enye kpukpru ọfiọn̄ ke oro ebede!—Ps. 34:1.