Nnyịn Ima Ibọ Ufọn Ito Mme Mbono “Usụn̄ Uwem Abasi”
1 Ke ọfiọn̄ ifan̄ ẹmi ẹkekam ẹbede, nnyịn ikanam mme ndutịm ndidụk mme Mbono District “Usụn̄ Uwem Abasi” eke 1998. Idahaemi mmọ ẹmekabade ẹdi mme akpan n̄kpọntịbe ẹmi ẹdotde ẹti ke mbụk ukara Abasi eke esop. Nnyịn ima inen̄ede idara akpakịp udia eke spirit oro nnyịn ikọbọde ke mme n̄wọrọnda mboho oro.
2 Ikpehe mbono eke ofụri ererimbot isua emi ama enen̄ede aduai owo idem. Edide mme isụn̄utom ye mme andidụk eken ẹtode isenidụt ẹma ẹdu ke ebiet emi nnyịn ikodụkde m̀mê ikoduhe, kpukpru nnyịn ima ikop nti ifiọkutom ke ikpehe uwemeyo Friday emi ibuotikọ ekedide “Utom ke An̄wautom Isụn̄utom.” “Ntọt Kaban̄a N̄kọri Utom Idọk” eke usen ke usen ẹtode ofụri ererimbot ẹkedi ata n̄kpọ nsịnudọn̄.
3 Utịbe Utịbe Mbufa N̄wed: Akpatre utịn̄ikọ ke Friday ama ọbọrọ mbụme oro anana-ibat owo oro mîdiọn̄ọke akpanikọ ẹsibụpde: “Ndi Uwem Odu ke N̄kpa Ebede?” Utịn̄ikọ oro edemerede udọn̄ akan do eketre ye edisio obufa ediye uduot ekpri n̄wed, Nso Itịbe inọ Nnyịn ke Ini Nnyịn Ikpade? Eyịghe idụhe nte ke etisịm idahaemi nnyịn ima ikot enye imonyụn̄ ikeme ndikụt nte enye edinyenede ufọn ke ndin̄wam mme owo ẹkụt akpanikọ aban̄ade idaha mme akpan̄kpa ye ke ndida idotenyịn ediset ke n̄kpa ndọn̄ mbon oro owo mmọ akpade esịt.
4 Uwemeyo Saturday ekesịm utịt ye ibuotikọ oro “Andibot—Edu Esie ye Mme Usụn̄ Esie.” Enye ama ada nnyịn ke usụn̄ owụtde ifiọk esịm ubiere oro nte ke anaedi Andibot odu. Man an̄wam nnyịn ndin̄wam mbon efen ẹfiọk akpanikọ emi, ẹma ẹsio n̄wed oro, Is There a Creator Who Cares About You? Ke adan̄aemi enye anamde mbuọtidem oro inyenede ke Jehovah ye esịtekọm nnyịn kaban̄a edu ye mme usụn̄ esie ọkọri, ẹtịm n̄wed oro akpan akpan ẹnọ mbon oro ẹkemede ndidi inịmke Abasi ke akpanikọ kpa ye oro ẹnyenede akamba ifiọkn̄wed.
5 Ubiere Ofụri Esịt: Akpatre utịn̄ikọ ke mbono ama ọsọn̄ọ etịn̄ ufọn oro odude ọnọ kpukpru nnyịn ‘Ndika Iso Nsan̄a ke Usụn̄ Jehovah.’ Okodot didie ntem ndinam ẹdiọn̄ọ ubiere nnyịn owo kiet kiet ndisọn̄ọ nyịre, nda nnọ, nnyụn̄ nsịn udọn̄ nnọ ata eti usụn̄ uwem Abasi kpukpru ini! (Isa. 30:21) Ana nnyịn idahaemi ibiere ndidu uwem ekekem ye mme ubiere ẹmi. Nso eti nsịnudọn̄ eke spirit ke nnyịn ikọbọ ntem ke ndidụk Mbono “Usụn̄ Uwem Abasi”!