Mme Esenyịn Oro Ẹdade Usụn̄—Ewetn̄wed
1 Ewetn̄wed esop enyene akpan udeme ke ndikụt nte ke “ẹnam kpukpru n̄kpọ ke nde ye ke ido nte eyede.” (1 Cor. 14:40) Nte andibuana ke Kọmiti Utom Esop, enye ese aban̄a mme n̄wetnnịm n̄kpọ ẹban̄ade edinyene nneme ye akpan n̄kpọ esop eken. Okposụkedi utom esie mîdịghe se ẹkemede ndisọp n̄kụt nte eke mbiowo eken, ẹnen̄ede ẹyom ẹnyụn̄ ẹwụt esịtekọm ẹban̄a utom esie.
2 Ke ini ẹbọde leta ẹto N̄ka m̀mê mbon en̄wen, ewetn̄wed eyese aban̄a onyụn̄ okụt ete ke ẹnam n̄kpọ ẹban̄a ke ini oyomde. Enye okụt ete ke imanam mme leta oro ẹbọde ẹsan̄a ẹkanade ke otu mbiowo ndien ekem ọdọn̄ mmọ ke n̄kpọ udọn̄ n̄wed ọnọ ini iso. Enye esidụn̄ọde mme babru editobo magazine ye mme n̄wed onyụn̄ ọnọ mmọ ẹsọk N̄ka. Enye ese enyịn aban̄a mbon oro ẹkamade okụk ye mme editobo ọkọrọ ye kpukpru n̄kpọ oro ẹnyenede ebuana ye ikpọ mbono.
3 Sia anade ewetn̄wed ọnọ ibatutom an̄wautom esop eke ọfiọn̄ ke ọfiọn̄ ẹsọk N̄ka ke ọyọhọ usen itiokiet ke ọfiọn̄, oyom kpukpru nnyịn itọt utom an̄wautom usọp usọp kpukpru ọfiọn̄. Enye ndien eyewet ibatutom ọdọn̄ ke mme kad Ibatutom Asuanetop Esop. Asuanetop ekededi ekeme ndiyom ndise ọkpọkpọ n̄wetnnịm ibatutom esie.
4 Ke ini asuanetop odụkde edi m̀mê ọwọrọde ọkpọn̄ esop, ewetn̄wed esiwet obụp mîdịghe ọnọ mbiowo esop eken leta edimen n̄wụt ọkọrọ ye mme kad Ibatutom Asuanetop Esop owo oro.—Utom Nnyịn, page 104-105.
5 Ewetn̄wed esop esidụn̄ọde utom mme asiakusụn̄, anamde mbiowo, akpan akpan esenyịn utom, ẹfiọk mfịna ekededi oro ekemede ndidi mme asiakusụn̄ ẹnyene. Enye ayanam mme ada Ukpepn̄kpọ N̄wed Esop ẹdu ke edidemede ẹban̄a mme asuanetop oro mînamke utom an̄wautom kpukpru ini. Ewetn̄wed ye esenyịn utom ẹsida iso ke ndinam ndutịm edise mban̄a mbon oro mînamke utom aba.—Utom Obio Ubọn̄ Nnyịn, February 1989, p. 1.
6 Ke ima iketịm ifiọk mme utom ewetn̄wed, nnyịn ikpakam inam se nnyịn ikemede man in̄wam enye ndiyọhọ utom esie nte akama-ukpọhọde.—1 Cor. 4:2.