Ana Kpukpru Owo ‘Ẹnyịme Ikọ’!
1 Ediwak miliọn owo ke ẹkpep Bible ye Mme Ntiense Jehovah. Man ẹdot ndinyene uwem nsinsi, ana mmọ ‘ẹnyịme ikọ,’ nte owo 3,000 oro ẹkekabarede esịt ẹnyụn̄ ẹnade baptism ke usen Pentecost eke 33 E.N., ẹkenamde. (Utom 2:41) Nso mbiomo ke emi odori nnyịn ke idem mfịn?
2 Oyom nnyịn in̄wam nditọ ukpepn̄kpọ Bible nnyịn ẹkọri uten̄e Jehovah. (1 Tim. 4:7-10) Ke ntak oro, esịne-esịt Utom Obio Ubọn̄ Nnyịn eke June 1996, ikpehe ekikere 20, ọnọ ekikere ete: “Ke ofụri ini ukpepn̄kpọ oro, yom mme ifet ndikọri esịtekọm nnọ mme edu Jehovah. Tịn̄ mme ntotụn̄ọ ekikere fo kaban̄a Abasi. N̄wam eyen ukpepn̄kpọ ekere n̄kpọ ke usụn̄ oro anamde enye ofori ufiop ufiop, ọkpọkpọ itie ebuana ye Jehovah.”
3 N̄kpọ-Ata Oro Isobode: Ke ẹdide se nsunsu ido ukpono enyenede odudu ke idem mmọ, ata ediwak owo ẹmeyụhọ ye orụk utuakibuot oro abuanade edisịn esisịt ini ye ukeme, emi mîyomke ata ukpụhọde ekededi ke usụn̄ uwem mmọ. (2 Tim. 3:5) N̄kpọ-ata oro isobode edi ndin̄wam nditọ ukpepn̄kpọ Bible nnyịn ẹkụt ẹte ke utuakibuot akpanikọ abuana se ikande edidi sụk mme andikokop ikọ Abasi. Ana mmọ ẹda se ẹkpepde ẹsịn ke edinam ke uwem mmọ. (Jas. 1:22-25) Edieke n̄kpọ odude ke edu uwem mmọ oro Abasi mîmaha, oyom mmọ ẹdiọn̄ọ ke obiomo mmimọ ‘ndifiak edem’ nnyụn̄ nnam se inende man ẹnem enye esịt. (Utom 3:19) Man ẹnyene nsinsi uwem, ana mmọ “ẹn̄wana eti-eti” ẹnyụn̄ ẹsọn̄ọ ẹda ẹnọ akpanikọ.—Luke 13:24, 25.
4 Ke ini enemede nsio nsio ikpehe ido uwem, bụp eyen ukpepn̄kpọ Bible fo nte enye enen̄erede ese mme n̄kpọ ẹmi ye se enye akpanamde edieke enye okụtde ke oyom inam mme ukpụhọde ke uwem imọ. Dụri ntịn̄enyịn esie wụt esop oro ekpepde enye akpanikọ, nyụn̄ sịn udọn̄ nọ enye ndisidụk mme mbono esop kpukpru ini.—Heb. 10:25.
5 Ẹyak inam edi uduak nnyịn ndinam ukpepn̄kpọ nnyịn esịm esịt eyen ukpepn̄kpọ. Nnyịn iyokop idatesịt nte nnyịn idemede udọn̄ mbufa owo ndinyịme ikọ Abasi ke ofụri esịt nnyụn̄ nna baptism!—1 Thess. 2:13.