Mbono District “Ntịn̄nnịm Ikọ Abasi” eke Mme Ntiense Jehovah eke 1999
1 Ke ini nditọ Israel ẹkedude ke wilderness, Jehovah ama eteme Moses ete anam ukotowo silver iba. Edieke ẹkefride ukotowo kiet kpọt, mbọn̄ obio esien ẹkenyene ndiboho ke enyịnusụn̄ efe esop. Uyo ukotowo mbiba edidi idiọn̄ọ ọnọ kpukpru nditọ Israel ndisop idem ọtọkiet. (Num. 10:1-4) Mfịn, ndi nnyịn ikopke nduaidem ke ini ikopde mme ntọt, ukem nte uyo ukotowo, atan̄de nnyịn obok ke mme mbono district eke isua ke isua nnyịn? Nnyịn imesibọ mme ntọt ye ndausụn̄ ẹtode Jehovah ebe ke Ikọ esie ye mme andida ke ibuot esie oro enye emekde ke mme mbono nnyịn. Emi an̄wam nnyịn ndika iso nsọn̄ọ nda ke utom inamde inọ Abasi. Ndi nnyịn isikopke idatesịt ke ini ikụtde ediwak tọsịn—ndusụk tọsịn ke mme itie duop—mme ekemmọ anam-akpanikọ andituak ibuot nnọ Jehovah ẹbohode ọtọkiet ke ima ye emem? Nnyịn ke akpanikọ imesikop!—Ps. 122:1, 7, 8.
2 Ọtọn̄ọde ke October 1998 esịm January 1999, ẹma ẹnịm ofụri ibat Mbono District “Usụn̄ Uwem Abasi” 106 ke obio 22 ke ofụri Nigeria. Kpukpru nnyịn ima ibọ nsịnudọn̄ ito eti ebuana oro ikenyenede ye nditọete nnyịn ebe ke nsio nsio ikpehe ndutịm mbono oro, akpan akpan mme ifiọkutom an̄wautom ye mme ntọt kaban̄a n̄kọri utom ukwọrọikọ Obio Ubọn̄ ke mme idụt efen. Nte nnyịn ibohode ọtọkiet kaban̄a mbono district eke 1999 nnyịn, nnyịn iyenyene mbufa ifet ndikụt ọsọn̄urua itie nditọete nnyịn nnyụn̄ n̄kọm Jehovah mban̄a edidianakiet oro enye ọnọde nnyịn.
3 Nte ntịmidem akade iso kaban̄a Mbono District “Ntịn̄nnịm Ikọ Abasi” eke 1999, nnyịn iyama ndidụn̄ọde ndusụk akpan ntọt ẹmi afo ediyomde man ọbọ itieidụn̄ ke mbono oro. Ọyọhọ edidianakiet fo oyowụt esịtekọm oro afo enyenede ọnọ kpukpru ndutịm oro ẹnamde ke ufọn fo.
4 Mme Item ke Ndibọ Itieidụn̄: Nnyịn iyodomo ndinọ esop kiet kiet ibat babru Room Request oro ekemde. Ewetn̄wed esop ekpenyene ndikụt nte ke ẹwet n̄kpọ nnennen nnennen ẹyọhọ babru Room Request kiet kiet oro ẹnọde edi. KÛWET sụk ibat mme asuanetop oro ẹyomde itieidụn̄, utọ nte “asuanetop 50,” ke mme ufan̄ oro ẹkpewetde enyịn̄ mbon ẹmi. Ẹnyene ndiwet kpukpru ntọt nte eyede ye nte ẹkemede ndikot. Mbọk kụt ete ke ọmọnọ ọyọhọ ntọt kaban̄a enyịn̄, isua emana, eren m̀mê n̄wan, ye m̀mê owo oro oyomde itieidụn̄ edi asiakusụn̄ m̀mê asuanetop esop. Sịn nditọwọn̄ ke udịm enyịn̄ emi. Ke ini edem ndusụk esop ẹkesiwet enyịn̄ ikpọ owo kpọt. Emi esinam ọsọn̄ utom ndinam ndutịm nnọ itieidụn̄ oro odotde. Edieke oyomde ufan̄ oro okponde akan se idude ke babru oro, da ikọn̄ babru efen wet. Edieke ewetde awak akan enyịn̄ owo kiet ke babru oro, mbọk wụt itie ebuana mbon oro ẹyomde itieidụn̄ ke nnennen ufan̄ oro ẹnịmde. Ewetn̄wed esop ekpenyene ndikụt nte ke ẹwet n̄kpọ ẹyọhọ babru Room Request nte enende mbemiso enye ọnọde aka Itieutom Unọ Ufọkidụn̄ mbono.
5 Isua kiet kiet, nnyịn imesiben̄e nditọete ndidiana kiet ye Itieutom Unọ Ufọkidụn̄ mbono. Ke nsụhọde n̄kaha ẹsiyọhọ n̄kpọ iba ke nditiene ndausụn̄ emi:
6 Nnyịn ifam okụk nditọete nnyịn iren ye iban: Ke ini nnyịn idianade kiet ye ndutịm N̄ka, okụk ubet osụhọde ọnọ nditọete nnyịn. Utu ke okụk nnyịn ndika mbịne mme enyene ebiet, ẹkeme ndida mmọ nnam n̄kpọ nte ọfọnde ndida n̄n̄wam mme ubon nditọete nnyịn iren ye iban ye utom ofụri ererimbot. Idem edieke nnyịn ke idem nnyịn ikemede ndibọ mme itieidụn̄ oro ẹsọn̄de urua, nnyịn ikpenyene ndinọ mme ukeme Itieutom Unọ Ufọkidụn̄ ibetedem. Ẹtịn̄ ẹban̄a edu edikere mban̄a mbon efen emi ke 1 John 3:17, onyụn̄ edi edumbet oro odude ke 1 Corinth 10:24.
7 Nnyịn iwụt nsụkibuot inọ ndausụn̄ N̄ka: N̄kpọ emi ekpenyene ndidi kiet ke otu n̄kpọ ẹmi ẹtịmde ẹbehe nnyịn. Mme Hebrew 13:17 ọdọhọ ete: “Ẹkop uyo mme andida mbufo usụn̄, ẹnyụn̄ ẹsụk ibuot ẹnọ mmọ; koro mmọ ẹkpemede ẹyom ufọn ukpọn̄ mbufo, nte mmọ ẹmi ẹnyenede ndinọ Abasi ibat; man mmọ ẹnam utom ke idara, ẹkûnam ke mfụhọ; koro emi mîdorike udori inọ mbufo.” Nte nditọete nnyịn ẹnamde ekese ndutịm kaban̄a mbono district nnyịn, nnyịn iyom ndinam mmọ ẹfiọk ke mmọ ẹnyene ọyọhọ ibetedem nnyịn. Sia ẹyomde edidianakiet nnyịn ke n̄kpọ emi ke usen iba m̀mê ita kpọt ke isua, emi edi eti usụn̄ ndinọ mme ukeme mmọ ibetedem. Idem edieke se nnyịn imekde ọkpọkpọ edide isio, eti uwụtn̄kpọ nnyịn, nte nditọete nnyịn ye ererimbot ẹkụtde, eyesịn udọn̄ ọnọ edu ima, edidianakiet, ye ibetedem.—Phil. 2:1-4.
8 San̄asan̄a Un̄wam: Ndutịm emi edi n̄kukụre kaban̄a mbon oro ẹyomde san̄asan̄a un̄wam ẹto mbon en̄wen ke ndinam ndutịm mmọ ẹmi ẹnyenede ebuana ye mbono, akpan akpan mme ndutịm itieidụn̄. Mmọ ẹkeme n̄ko ndiyom un̄wam ke mme usụn̄ efen, etienede san̄asan̄a idaha mmọ. Edi mme asuanetop ye mme asiakusụn̄ ẹmi ẹnịmde eti uwụtn̄kpọ kpọt, esịnede nditọ mmọ oro ẹdude eti uwem, ẹmi Kọmiti Utom Esop ọnọde unyịme ẹdot ndibọ un̄wam ke idak ndutịm San̄asan̄a Un̄wam. Ẹkpenyene ndinam mme ndutịm eken ndise mban̄a mbon oro ẹyomde san̄asan̄a un̄wam ke esop emi mmọ ẹsidụkde mme mbono esop, utu ke ndiyak mbiomo emi ndori ndutịm mbono ke idem. Mbiowo ye mbon en̄wen ẹmi ẹdiọn̄ọde ẹban̄a idaha owo oro ẹkeme ndinọ ima ima un̄wam. Emi esiwak ndiyom mme asuanetop ẹkere ẹban̄a udọn̄ mbon oro ẹdude ke utom uyọhọ ini, mbonusọn̄, mbon n̄kpọnnam, ye ndusụk mbon eken. Mme asuanetop ẹkeme ndinọ un̄wam ebe ke ndisan̄a ye mme utọ owo oro m̀mê ndise mban̄a se mmọ ẹyomde ke mme usụn̄ efen.—Jas. 2:15-17; 1 John 3:17, 18.
9 Nte ededi, Itieutom Unọ Ufọkidụn̄ oyodomo ndinọ mme asuanetop ẹyomde san̄asan̄a un̄wam ufọkidụn̄ oro ẹdotde edieke mbon oro ẹdude ke esop mîkemeke ndin̄wam mmọ. Mme asuanetop ẹmi ẹkeme ndineme idaha mmọ ye ewetn̄wed esop. Ewetn̄wed ekpenyene ndineme ye Kọmiti Utom Esop man ẹse m̀mê esop eyekeme ndin̄wam mme owo ẹmi ke ndise mban̄a itieidụn̄ mmọ. Edieke esop mîkemeke ndinọ un̄wam oro ẹyomde, ewetn̄wed ekeme ndinọ utọ mbon oro babru Room Request kiet emi enye emịn̄de in̄wan̄în̄wan̄ mme ikọ ẹmi, “SAN̄ASAN̄A UN̄WAM” ke enyọn̄ akpa page oro. Mbon oro ẹyomde san̄asan̄a un̄wam kpọt ẹkpenyene ndiwet n̄kpọ nyọhọ babru emi. Owo oro esịnde eben̄e emi enyene ndiwet n̄kpọ nyọhọ enye. Ẹkpenyene ndifiak nyak enye nnọ ewetn̄wed, emi edisede m̀mê ẹwet n̄kpọ ẹyọhọ, enen, onyụn̄ odụn̄ọde mme idaha oro ẹnamde owo oro odot ndidi se ẹnọde utọ un̄wam oro. Mme idaha oro ẹdi se ewetn̄wed enyenede NDINAM AN̄WAN̄A KE NDE KE NDE ke ufan̄ oro ẹnịmde ke edem babru emi. Ẹkpenyene ndibabak nnam kpukpru ẹmi mbemiso mbono. Ewetn̄wed ndien ọyọnọ babru emi ẹsọk Itieutom Unọ Ufọkidụn̄. Ẹyesian owo oro esịnde eben̄e emi nnennen ẹban̄a itieidụn̄.
10 Mbon oro ẹyomde san̄asan̄a un̄wam IKPENYENEKE ndika itie mbono nnyụn̄ n̄kesịn eben̄e ufọkidụn̄ ke ini mmọ ẹsịmde, koro Itieutom Unọ Ufọkidụn̄ ana enyene unyịme oto Kọmiti Utom Esop.
11 Ediwak owo ẹmewụt esịtekọm ẹban̄a mme ndutịm oro ẹnamde ẹnọ itieidụn̄ ke mme mbono. Ndi afo n̄ko omowụt esịtekọm aban̄a ediwak ndutịm oro ẹnamde ke ufọn fo? N̄ka enem esịt ndinọ mme itieidụn̄ oro enemde owo ke idem onyụn̄ ememde urua ke mme ini mbono, ayakde kpukpru nnyịn iwụk ntịn̄enyịn ke mme ufọn eke spirit ke mbono ye ndutịm.
12 Ndidụk Mbono Efen: Ẹdeme esop kiet kiet ẹsịn ke mbono oro ekperede akan. Ọkọn̄ọde ke ibat asuanetop oro ẹdemede ẹdọn̄ ke mbono kiet kiet, N̄ka esikere ibat mme andidụk man ẹnam ndutịm ẹnọ n̄kpọitie, ufọkidụn̄, mme n̄wed oro ẹkemde, ye ntre ntre eken. Nte ededi, edieke edide eti ntak anam afo oyom ndidụk mbono efen ọwọrọde ọkpọn̄ enye oro ẹdemede fi ẹsịn onyụn̄ oyomde itieidụn̄, ewetn̄wed esop ekeme ndinọ fi idem babru Room Request kiet. Afo emekeme ndiwet n̄kpọ nyọhọ onyụn̄ ọnọ ewetn̄wed esịn ubọk mbemiso ọnọde enye ẹsọk mbono oro amade ndidụk.
13 Usem Idiọn̄ọ Mbon Inan: Ẹyenam ndutịm man nditọete iren ye iban oro ẹdotde ẹkabade ofụri ndutịm ẹsịn ke Usem Idiọn̄ọ eke America ke mme mbono oro ẹtienede mi: Ota 2, November 5-7; Kaduna 3, November 19-21; Uli 7, December 10-12; ye Ubogo 9, December 17-19, 1999. Ẹsịn udọn̄ ẹnọ owo kiet kiet edide inan ke kpukpru esop ke Nigeria nditọn̄ọ ndinam ndutịm ndidụk ke nsụhọde n̄kaha kiet ke otu mbono ẹmi. Mbiowo ẹkpenyene nditịm ndụn̄ọde ye owo kiet kiet edide inan ke esop mmọ emi ọdiọn̄ọde Usem Idiọn̄ọ eke America man ẹtịm ẹkụt ẹte ke mmọ ẹdiọn̄ọ ẹban̄a ndutịm emi ẹnyụn̄ ẹbiere m̀mê mmọ ẹyom un̄wam ndomokiet man ẹkeme ndidụk.
14 Edi mme mbono ẹmi kpọt ẹdinyene san̄asan̄a ikpehe n̄kpọitie oro ẹnịmde ẹnọ mbon inan emi ẹdikabarede ndutịm inọ mmọ ke usem idiọn̄ọ. Owo idinamke ndutịm efen inọ edikabade usem idiọn̄ọ ke mme mbono efen ekededi. Edieke inan akade mbono efen ekededi emi anam-idiọn̄ọ odude, ẹnyịme owo kiet akabade ọnọ owo kiet emi etiede ye enye, idịghe ndidada ke iso owo kiet m̀mê ediwak owo.
15 Fam Okụk Nịm nọ Mbono Oro: Ke adianade ye mme ndutịm eken, IDAHAEMI edi ini nditọn̄ọ ndifam okụk nnịm nnọ mbono district oro. Ndusụk owo ẹdu oyom usụn̄ esisịt ọkpọn̄ obio mbono. N̄ko, ndusụk owo ẹnyene ikpọ ubon. Kaban̄a mmọ ẹmi ye kpukpru nnyịn, oyom okụk kaban̄a mme etịbe, ukpeusụn̄, udia ke ini mbono, mme n̄wed, esịnede mbufa nsiondi ekededi, ye mme n̄kpọ eken. Oyom mbon oro ẹnyenede ikpọ ubon ẹbem iso ẹnam ndutịm ndifam okụk oro ekemde nnịm man ofụri ubon ekeme ndidụk mbono. Eti edinam edi ndibat ofụri okụk emi ẹyomde nse. Owụt ifiọk ndinịm ufan̄ nnọ ekọmurua n̄kpọ ndidọk ke adan̄aemi anamde ibat fo. Bahade ibatokụk oro ekerede ye ofụri ibat ọfiọn̄ oro odude tọn̄ọ ke emi sịm usenọfiọn̄ mbono district mbufo. Emi edi ibatokụk oro oyomde afo afam enịm ke ọfiọn̄ kiet kiet. Ke ọfiọn̄ kiet kiet, sịn ofụri ukeme ndibem iso nsio okụk emi nnịm nte okụk mbono. Ẹkeme ndisịn emi ke ekpri ekebe m̀mê ke efọkn̄wed. Edi akpanikọ, ẹkeme ndibahade okụk emi ẹfamde ẹnịm ke ọfiọn̄ ke ọfiọn̄ mi ke itie inan̄ ẹnyụn̄ ẹsisio ẹnịm ke urua ke urua. Akpan n̄kpọ edi nte ke ukpunyeneke ndibet tutu osụhọ ọfiọn̄ kiet m̀mê iba ndisịm ini mbono mbemiso afo ọtọn̄ọ ndifam okụk uka isan̄ ofụri ini eke isua ke isua emi.—N̄ke 21:5.
16 Ẹnam Kpukpru N̄kpọ Ẹnọ Abasi Ubọn̄: Edi n̄kpọ nsịnudọn̄ ndikop itoro oro ẹnọde enyịn̄ Jehovah ke ntak eti edu nditọete nnyịn iren ye iban ke mme mbono. Kaban̄a eti edu mme andidụk ke mbono kiet, anam-ndụn̄ọde kiet ama ewet ete: “Mboho oro ama enem mi. Akananam n̄kwe ido ukpono ndomokiet oro etiede ntem. Okposụkedi mboho oro okponde ntre, bodisi idụhe, en̄wan idụhe, ndien itieutom ubon mme n̄kpọ ẹfiọhọde akam odu.” Anamutom ke itie kiet oro nditọete nnyịn ẹkedụn̄de ke ini mbono oro ama ọdọhọ ete: “Mme andidụk mbono mbufo ẹdi mme mfọnn̄kan owo oro inyenede mi.” Owo efen ọkọdọhọ ete: ‘Nnyịn imama ndinọ ikọt mbufo itieidụn̄. Kpukpru mmọ ẹwụt eti ido.’ Mme ikọ ẹmi ẹdi eti ikọ ntiense otode mme owo ẹdude ke an̄wa. Eti enyịn̄ oro nnyịn inyenede otoro Jehovah onyụn̄ anam enye okop inemesịt aban̄a nnyịn.—1 Thess. 4:12; 1 Pet. 2:12.
17 Nte ededi, nnyịn ima ibọ ndusụk ndiọi ntọt n̄ko ito ndusụk mbono iban̄a nditọwọn̄ ye ikpọ owo ẹyode ke ini ndutịm. Ndusụk ẹma ẹtie ke esịt moto ẹkop ikwọ. Ẹma ẹkụt ibat ibat owo ẹkpọn̄de Ufọk Mbono ke mme ini edinam ẹka mme ufọkisen ye itie un̄wọn̄ mmịn. Mbon en̄wen ẹma ẹka ndobo ndobo ebiet ẹkeneme nneme ẹnyụn̄ ẹbụk mbụk. Ndusụk owo ẹma ẹnyọn̄ọ ke ikpehe edinam usenubọk Sunday ama akasuana. Nnyịn iyomke mme utọ idaha oro ẹfiak ẹda itie ke mme mbono isua emi. Nnyịn imesịn udọn̄ inọ kpukpru owo ndinyene mfara ke idem. Ẹti mme ete ye eka n̄ko ndikpeme nditọ mmọ. Edieke afo mûdọhọ ndọ, mîdịghe omodu ke idaha ke usụn̄ ekededi ndin̄wam mbon oro ẹnyenede ediwak nditọ, mbọk nam ntre.—Gal. 6:2.
18 Kpukpru owo oro ẹdụkde mme mbono nnyịn ẹkpenyene ndifiọk ke mmimọ idu ke itie utuakibuot. Owo ndomokiet ikpenyeneke ndida edinam oro nnam mbubehe unyamurua. N̄wed Utom Nnyịn ọdọhọ, ke page 134, ikpehe ekikere 3, ete: “Nditiene ndinen idaha Abasi eyebiọn̄ọ nnyịn ndida ebuana ukara Abasi nnyịn nsuan etop mbubehe idem nnyịn m̀mê efen. Uduak ebuana nnyịn ye mbon efen ke mme mbonoesop Christian . . . ye ke ini idụkde mme mbono circuit ye ikpọ mbono edi akpan akpan kaban̄a utuakibuot Jehovah, ndidia n̄kpọ ke okpokoro eke spirit esie nnyụn̄ ndara nsịnudọn̄ edem mbiba. (Rome 1:11, 12; Heb. 10:24, 25)” Ntre akwan̄a ndibịn mbubịne ke ebuana eke ukara Abasi ebe ke ndinyam m̀mê ndinam mme utom ọnọde ufọn okụk ke mme mbono. Emi abuana edisio mme ndise n̄ko. Owo ndomokiet ikpenyeneke ndisuan etop mban̄a mbubehe usio ndise esie ke mbono (utọ nte ke ndisịne kad idiọn̄ọ mbubehe usio ndise esie) m̀mê ndisịn eben̄e nyom utọ mbubehe oro.
19 Nnyịn imesịn udọn̄ inọ mbufo ndinam mme ndutịm mbufo idahaemi man ẹdụk ofụri usen ita oro ke Mbono District “Ntịn̄nnịm Ikọ Abasi” eke 1999. Nnyịn ye mbufo isak iso ise ndikop “n̄kpo idara ye ekọm” mbon oro ẹtuakde ibuot ẹnọ Abasi nte akwa otu oro ẹdianade kiet. (Ps. 42:4) Jehovah akpakam ọdiọn̄ kpukpru ndutịm oro ẹnamde kaban̄a n̄kaiso udori eke spirit nnyịn!
[Ntọt Ẹnọde Otu Mbiowo: Ke ẹbọde esịne-esịt emi, mbọk ẹtọt ebiet ye mme usenọfiọn̄ ẹmi N̄ka edemede esop mbufo esịn ke Esoputom efen ye ke Ukpepn̄kpọ Enyọn̄-Ukpeme oro etienede. Ọkpọfọn ndidụri udịm ke obio mbono ye mme usenọfiọn̄ oro ẹdemede esop mbufo ẹsịn nnyụn̄ ndian ikpehe esịne-esịt emi ke obukpọk ntọt.
Ewetn̄wed esop ekpenyene ndise mban̄a n̄kpọ ẹban̄ade mme mbono ye mme ntọt mbono ke mme mbono esop ini iso. Kpukpru mbiowo ẹnyene ndidiana kiet ọyọhọ ọyọhọ man ẹkụt ẹte ke ẹse ẹban̄a mme n̄kpọ ẹban̄ade mbono usọp usọp, ke usụn̄ emi esịnede ufiop, ifịk ifịk, ye nte ọfọnde.]
[Ekebe ke page 3]
Mme Ini Ndutịm
Friday: 9:20 a.m. - 4:50 p.m.
Saturday: 9:00 a.m. - 4:30 p.m.
Sunday: 9:00 a.m. - 3:20 p.m.