Kwọrọ Eti Mbụk ye Ọkpọsọn̄ Udọn̄

¹ “[Ọdọn̄] mi eti-eti ndikụt mbufo . . . Mmeben̄e idem ndikwọrọ gospel nnọ mbufo nde.” Emi edi nte apostle Paul eketịn̄de ke ntọn̄ọ ntọn̄ọ leta emi enye ekewetde ọnọ ẹsọk nditọete ke Rome. Ntak emi Paul ekenyenede ọkpọsọn̄ udọn̄ ndika n̄kese mmọ? Enye ọkọdọhọ ete: “Man n̄kpenyene usụk mfri ke otu mbufo n̄ko . . . Koro bụt inamke mi ye gospel; koro enye edide odudu Abasi, emi ọwọrọde edinyan̄a.”—Rome 1:11-16.

² Paul ama owụt ukem ọkpọsọn̄ udọn̄ emi ke ini eketịn̄de ikọ ọnọ nyobiowo ke Ephesus. Enye ama eti mmọ ete: “Tọn̄ọ ke usen emi ndide ke Asia . . . , n̄kefeheke . . . [ndikpep] mbufo n̄kpọ an̄wa-an̄wa, nnyụn̄ n̄kpep mbufo ke ufọk ke ufọk, n̄kwọrọ nnọ mme Jew ye mme Greek.” (Utom 20:18-21) Ke ofụri efakutom emi ẹkebaharede ẹnọ enye, Paul ama enyene udọn̄ ke ndisuan eti mbụk edinyan̄a ye ndinyene mbun̄wụm Obio Ubọn̄. Nso eti edu ke emi edi ntem ndikpebe!

³ Nnyịn imekeme ndibụp idem nnyịn ite: ‘Nte ami mmowụt ukem ọkpọsọn̄ udọn̄ oro ke nditan̄a eti mbụk ke n̄kann̄kụk mi? Utu ke ndise utom ukwọrọikọ nte sụk se anade ẹnam, ndi ami mmenyene ọkpọsọn̄ udọn̄ ndibuana eti mbụk ye adan̄a ediwak owo nte n̄kekeme? Ndi ami mmekere mban̄a mme ọkpọkpọ idaha mi ke akam? Nte ami mmodụn̄ọde kpukpru ifet oro ẹdude ke efakutom nnyịn, utọ nte edikwọrọ ikọ to ke enyịnusụn̄ sịm enyịnusụn̄, ke efak, ke mme ikpehe mbubehe, ke urụk ukopikọ, ye ke ido nneme?’

⁴ Buana ye Ọkpọsọn̄ Udọn̄ ke April: Ọfiọn̄ April edi eti ini ndidọdiọn̄ nsịn ukeme ke ọkpọkpọ ebuana nnyịn ke utom ukwọrọikọ. Usụhọde ke ibat hour oro ẹyomde ekpenyene ndinam ediwak owo efen efen ẹkeme ndinam usiakusụn̄ unọ un̄wam. Iso-ọfọn mme idaha fo ẹyeyak fi anam utom nte asiakusụn̄ unọ un̄wam ke April ye May. Mîdịghe afo emekeme ndisịn enyịn̄ nte asiakusụn̄ ofụri ini, ke ekerede aban̄a ukpụhọde ke ibat hour oro ẹyomde. Edieke afo edide asuanetop esop, nte afo emekeme ndibiat ini efen efen ke an̄wautom n̄kan nte esibiatde ke ọfiọn̄ emi ye ọfiọn̄ oro etienede, ọnọde mbon oro ẹkemede ndisiak usụn̄ ibetedem? Oro ekpenem Jehovah esịt!

⁵ Ukem nte Paul, mme asuanetop Obio Ubọn̄ ẹkpenyene ndika iso n̄wụt ọkpọsọn̄ udọn̄ ebe ke ndinam n̄kpọ efen efen ke utom ukwọrọikọ. Ndinam ofụri se nnyịn ikemede ke utom ukwọrọikọ ayada ata idatesịt ọsọk nnyịn. Paul ama enyene idatesịt emi ke edisana utom esie. Nnyịn iyanam ọfọn ndikpebe ata eti uwụtn̄kpọ esie.—Rome 11:13; 1 Cor. 4:16.