Ndi Afo Emenyene Ibat Oro Esibọde Kpukpru Ini?

¹ Ndi akanam amaka mbono an̄wautom onyụn̄ okụt ete ke afo unyeneke magazine ndomokiet ke ekpat ukwọrọikọ fo? Ọfọn, ti esịne-esịt Utom Obio Ubọn̄ Nnyịn eke March 1996 ke ibuotikọ ọdọhọde “Da Mme Magazine Nnyịn Nam N̄kpọ ke Mfọnn̄kan Usụn̄.” Enye ama ọdọhọ nnyịn “[inyene] akpan ibat magazine oro [isibọde],” ọdọhọde ete: “Nyene iwụk ke akpan ibat nsiondi kiet kiet oro oyomde eyenete oro akamade magazine esinọ fi. Ke ndinam ntem, afo ye ubon fo ẹyenyene mme magazine oro ẹkemde kpukpru ini.” Ndi afo ama anam emi?

² Ntak mûnyeneke ibat magazine oro esibọde kpukpru ini? Eyetịm obiomo fi ndisuan mme magazine ke urua ke urua, afo oyonyụn̄ enyene akamba idatesịt ke ndinam ntre. Edieke edide afo emenyenyene ibat oro esibọde kpukpru ini, fiak dụn̄ọde m̀mê afo ke ọbọ ibat magazine oro oyomde ke ọfiọn̄ ke ẹbahade ukem ukem ke utom ukwọrọikọ. Nte ededi, nnyịn iyom ndinam akpanikọ ke ndibọ editobo nnyịn kpukpru urua ndien ikpenyene ndida ke obiomo nnyịn ndinam ntre. Edieke afo mûdudụhe ke esop ke anyan ini, nam asan̄autom akamade magazine ọdiọn̄ọ m̀mê afo omoyom enye ọnọ owo efen magazine fo tutu afo ọnyọn̄ edi.

³ Kpa esịne-esịt oro ẹkotde ẹto ke enyọn̄ emi ama etịn̄ ete ke nnyịn ikpenyene “[ndinam] ndutịm [nnọ] usen magazine ofụri ini.” Ndi afo emekeme ndinọ Usen Magazine eke urua ke urua ibetedem? Nte ẹwụtde ke 1999 Calendar of Jehovah’s Witnesses, emi edi ke kpukpru Saturday ke isua! Kûda ufọn edisuan magazine Enyọn̄-Ukpeme ye Awake! ke ekpri n̄kpọ. Ke ini nnyịn isịnde ukeme ndibuana ọyọhọ ọyọhọ ke utom magazine, nnyịn “[ibụk] eti n̄kpọ” inọ mme mbọhọidụn̄ nnyịn.—Isa. 52:7.