Mme Usụn̄ Nditat Utom Ukwọrọikọ Fo
1 Ke se ibede isua 40 ko ke edem, ibuotikọ kiet ọkọdọhọde “Nte Afo ke Anam Ukeme Fo?” ama odu ke Enyọn̄-Ukpeme (Ikọmbakara), January 15, 1955. Enye ama owụt ke ima ima usụn̄ nte ikọt Jehovah ẹkpekemede ndinam n̄kọri ke ọkpọkpọ ukeme mmọ ke utom ukwọrọikọ man mmọ ẹkpefori utom Obio Ubọn̄ mmọ. Eti item oro enyene ebuana mfịn n̄ko, nte nnyịn ikade iso ndinam ofụri ukeme nnyịn etetịm ọfọn akan.
2 N̄kponn̄kan ewụhọ emi ekpenyene ndidemede ofụri utom nnyịn: “Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.” (Mark 12:30) Nnyịn iwụt ọyọhọ ima oro imade Jehovah ebe ke ndida mme ifet oro ẹdude nnam n̄kpọ ọyọhọ ọyọhọ nditat utom Obio Ubọn̄ esie. Kere ban̄a mme usụn̄ ẹtienede mi oro afo ekemede nditat utom ukwọrọikọ fo.
3 Biom Mbiomo Fo: Nditọete iren oro ẹma ẹkeyak idem ẹnọ ẹkeme ndidomo ndidot nte mme asan̄autom unamutom ndien ekem ẹkọri ẹsịm ndinam utom nte mbiowo. Ibuotikọ oro “Nte Afo ke Anyanade Ebịne?” ye “Nte Afo Omodot Ndinam Utom?,” ke nsiondi Enyọn̄-Ukpeme eke September 1, 1990, ẹma ẹdemede ediwak nditọete ndinọ idemmọ ndibiom mme mbiomo esop. Dọhọ mbiowo n̄kann̄kụk mbufo ẹnọ fi mme akpan ekikere ke nte ekemede ndinyanade mbịne nnyụn̄ ndot.
4 Ẹnọ mbiowo ye mme asan̄autom unamutom oro mîdọhọ ndọ ikot ndinen̄ede n̄kere mban̄a edisịn n̄wed eben̄e Ufọkn̄wed Unọ Mme Asan̄autom Ukpep. Afo emekeme ndimehe ye ufọkn̄wed emi ebe ke ndikot mme n̄wed ẹsiakde ke idak “Ministerial Training School” ke Watch Tower Publications Index eke 1986-1995, 1996, ye 1997. Nte afo omokụt ‘akwa usụn̄ ndinam utom’ oro ebererede ọnọ fi? (1 Cor. 16:9a) Ediwak nditọete oro ẹkedụkde usụn̄ oro ikedehede ida ikụt kpukpru ifetutom oro ẹdude ke ẹkụrede ukpep. Mfịn mmọ ẹkop idatesịt ndinam utom ke Bethel m̀mê ke an̄wautom nte mme akpan asiakusụn̄, mme isụn̄utom, m̀mê mme esenyịn circuit.
5 Nyanade Bịne Utom Uyọhọ Ini: Mme uyen ẹmi ẹkụrede ukpep ke akamba ufọkn̄wed, iban ufọk ndọ, ye owo ekededi emi esịmde isua ukpọn̄ utom ẹkpenyene ndinen̄ede n̄kere mban̄a usiakusụn̄. Idem nditọete oro ẹnamde mbubehe ye mbon oro ẹnamde utom ukara ẹmekeme ndinam usiakusụn̄ ofụri ini, akpan akpan idahaemi ẹsụhọrede ibat hour oro ẹyomde. Fiak dụn̄ọde esịne-esịt Utom Obio Ubọn̄ Nnyịn eke July 1998, ekem nyene nneme ye mme asiakusụn̄ oro mme idaha mmọ ke uwem ẹkebietde okwommọ. Ekeme ndidi oyonụk fi nditat utom ukwọrọikọ fo ebe ke ndisiak usụn̄, nte mmọ ẹnamde. (1 Cor. 11:1) Nso ke edida man afo atat utom fo esịm hour 70 ke ọfiọn̄ ndien ke ntem anamde utom nte asiakusụn̄ ofụri ini?
6 Se iwakde ibe nditọete iren ye iban 17,000 ẹnam utom idahaemi ke mme n̄kọk itieutom ye mme ufọkidụn̄ Bethel ke ofụri ererimbot. Page 116-118 ke Ẹtịm Man Inam Utom Nnyịn Ima eneme se oyomde man ẹsịn eben̄e utọ utom oro. Ntak mûkotke enye man ese m̀mê afo edi owo emi ekemede ndidot kaban̄a n̄wọrọnda ifet eke utom Bethel emi?
7 Nam Utom ke Ebiet Emi Udọn̄ Okponde Akan: Nte afo odụn̄ ke ebiet emi ẹsinamde utom ke efakutom ndien ndien m̀mê emi ediwak nditọete ẹdude ndibiom mbiomo? Nte afo emekere aban̄a nditat utom ukwọrọikọ fo ebe ke ndiwọrọ n̄ka ebiet emi udọn̄ okponde akan? Eyedi afo emekeme ndiwọrọ n̄ka n̄kpet n̄kpet obio-in̄wan̄ emi oyomde mme anamutom efen efen. (Matt. 9:37, 38) Owo ikpanamke emi ke ibụmede. Oyom ẹkere ẹban̄a ke akam. (Luke 14:28-30) Neme idaha fo ye mbiowo ye esenyịn circuit. Mmọ ẹyekọk ibuot ye afo m̀mê owụt eti ibuot ndiwọrọ idahaemi m̀mê nditịm idem man anam ntre ke ini iso. Edieke afo oyomde ndiwet N̄ka nyom ekikere kaban̄a ebiet emi ọkpọwọrọde aka, ana leta emi Kọmiti Utom Esop mbufo ewetde asan̄a ye leta fo.
8 Fori Uduot Utom Fo: Eyedi kpukpru nnyịn imekeme ndibuana ata ọyọhọ ọyọhọ ke utom ukwọrọikọ ebe ke ndifori uduot utom an̄wautom nnyịn. Nte afo amabuana ke kpukpru ikpehe utom emi, esịnede utom unọ ikọ ntiense eke ufọk ke ufọk ye eke ido nneme ọkọrọ ye mfiakn̄ka ye ukpepn̄kpọ Bible? Edieke afo enịmde ukpepn̄kpọ, nte afo emekeme ndifori usọ unọ ukpep fo? Ọyọfọn ndifiak ndụn̄ọde esịne-esịt Utom Obio Ubọn̄ Nnyịn eke June 1996 kaban̄a mme ekikere oro afo ekemede ndida ndemede nditọ ukpepn̄kpọ fo kaban̄a uyakidem nnọ ye baptism.
9 Ata ntatara nneme kaban̄a mme usụn̄ nditat nnyụn̄ mfori utom ukwọrọikọ nnyịn odu ke ibuot 9 ke Ẹtịm Man Inam Utom Nnyịn Ima. Ke akpanikọ akpana kpukpru nnyịn inyene udọn̄ ndinam ekese nte ikekeme ke utom Abasi. Ntak mûnen̄ekede ukere uban̄a mme utịtmbuba fo eke spirit? Nam nte 1 Timothy 4:15 etemede: “Tịn̄ enyịn nam mme n̄kpọ ẹmi; sịn idem ke esịt ofụri-ofụri; man kpukpru owo ẹkụt n̄kọri fo ke eti ido.”