Nte Afo Esikụt Nte Owo Etiede ke Enyọn̄ Enyọn̄ Idem Kpọt?
1 Nte nnyịn inamde an̄wan̄wa utom ukwọrọikọ nnyịn, akpa ekikere oro nnyịn inyenede iban̄a ndusụk owo ekeme ndinam nnyịn imen̄e ndibuana eti mbụk ye mmọ. Ke uwụtn̄kpọ, didie ke afo akpanam n̄kpọ edieke enyene-ndịk eren kiet kpukpru ini esisede fi eyịghe eyịghe ke ini afo awahade ebịne mbọhọ esie oro okowụtde udọn̄ ke akpanikọ? Asiakusụn̄ eyenete an̄wan kiet oro okosobode emi ama ebiere ndika mbịne eren oro nnyụn̄ n̄ketịn̄ ikọ ye enye. Eren oro ọkọkọm enye nsọn̄ido nsọn̄ido. Edi, ke n̄kpaidem, enye ama akpan̄ utọn̄ ke etop Bible ndien ye ndusụk nduaidem ama enyịme ndikpep n̄kpọ. Nte utịp eyenete an̄wan oro nditre ndida nte owo etiede ke enyọn̄ enyọn̄ idem mbiere, usụn̄ ama eberede ọnọ eren emi ye n̄wan esie ndikpep akpanikọ.
2 Eyenete an̄wan efen ama okop ndịk ke ntọn̄ọ ntọn̄ọ aban̄a nte akparawa kiet emi ekenyenede nnyan idet eketiede ke enyọn̄ enyọn̄ idem, edi enye ama ọkọbọ ke ndinọ akparawa oro ibio ibio ikọ ntiense ini ekededi enye edide ufọkurua oro eyenete an̄wan emi akanamde utom. Mme ukeme esie ẹma ẹn̄wụm mfri, ndien akparawa oro idahaemi edi Ntiense oro ama akana baptism. Nso idikpan nnyịn ndisọsọp mbiere nte ke mme utọ owo oro idikpan̄ke utọn̄?
3 Ndikpebe Uwụtn̄kpọ Jesus: Jesus ama ọdiọn̄ọ ke imọ idinọ uwem imọ kaban̄a kpukpru owo. Ntem, nte mbon efen ẹketiede ke enyọn̄ enyọn̄ idem ikedịghe n̄kpọ ubiọn̄ọ inọ enye. Enye ama ọdiọn̄ọ ete ke idem mbon oro ẹwọrọde idiọk etop ẹkeme ndinyịme ndikpụhọde edieke ẹnọde nnennen un̄wam ye nsịnudọn̄. (Matt. 9:9-13) Enye ama odomo ndin̄wam imọ ye ubuene ukem ukem. (Matt. 11:5; Mark 10:17-22) Akpakam nnyịn idaha nte mme owo oro nnyịn isobode ke an̄wautom ẹtiede ke enyọn̄ enyọn̄ idem ibiere ikpe inọ mmọ, itrede ndikụt se ikemede ndidi eti idaha esịt. (Matt. 7:1; John 7:24) Nso ikeme ndin̄wam nnyịn ndikpebe n̄wọrọnda uwụtn̄kpọ Jesus?
4 Ebede ke ukpepn̄kpọ Bible nnyịn, nnyịn imedi ididiọn̄ọ ite ke Ikọ Abasi enyene odudu ndikpụhọde ekikere, edu uwem, ye ido owo. (Eph. 4:22-24; Heb. 4:12) Ke ntre, nnyịn ikpenyene ndinyene in̄wan̄în̄wan̄ edu inyụn̄ iyak se isụhọde isịn ke ubọk Jehovah, kpa Enye emi okotde esịt owo.—1 Sam. 16:7; Utom 10:34, 35.
5 Edibuana oro nnyịn ibuanade eti mbụk ye kpukpru orụk owo ye unana asari, inamke n̄kpọ m̀mê mmọ ẹtie didie ke enyọn̄ enyọn̄ idem, akpakam etịp n̄kpọ esịn ke akwa utom idọk ke ukperedem ini ẹmi.—1 Tim. 2:3, 4.