Nte Afo Ọmọn̄ Ọwọrọ Idụn̄?

Ke ini ọbọrọde ih ke mbụme oro, ediwak n̄kpọ ẹdu oro oyomde afo ye mbon efen ẹnam usioukot ndinam. Ebede ke nditiene mme akpan usio-ukot ẹwụtde ke isọn̄ emi, afo ọyọsọp edi ubak obufa esop fo.

(1) Ndondo oro afo ọdiọn̄ọde ebiet emi akade, ewetn̄wed esop oro afo odude idahaemi ekeme ndibọ adres Ufọkmbono Obio Ubọn̄ eke obufa esop fo. Ke esịmde ebiet oro, yom ufọkmbono kụt inikiet inikiet nyụn̄ bụp ban̄a mme ini mbono esop. Edieke se iwakde ibe esop kiet ẹdade Ufọkmbono Obio Ubọn̄ oro ẹnam n̄kpọ, dọhọ mbiowo ẹsian fi esop enyenede efakutom emi afo odụn̄de. Kûnam ubịghi ke ndidụk mme mbono esop ye ke ndimehe ye mbiowo n̄kann̄kụk.

(2) Ewetn̄wed esop oro odude idahaemi ye eke obufa esop fo ẹyediana kiet ke ndinọ mme kad Ibatutom Asuanetop Esop fo ye eke ubon fo ẹwọrọ. Ẹyenọ leta edimen n̄wụt n̄ko ẹsọk mbiowo obufa esop fo. (Se Ekebe Mbụme ke Utom Obio Ubọn̄ Nnyịn eke March 1991.) Kọmiti Utom Esop do ekpenyene nditọt nnennen ada Ukpepn̄kpọ N̄wed Esop mban̄a edidi fo man enye ekeme ndisobo ye afo onyụn̄ an̄wam fi ọdiọn̄ọ obufa otu ukpepn̄kpọ n̄wed esop fo.—Rome 15:7.

(3) Kpukpru mme asuanetop ke obufa esop fo ẹnyene idara idara n̄kpọ ndinam—eke edimehe ye afo nnyụn̄ ndara fi. (Men 3 John 8 domo.) Nte ededi, emi ọwọrọ nte ke ana afo esidụk mme mbono esop man afo ekeme ndidara ebuana nditọete oro akamade nsịnudọn̄ onyụn̄ ọbọpde-bọp.

(4) Afo ukpenyeneke ndibet tutu kpukpru utom oro abuanade ke afo ndiwọrọ idụn̄ ẹkụre mbemiso abuanade ye obufa esop fo ke an̄wautom. Nte afo enịmde mme ufọn n̄kpọ Obio Ubọn̄ akpa, ẹyese ẹban̄a mme n̄kpọ eken, ndien afo oyokop inem ke obufa n̄kann̄kụk fo. (Matt. 6:33) Ke ini afo osụhọrede etie ke obufa ebietidụn̄ fo, eyedi afo ayama ndinọ ndusụk owo ke esop ikot ẹdi esen onyụn̄ etịm emehe ye mmọ.—Rome 12:13b.

Ndiwọrọ idụn̄ edi akamba utom. Nte ededi, ke ini kpukpru owo ẹmi ẹbuanade ẹnamde se ẹtorode, owo idifiakke edem ke n̄kan̄ eke spirit. Ima ima itie nditọete Christian nnyịn oyotụk kpukpru owo nte ọfọnde.