Ndikpep Prọfesi Daniel
1 Ọtọn̄ọde ke urua April 17, nnyịn idikpep Nọ Ntịn̄enyịn ke Prọfesi Daniel! ke Ukpepn̄kpọ N̄wed Esop. Ediwak owo ẹkokot aduai-owo-idem n̄wed emi, edi idahaemi nnyịn imenyene ifet ndibọ mme ufọn eke edineme n̄wed emi ke otu. Ẹkot, ih, ẹsịn udọn̄ ẹnọ kpukpru mme asuanetop, mbon oro ẹnyenede udọn̄, ye nditọwọn̄, ndidu kpukpru urua ke ntotụn̄ọ edikpep n̄wed Daniel eke Bible.—Deut. 31:12, 13.
2 Ndutịm Ukpepn̄kpọ ye Mme Item: Ẹnọ ọyọhọ ndutịm ukpepn̄kpọ n̄wed Prọfesi Daniel ke nsiondi Utom Obio Ubọn̄ Nnyịn emi. Kụt ete ke imesịn idem kiet ke n̄wed ukpepn̄kpọ fo. Ndutịm oro owụt ibuot ye mme ikpehe ekikere ke n̄wed emi ọkọrọ ye mme ufan̄ikọ ke Daniel oro ẹdinemede ke urua kiet kiet. Ikọ idakisọn̄ anam an̄wan̄a ini ye nte ẹdinemede ndusụk n̄kpọ ke n̄wed emi. Ke utịt ukpepn̄kpọ urua kiet kiet, ẹsịn udọn̄ ẹnọ ada ukpepn̄kpọ ndidụn̄ọde mme akpan ufan̄ikọ ke Daniel ẹmi ẹsịnde ke ndutịm eke urua oro ye otu esie. Nte ini ayakde, ẹkeme ndikot nnyụn̄ ntịn̄ n̄kpọ mban̄a mme ufan̄ikọ oro. Ndusụk ufan̄ikọ ẹyeto urua kiet ẹbe ẹdụk efen ke ntak n̄kaiso edineme mban̄a ebuana oro mmọ ẹnyenede.
3 Tịm Idem nọ Ọyọhọ Ọyọhọ Ukpepn̄kpọ: Ẹsịn ukeme ndinọ ini oro ekemde ke urua kiet kiet man ẹkûneme itie oro anade ẹkpep itọk itọk. Ukpepn̄kpọ inan̄ ẹmụhọ ẹkem. Ntem, ke utịt ukpepn̄kpọ urua June 5, ada ukpepn̄kpọ ekeme ndisịn ndụn̄ọde Daniel 2:1-40. Ke urua June 26, enye ekeme ndifiak ndụn̄ọde Daniel 3:1-30. Urua September 4, ekpenyene ndisịne ọyọhọ ọyọhọ edineme mme ndise ye mme itien̄wed ẹdude ke page 139. Ẹkpenyene ndineme chart odude ke page 188 ye 189 ke ukpepn̄kpọ urua October 2.
4 Tịm idem mfọn mfọn nọ ukpepn̄kpọ urua kiet kiet, nyụn̄ dara nditiene mbuana ke enye. Wụt esịtekọm ban̄a ifet oro afo enyenede ndibuana ye esop Jehovah oro ẹkụtde ke enyịn nnyụn̄ mbọ ufọn nto ikike ye ifiọk oro mme anam-akpanikọ oro ẹyetde aran ẹnọde. (Dan. 12:3, 4) Sịn udọn̄ nọ mbon en̄wen ke mfọnido ndidụk ukpepn̄kpọ n̄wed emi kpukpru ini. Kpukpru nnyịn ikpakam inọ ntịn̄enyịn ke ntịn̄nnịm ikọ Abasi, nte ẹyararede ke edemede-owo-udọn̄ n̄wed Daniel.—Heb. 10:23-25; 2 Pet. 1:19.