Nte Afo Emenyene Edu N̄waidem?
1 Esịtekọm ke se Jesus Christ akanamde ọnọ ubonowo ye unana ibụk ekpenyene ndinụk kpukpru nnyịn ndida ukeme ye odudu nnyịn nnam n̄kpọ ye edu n̄waidem. N̄wed Abasi akpak ete: “Ẹda ikpọkidem mbufo ẹnọ Abasi nte odu-uwem uwa, emi asanade, emi onyụn̄ enemde Abasi ndibọ.” (Rome 12:1) Ndinam ndụn̄ọde idemowo ke ini ke ini ayan̄wam fi ndikụt m̀mê afo ke owụt orụk edu oro ọyọhọ ọyọhọ nte mme ọkpọkpọ idaha fo ẹyakde.
2 Ke Edibịne Ifiọk Bible: Nte afo omosio ini enịm ọnọ ọkpọkpọ edikot ye edikpep Bible kpukpru ini? Nte afo ọmọsọn̄ọ eyịre ke ndutịm oro? Nte edi ido fo nditịm idem mfọn mfọn nnọ mme mbono esop? Edieke afo edide ibuot ufọk, nte afo emenyene ukpepn̄kpọ Bible ofụri ini ye ikọtufọk fo? Ndinam mme n̄kpọ ẹmi ekeme ndiyom afo awa ini emi esibiatde ndise ekebe ndise m̀mê ke kọmputa m̀mê mbubehe en̄wen. Nte ededi, nso ekpri uwa ke emi edi ntem, ke ọdiọn̄ọde ete ke ini oro abiatde ndikpep Ikọ Abasi ayan̄wam ndida fi n̄kesịm nsinsi uwem!—John 17:3.
3 Ke Ndinọ Nditọ Fo Ukpep: Mfọnn̄kan ini nditọn̄ọ ukpep n̄waidem edi ke ini uyen. Kpep nditọ fo nte ke adan̄aemi ini mbre odude, ana n̄ko ini utom ye mme edinam ukara Abasi ẹdu. (Eph. 6:4) Nọ mmọ ndusụk utom ẹmi ẹnyenede ufọn ke ufọk ẹnam. Tọn̄ọ ndutịm ofụri ini ndinyene ebuana ke utom ukwọrọikọ ye mmọ. Sịn odudu ke item fo ebe ke eti uwụtn̄kpọ fo.
4 Ke Mme Edinam Esop: Esop esinyene uforo ke ini kpukpru owo oro ẹdude ke esịt ẹnamde n̄waidem ke unyịmesịt ndinam mme n̄kpọ ke ufọn kpukpru owo. (Heb. 13:16) Nte afo emekeme ndibiat ekese ini efen ke utom edikwọrọ Obio Ubọn̄ ye edinam mbet? Nte afo emekeme ndinọ idem unyịme unyịme ndin̄wam mbon udọn̄ọ m̀mê mbonusọn̄, ndusụk an̄wamde ndida mmọ n̄ka mme mbono esop?
5 Mbemiso akawade uwem esie eke owo ke akakan uwa, Jesus ama ọnọ mme mbet esie item ete ẹwụk ekikere mmọ ke mme ufọn n̄kpọ Obio Ubọn̄, ẹnamde kpukpru n̄kpọ eken ke uwem ẹda udiana itie. (Matt. 6:33) Ndinyene utọ edu n̄waidem oro ayada akamba inemesịt ọsọk nnyịn nte nnyịn ikade iso ndinam n̄kpọ Jehovah ye inemesịt.