Nte Afo Edi Anditan̄a Obio Ubọn̄ Ofụri Ini?
1 Kpukpru nnyịn ima idat esịt ndikop nte ke Nigeria ama esịm n̄wakn̄kan ibat mme asuanetop oro akanam ẹsịmde edide 226,539 ke September 1999. Ke akpanikọ emi okoto edidianakiet ye ọkpọsọn̄ ukeme! Nte an̄wan̄ade, ke mme ọfiọn̄ oro ẹketienede, ndusụk ke otu mme asuanetop ẹmi ikekemeke ndidi mme anditan̄a Obio Ubọn̄ ofụri ini, koro ibat eke ọfiọn̄ ke ọfiọn̄ ke ẹbaharede ukem ukem tọn̄ọde ke ini oro edi n̄kpọ nte 220,497. Emi owụt nte ke asuanetop 1 ke otu owo 36 itọtke ebuana oro mmọ ẹkenyenede ke utom ukwọrọikọ kpukpru ọfiọn̄. Nnyịn imenịm ite ke nsịnudọn̄ oro etienede mi ekeme ndin̄wam ndikọk mfịna oro.
2 Wụt Esịtekọm Ban̄a Ifet Oro: Nnyịn ikpenyene ndiwụt ntotụn̄ọ esịtekọm mban̄a ifet oro nnyịn inyenede ndibuana eti mbụk Obio Ubọn̄ ye mbon en̄wen. Utom emi adat Jehovah esịt onyụn̄ an̄wam mbon esịt akpanikọ ndikpep usụn̄ adade esịm uwem. (N̄ke 27:11; 1 Tim. 4:16) Ndinọ ikọ ntiense kpukpru ini anam ifiọkutom nnyịn ke an̄wautom ọkọri onyụn̄ osụn̄ọ ke idatesịt ye uyụhọ.
3 Nọ Ibatutom: Ndusụk mbon ẹmi ẹbuanade ke utom an̄wautom ẹsikpu nditọt utom mmọ ke ini. Nnyịn ikpedehede ikere nte ke ukeme nnyịn ikokponke ikem se itọtde. (Men Mark 12:41-44 domo.) Ke usụn̄ ekededi, nnyịn ikpenyene nditọt se ikanamde! Ndinyene usụn̄ ediwet ini emi ibiatde ke utom ukwọrọikọ, utọ nte ediwet ke n̄wed usenọfiọn̄ ke ufọk, eyetie nte n̄kpọ editi kpukpru ini nditọt ibatutom oro enende ke utịt ọfiọn̄ kiet kiet ye unana ubiatini.
4 Nọ Un̄wam Oro Oyomde: Ekeme ndiyom ẹnam n̄kọri ke ndutịm oro ẹnamde ke n̄kann̄kụk ndin̄wam mbon oro ẹyomde un̄wam ndibuana kpukpru ini ke utom ukwọrọikọ. Ewetn̄wed esop ye mme ada ukpepn̄kpọ n̄wed ẹkpenyene ndidiomi mme asuanetop ẹmi ẹnyenede mbufiọk ndinọ un̄wam. Edieke afo enyenede nditọ m̀mê nditọ ukpepn̄kpọ Bible eken oro ẹdide mme asuanetop oro mînaha baptism, kpep mmọ nditọt utom mmọ kpukpru ọfiọn̄.
5 Ti mbụk eyouwem oro, “Mmowụt Esịtekọm ke Anyan Uwem ke Utom Jehovah,” ke Enyọn̄-Ukpeme eke October 1, 1997. Sista Ottilie Mydland emi otode Norway akakabade edi asuanetop eti mbụk ofụri ini mbemiso enye anade baptism ke 1921. Isua 76 ke ukperedem, ke edide isua 99, enye ọkọdọhọ ete: “Mmokop inemesịt nte ke ami ke nsụk n̄keme ndidi asuanetop ofụri ini.” Nso utịbe utịbe edu ke emi edi ntem ọnọ kpukpru asan̄autom Jehovah ndikpebe!