“Ẹkpeme”
1 Ke ama eketịn̄ aban̄a mme akpan n̄kpọntịbe oro ẹdidade ẹdiọn̄ọ ukperedem ini eke editịm n̄kpọ emi, Jesus ama akpak mbet esie ete “ẹkpeme.” (Mark 13:33) Ntak emi anade mme Christian ẹkpeme? Koro nnyịn idude uwem ke ini oro enyenede ndịk akan ke mbụk owo. Nnyịn ikemeke ndide idap ke n̄kan̄ eke spirit ye unana edida unan. Oro edisụn̄ọ ke nnyịn nditre ndiwụt esịtekọm nnọ utom oro Jehovah ọnọde nnyịn ndinam ke utịt ini emi. Nso utom idi oro?
2 Jehovah ke anam ikọt esie ẹtan̄a eti mbụk aban̄ade Obio Ubọn̄ esie—kpa n̄kukụre idotenyịn ubonowo—ke ofụri ererimbot. Nnyịn ndinam utom ikpat kiet ye esop Abasi anam ẹdiọn̄ọ nnyịn nte mme Christian oro ẹkerede ẹban̄a ini ẹnyụn̄ ẹnyenede udọn̄ ndin̄wam mbon en̄wen ẹkop “ikọ uwem nsinsi.” (John 6:68) Nnyịn iwụt nte ke idu ke edidemede ke n̄kan̄ eke spirit ebe ke ndibuana ifịk ifịk ke akakan utom emi.
3 Ẹnụk Ndikwọrọ Ikọ: Nte Mme Ntiense Jehovah, nnyịn ikpenyene ndinyene in̄wan̄în̄wan̄ ekikere mban̄a utom ukwọrọikọ nnyịn. Ima inyenede inọ Abasi ye mbọhọidụn̄ onụk nnyịn ndinyene ọkpọkpọ ebuana ke utom ukwọrọikọ. (1 Cor. 9:16, 17) Ke ndinam ntre, nnyịn iyanyan̄a idem nnyịn ye mmọ ẹmi ẹkopde uyo nnyịn. (1 Tim. 4:16) Ẹyak edi ubiere nnyịn ndibuana kpukpru ini nte ikekeme ye ke anyan ini nte oyomde ke ndikwọrọ mban̄a mfọnn̄kan ukara oro ubonowo akanam ekemede ndinyene—kpa Obio Ubọn̄ Abasi!
4 Odu akpan n̄kpọ oro anamde nnyịn ifiọk nte utom ukwọrọikọ nnyịn edide usọp usọp—akwa ukụt editọn̄ọ ke adan̄aemi nnyịn isụk inamde utom emi. Nnyịn nditre ndifiọk usen ye hour oyom ete nnyịn ikpeme inyụn̄ idu ke mben̄eidem kpukpru ini, iberide edem ke Jehovah ebe ke akam. (Eph. 6:18) Udomo oro ẹnamde utom ukwọrọikọ ke aka iso nditara. Edi usen kiet ke mîbịghike, n̄kpọnn̄kan utom unọ ikọ ntiense ke mbụk owo eyesịm utịt.
5 Da edinam akpanikọ nam ewụhọ Jesus oro ọdọhọde ete “ẹkpeme.” Emi edi akpan n̄kpọ idahaemi akan nte akanam edide. Nnyịn ikpakam inam n̄kpọ iban̄a enye ye ekikere nte ini edide usọp usọp. Mfịn ye kpukpru usen, ẹyak nnyịn iwụk ekikere ke n̄kpọ eke spirit, idu ke edidemede, inyụn̄ isịn ifịk ke utom Jehovah. Ih, nnyịn ikpakam “itaba idap ikpeme, imụm idem ikama.”—1 Thess. 5:6.