Ekebe Mbụme

◼ Didie ke mme adaidaha ẹkeme ndin̄wam mme ete ye eka ẹn̄wam nditọ mmọ ndinyene eti edu ke mme mbono esop?

Nte ido edide nditọwọn̄ ẹsikop odudu, imeheke mmọ nditetie mbịghi. Ke mbono esop asuanade, nditọwọn̄ ẹsisụk ẹnyenyene odudu oro ekemede ndinam mmọ ẹyom ndifehe itọk nnyụn̄ mbịne nditọwọn̄ eken ke Ufọkmbono Obio Ubọn̄ m̀mê ke mme itie mbono eken, ke itie ubon ubomisọn̄, m̀mê ke mbenusụn̄. Nte ededi, n̄ke emi edi akpanikọ: ‘Eyen eke ẹyakde ẹnọ idem esie, esịn ete m̀mê eka esie bụt.’—N̄ke 29:15.

Edi n̄kpọ mbọm nditịn̄, ẹma ẹnọ ndusụk nditọete nnyịn oro ẹdide mbonusọn̄ unan idiọk idiọk ke ntak emi nditọwọn̄ ẹkefehede ẹkenụk mmọ ẹduọk. Emi ama osụn̄ọ ke akamba ndutụhọ ọkọrọ ye ubiatokụk oro mîdotke ọnọ mme ete ye eka ye esop. Man mmọ ẹnyene ukpeme ẹnyụn̄ ẹtre ndinọ mmọ en̄wen unan, owo ikpenyeneke ndiyak nditọwọn̄ ẹfen̄e ẹnyụn̄ ẹbre mbre ke esịt m̀mê ke an̄wa Ufọkmbono Obio Ubọn̄.

Mme ete ye eka ẹnyene mbiomo N̄wed Abasi ndinọ nditọ mmọ ukpep ndinọ mme itie utuakibuot nnyịn ukpono oro odotde. (Eccl. 5:1a) Ke mme mbono esop Christian, n̄kpri mbono, ye ikpọ mbono nnyịn, ẹnịm mme adaidaha man ẹkụt nte ke “ẹnam kpukpru n̄kpọ ke nde ye ke ido nte eyede” ye nte ke ‘ẹtịm ẹdu uwem.’ (1 Cor. 14:40; Col. 2:5) Ana mmọ ẹdu ke edidemede ke an̄wa ye ke esịtufọk mbemiso edinam ọtọn̄ọde, ke ini akade iso, ye ke ini asuanade. Edieke eyenọwọn̄ efehede itọk m̀mê ọsọn̄de ibuot, adaidaha ekeme ndinam eyen oro atuak ada sụn̄sụn̄, ndien ekeme ndinam an̄wan̄a eyen oro ntak owo mîmaha mme utọ edinam oro. Ẹkpenyene n̄ko nditịn̄ mfịna oro ke mfọnido nnọ ete m̀mê eka eyen oro ye ufọn edinọ eyen ntịn̄enyịn. Ete m̀mê eka ekpenyene ndinam n̄kpọ mban̄a nte odotde.

Ẹfiọk ẹte ke nseknditọ ye n̄kpri nditọ ndusụk ini ẹkeme nditua m̀mê ndisịn ntịme ke ini mbono esop akade iso. Edieke mme adaidaha ẹsịmde ke nsụhọde n̄kaha minit 20 mbemiso edinam ọtọn̄ọde, ẹkeme ndinịm mme akpatre udịm n̄kpọitie ke edem ufọkmbono nnọ mme ete ye eka oro ẹdimade nditie do ye n̄kpri nditọ mmọ. Nnyịn eken ikpenyene ndidiana kiet ebe ke ndikpọn̄ mme n̄kpọitie oro nnịm nnọ mmọ.

Edieke eyen esịnde ntịme, ete m̀mê eka ekpenyene ndinam n̄kpọ mban̄a. Edieke ete m̀mê eka mînamke n̄kpọ iban̄a ndien ntịme oro etịmerede mme owo, adaidaha ke mfọnido ekpenyene ndibụp ete m̀mê eka m̀mê enye akpama ndimen eyen oro n̄wọrọ ke esịt ufọkmbono. Ke ini nnyịn ikotde mbufa owo oro ẹnyenede n̄kpri nditọ ẹdidụk mme mbono esop, nnyịn ikpenyene nditie ye mmọ inyụn̄ inọ un̄wam kaban̄a nditọ mmọ edieke mmọ ẹtuade m̀mê ẹsịnde ntịme ke mme usụn̄ efen.

Nnyịn imesikop idatesịt ndikụt nditọwọn̄ ẹmi ẹdude ke nsio nsio isua emana ke Ufọkmbono Obio Ubọn̄ ndinyụn̄ n̄kụt eti edu mmọ ke ufọk Abasi. (1 Tim. 3:15) Ebede ke mmọ ndiwụt ukpono nnọ ndutịm utuakibuot Jehovah, mmọ ẹnọ enye ukpono, kpukpru owo ke esop ẹnyụn̄ ẹdara mmọ.