Ufọn Jehovah Ofori Nnyịn
1 Ẹsiwak ndida ibat okụk oro owo adiade ndiọn̄ọ unen oro enye okụtde. Ntak edi oro ediwak owo ẹsidade mbon oro ẹnyenede okụk nte mbon oro ẹkopde inemesịt ye ata uyụhọ ẹkan. Nte ededi, mbon oro ẹkerede ke okụk ekeme ndidep inemesịt ẹnam ata ndudue. (Eccl. 5:12) “Mmọ eke ẹyomde ndidi mbon inyene” ke usụn̄ eke obụk inyeneke idatesịt eke ebịghide. (1 Tim. 6:9) Ke edide isio, mme asan̄autom Jehovah ẹnen̄ede ẹkop idatesịt ẹnyụn̄ ẹdi mbon oro ẹforode ẹkan ke ererimbot. (N̄ke 10:22; Edi. 2:9) Didie ke edi ntre?
2 Uyarade Uforo Nnyịn: Nnyịn imenyene uwak ikike eke spirit ye ifiọk Ikọ Abasi, kpa Bible. Ebede ke esop esie eke isọn̄, Jehovah aka iso ekpep nnyịn aban̄a idemesie ye Eyen esie, adade nsinsi ufọn ọsọk nnyịn. Nnennen ifiọk anam nnyịn ikeme ndisan̄a n̄kpere Jehovah nnyụn̄ ndara ntotụn̄ọ itie ebuana ye enye. (Jas. 4:8) Nditịm mfiọk se idide eti ye idiọk nnyụn̄ ntiene mbet Abasi ekpeme nnyịn osio ke ndusụk udọn̄ọ ye mme n̄kpọndịk. Nnyịn imenyene mbuọtidem nte ke Jehovah eyese aban̄a nnyịn, osụn̄ọde ke uyụhọ otode Abasi ye ifụre ekikere.—Matt. 6:33.
3 Nnyịn imenyene emem ye edidianakiet ke itie nditọete nnyịn eke spirit sia ikọride mbun̄wụm spirit Abasi. Ke ọkpọsọn̄ mbọbọ ima adiande kiet, iyomke nnyịn ikere nte ke Abasi m̀mê nditọete nnyịn ẹkpọn̄ nnyịn ke ini nnyịn isobode afanikọn̄.—Gal. 6:10.
4 Uwem nnyịn enyene se enen̄erede ọwọrọ onyụn̄ enyene uduak. Nnyịn ibat edibuana ke edikwọrọ eti mbụk ke ofụri ekondo nte utịbe utịbe ifet. Emi ada idatesịt eke ebịghide edi nte nnyịn in̄wamde mbon efen ẹnyene eti itie ebuana ye Abasi ẹnyụn̄ ẹdidiana kiet ye nnyịn ẹnam utom ke edisana utuakibuot. Ọsọn̄urua n̄kpọuto eke utom ukwọrọikọ nnyịn ada ukpono ọsọk Jehovah onyụn̄ ọnọ nnyịn uyụhọ eke editịp n̄kpọ nsịn ke edinam enyịn̄ esie asana. Nnyịn imọsọn̄ọ imụm in̄wan̄în̄wan̄ edu ukere n̄kpọ ikama, ifiọkde ite ke idotenyịn nnyịn kaban̄a ini iso oyosu ke mîbịghike.
5 Ndiwụt Esịtekọm Nnyịn: Nnyịn ikpakam iwụt esịtekọm kpukpru ini iban̄a mme ufọn Jehovah, oro anamde nnyịn inen̄ede idi mbon oro ẹforode ẹkan ke isọn̄. (N̄ke 22:4) Ndida ini ke usen kiet kiet ntie n̄kere se nnyịn inyenede onụk nnyịn ndikọm Jehovah ke uwak ima esie nnyụn̄ n̄ka iso nnọ enye san̄asan̄a utuakibuot nnyịn.